ކުރީގެ ރައީސް އަބްދުﷲ ޔާމީން މައްޗަށް ދައުލަތުން އުފުލި މަނީލޯންޑަރިންގެ ދައުވާގައި ޕްރޮސެކިއުޓާ ޖެނެރަލްގެ ފަރާތުން ވަކާލާތު ކުރެއްވި ވަކީލު އީނާ މޫސާ އާ ފިޝަރީޒް މިނިސްޓަރު އަދި ޕީޕީއެމްގެ ނައިބު ރައީސް އަހުމަދު ޝިޔާމް ދެއަންބަށް ކައިވެނި ބައްލަވައިގެންފި އެވެ.

"ހުރިހާ"އަށް ކަށަވަރުވެފައިވާ ގޮތުގައި ބ. ތުޅާދުއަށް އުފަން އީނާއާ ޝިޔާމް ދެއަންބަށް ކައިވެނިބައްލަވައިގަތީ މިދިޔަ ހޮނިހިރު ދުވަހު އެވެ.

ނޯޕޭ ލީވެއްގައި އީނާ މިހާރު ގެންދަނީ މެލޭޝިޔާގައި މަތީތައުލީމް ހާސިލުކުރަމުންނެވެ.

ޝިޔާމަށް މީގެ ކުރީގެ ކައިވެންޏަށް ދެ ކުދިން ލިބިފައިވެ އެވެ. އެއީ ފިރިހެން ކުއްޖަކާއި އަންހެން ކުއްޖެކެވެ.

މީގެ ކުރިން ޔާމީންގެ ސަޕޯޓަރުން ވަނީ އެމަނިކުފާނުގެ މައްސަލައަށް ޕީޕީއެމްގެ އިސްވެރިން ޕީޖީ އޮފީސް ތެރެއިން ނުފޫޒުފޯރުވާ ކަމަށް ތުހުމަތުކޮށްފަ އެވެ. އެމަނިކުފާނުގެ ޝަރީއަތް ލަސްކުރަން ޕީޕީއެމްގެ އިސްވެރިން އޭރު ވެސް މަސައްކަތް ކުރެއްވި ކަމަށް ތުހުމަތުކުރި އެވެ. ނަމަވެސް ޝިޔާމް ހިމެނޭހެން ޕީޕީއެމްގެ އިސްވެރިން އެ ތުހުމަތުތައް ދޮގުކުރި އެވެ.