ހުޅުމާލެ ގައި ހުންނަ ވަން އެވެނިއުގެ އެޕާޓްމަންޓަކަށް ވަދެ، މުދަލަށް ގެއްލުން ދިން މައްސަލައެއް ފުލުހުން ބަލަން ފަށައިފި އެވެ.

ފުލުހުން ބުނީ މިއަދު ހެނދުނު 06:32 ހާއިރު ވަން އެވެނިއު އެޕާޓްމަންޓަކަށް ވަދެ، މުދަލަށް ގެއްލުން ދިން މައްސަލައެއް ފުލުހުންނަށް ރިޕޯޓުކޮށްފައިވާ ކަމަށެވެ.

މި މައްސަލައާ ގުޅިގެން ބަލަންޖެހޭ ކަންކަން ބަލަމުންދާ ކަމަށް ފުލުހުން ބުންޏެވެ.

މިކަމާއި ގުޅޭގޮތުން ފުލުހުން އިތުރު ތަފްސީލު ހާމަކޮށްފައިނުވެ އެވެ.

ބަޔަކު ވަނީ މިކަމާއި ގުޅިގެން ސޯޝަލް މީޑިއާގައި ޕޯސްޓެއް ޖަހާފަ އެވެ. ޕޯސްޓުގައި އެ ޕާޓްމަންޓަށް ވަދެ ބިރުދައްކާ މުދަލަށް ގެއްލުން ދިން ދެ މީހުން ކަމަށް ބުނެ ޒުވާން އަންހެނަކާއި ފިރިހެނެއްގެ ފޮޓޯވެސް އާންމުކޮށްފައިވެ އެވެ.

ކުޑަކުދިންވެސް އުޅޭ އެ އެޕާޓްމެންޓަށް ބަޔަކު ވަދެ މަރާލާނެކަމަށް ބުނެ އާއިލާގެ ބައެއް މީހުނަށް ބިރުވެސް ދައްކާފައިވާކަމަށް އެ ޕޯސްޓުގައި ބުނެފައިވެ އެވެ.

ފާހަގަކޮށްލެވޭ ގޮތުގައި ވަން އެވެނިއު އިމާރާތަކީ ސެކިއުރިޓީ ކޮންޓްރޯލާއެކު އެ އިމާރާތުގެ އެތެރެއަށް ވަދެވޭ ތަނެކެވެ.