ބުޅާމަސް ބޭނުންކޮށްގެން ކާތަކެތި ހަދައި ވިއްކަމުން ދިޔަ ބިދޭސީއަކު ހޯދަން އިމިގްރޭޝަނުން އިއުލާންކޮށްފި އެވެ.

އެ މައްސަލާގައި ހޯދަން އިއުލާންކޮށްފައި ވަނީ އަރަފާތު ހޮސައިން ނަމަކަށް ކިޔާ ބަންގްލަދޭޝްގެ މީހެކެވެ.

ފެލީން ވެލްފެއާ އޯގަނައިޒޭޝަނުން އެކްސްގައި ބުނެފައި ވަނީ، އެއީ ގަވާއިދާ ހިލާފަށް މާލޭ ވަޅޯމަސް މާރުކޭޓުގައި މަސައްކަތް ކުރަމުންދާ މީހެއް ކަމަށެވެ. އަދި ބުޅާ ކަތިލައި، އޭގެ މަހުން ކާއެއްޗެހި ތައްޔާރުކޮށް، ވިއްކާ އެ އޮގަނައިޒޭޝަނުން ބުންޏެވެ.

އޭނާގެ ވޯކް ޕާމިޓުގައި ބުނެފައިވާ ގޮތުން އޭނާ ރާއްޖޭގައި އަދާކުރަމުންދަނީ ވެއިޓަރެއްގެ ވަޒީފާ އެވެ.

އެ ބިދޭސީ މީހާއަކީ މަގުމަތީގައި އުޅޭ ބުޅާތައް ހިފައިގެން ގޮސް، އެ އެއްޗެހި ކައްކައިގެން ކައި އުޅޭ މީހެއް ކަމަށް ވެސް ސޯޝަލް މީޑިއާގައި ބައެއް މީހުން ބުނެފައިވެ އެވެ.

އެ ބިދޭސީ މީހާ ދިރިއުޅޭގޭގެ ވެރިފަރާތުން ވެސް ސޯޝަލް މީޑިއާގައި ބުނެފައި ވަނީ އެ ބިދޭސީ މީހާ އުޅެނީ އޭނާގެ ގޭގައި ކުއްޔަށް ކަމަށެވެ. އޭނާ އުޅޭ ކޮޓަރިން އަބަދުވެސް ބުޅާ ރޯ އަޑު އިވޭ ކަމަށާއި އަދި އެ ބުޅާތަކަށް ފެނާއި ބުޅާ ކާނާ އަޅާފައި ދޮރުމަތީގައި ބެހެއްޓުމުން ބުޅާތައް ކާން އާދެ އެވެ. ދެން އެ ބިދޭސީ މީހާ އެ ބުޅާތައް ހިފައި ކަތިލަ އެވެ.

ބިދޭސީ މީހާގެ ކޮޓަރި ތެރެއިން ބޯ ނެތް ބުޅަލެއް ފެނުނު ކަމަށްވެސް ގޭގެ ވެރިފަރާތުން ބުންޏެވެ.