ކުޑަކުއްޖަކަށް ޖިންސީ ގޯނާކުރުމުގެ ކުށުގައި މީހަކު 12 އަހަރަށް ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.

މި ހުކުމް ކޮށްފައިވަނީ މިދިޔަ އަންގާރަ ދުވަހު އެވެ. މި މައްސަލައިގައި 12 އަހަރުގެ ޖަލުހުކުމެއް ކޮށްފައިވަނީ ރ. މާކުރަތު، އިމޭޖް، މުޙައްމަދު ދާއޫދުގެ މައްޗަށެވެ.

ކުޑަކުއްޖަކާ އެކު ޖިންސީ އަމަލެއް ހިންގުމުގެ ކުށުގެ ދައުވާއާއި އޮރިޔާން ކާޑު ގެންގުޅުމުގެ ކުށުގެ ދައުވާ އޭނާ އާ ދެކޮޅަށް ދައުލަތުން ކޮށްފައިވެ އެވެ.

ކުޑަކުއްޖަކާ އެކު ޖިންސީ އަމަލެއް ހިންގުމުގެ ކުށުގެ ދައުވާ ސާބިތުވާ ކަމަށް ކަނޑައަޅައި، 12 އަހަރަށް ޖަލަށްލާން ވަނީ ހުކުމްކޮށްފަ އެވެ. ނަމަވެސް އޭނާ އޮރިޔާން ކާޑު ގެންގުޅުކަމުގެ ދައުވާ ސާބިތެއް ނުވެ އެވެ.

މި މައްސަލައަކީ ކުޑަކުއްޖެއްގެ މަސްލަހަތު ހިމެނޭ މައްސަލައަކަށްވާތީ، މި މައްސަލައާ ގުޅޭ އެއްވެސް ތަފުސީލެއް ކްރިމިނަލް ކޯޓުން ހާމަކޮށްފައެއް ނުވެ އެވެ.