ފުލުހުން ތަހުގީގު ކުރާ ސްކޭމް މައްސަލަތަކުގައި ހިމެނޭ ބައެއް ފަރާތްތަކުގެ ބޭންކް އެކައުންޓްތައް، ކޯޓު އަމުރެއް ނެތި ހިފެހެއްޓުމުގެ ބާރު ފުލުހުންނަށް ދިނުމަށް، ޖިނާއީ އިޖުރާތުގެ ގަނޫނަށް އިސްލާހު ގެނައުމަށް ހުށަހަޅައިފި އެވެ.

މި އިސްލާހު ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ. ޖިނާއީ އިޖުރާޢަތުގެ ގާނޫނުގެ 73 ވަނަ މާއްދާގެ (ހ) އަށް ގެންނަ މި އިސްލާހަކީ ސްކޭމް މައްސަލަތަކުގައި މަކަރާއި ހީލަތުން އެހެން މީހެއްގެ ފައިސާ ހޯދާ ފަރާތުގެ ބޭންކް އެކައުންޓް ހިފަހައްޓާ، ތިން ވަނަ ފަރާތުގެ ރައްކާތެރިކަން ކަށަވަރުކުރުމަށް ފުހުންނަށް ބާރު ދިނުމަށް ގެންނަ އިސްލާހެކެވެ.

އެ އިސްލާހުގައި އިތުރަށް ބަޔާންކޮށްފައި ވާގޮތުން، އެކައުންޓުގައިވާ ފައިސާ ނުވަތަ ފައިސާ ޓްރާންސްފާ ކޮށްފައިވާ އެހެން އެކައުންޓުތަކުގެ ފައިސާ ހިފެހެއްޓުމަށް ނުވަތަ އެ ފައިސާއިން މުއާމަލާތް ކުރުން ހުއްޓުވުމުގެ އަމުރެއް ފުލުހުންނަށް ނެރެވިދާނެ އެވެ.

މިގޮތުން ފުލުހުންގެ ފަރާތުން އެފަދަ އަމުރެއް ނެރެވޭނީ ސަބް އިންސްޕެކްޓާ އޮފް ޕޮލިސްގެ ރޭންކުން ފެށިގެން މަތީ ރޭންކުގެ އޮފިސަރުންނަށްކަމަށް ވެސް އެ އިސްލާހުގައި ވެއެވެ. އަމުރު ނެރުމުން އެކައުންޓް ހުޅުވާފައިވާ ބޭންކަށް ނުވަތަ މޯލްޑިވްސް މަނިޓަރީ އޮތޯރިޓީއަށް ލަސްނުކޮށް އަންގަންވާނެކަން އިސްލާހުގައި ބަޔާންކޮށްފައިވެ އެވެ.

މިހާރު އަމަލު ކުރަމުންދާ ޖިނާއީ އިޖުރާއަތުގެ ގާނޫނުގެ 72 ވަނަ މާއްދާގައި، ބޭންކް އެކައުންޓް މޮނިޓާކުރަން ކޯޓު އަމުރަކަށް ފުލުހުންނަށް އެދެވޭނެ 3 ހާލަތްތަކުގެ ތެރޭގައި ސްކޭމްގެ މައްސަލަތަކެއް ނުހިމެނެ އެވެ. މިހާރު އޮންނަނީ ޖިނާއީ ބޮޑުކުށެއް ފާހަގަ ކުރެއްވިއްޖެ ނަމަ ފުލުހުންނަށް ކޯޓު އަމުރަކަށް އެދެވިދާނެ ކަމަށެވެ.

މެމްބަރު ހުށަހެޅުއްވީ ޖިނާއީ ބޮޑު ކުށެއްގެ އިތުރުން، 'މަކަރާއި ހީލަތުން ނުވަތަ ސްކޭމްއަކުން އެކައުންޓުގެ ވެރިފަރާތަށް އޮޅުވާލައިގެން ފައިސާ ނަގަމުންދާ' މައްސަލަތައް އެ މާއްދާގައި ހިމެނުމަށެވެ.

20 މިލިއަނަށް ވުރެ ގިނަ ރުފިޔާގެ 1661 މައްސަލަ ސްކޭމްތަކާ ގުޅިގެން މިދިޔަ އަހަރު އެކަނިވެސް ފުލުހަށް ހުށަހަޅާފައިވެ އެވެ. އަދި މިއަހަރުގެ މިހާތަނަށް 1302 މައްސަލަ ރިޕޯޓުކޮށްފައިވާ ކަމަށް ފުލުހުން ބުނެފައިވެ އެވެ. މިފަދަ މައްސަލަތަކުގައި 500 އަށްވުރެ ގިނަ ބޭންކް އެކައުންޓް ބްލޮކްކޮށް 782 ޑިވައިސް ނެޓްވޯކްތަކުން ބްލޮކްކޮށްފައިވާ ކަމަށް ފުލުހުންވަނީ ފާއިތުވި ހަފްތާގައި ހާމަކޮށްފަ އެވެ.