ދެކުނު އިންޑިއާގެ ޕްރޮޑިއުސަރެއް ކަމަށްވާ ދަނުޝްގެ ފިލްމެއްގެ މަންޒަރެއް ހުއްދަނެތި ޑޮކިއުމެންޓްރީއެއްގައި ބޭނުން ކުރުމުން ބޮލީވުޑްގެ އެކްޓަރެއް ކަމަށްވާ ނަޔަންތުރާއާ ދެކޮޅަށް ދަނުޝް ކޯޓަށް މައްސަލަ ހުށައަޅައިފި އެވެ.

2022 ވަނަ އަހަރު ވިގްނޭޝް ޝިވަންއާ ކައިވެނިކުރި ނަޔަންތަރާ ވަނީ ވަރަށް ފަހުން އޭނާގެ ހަޔާތުގެ މައްޗަށް ހަދާފައިވާ ޑޮކިއުމެންޓްރީއެއް ނެޓްފްލިކްސްގައި ރިލީޒް ކޮށްފަ އެވެ.

"ނަޔަންތަރާ: ބިޔޯންޑް ދަ ފެއަރީ ޓޭލް"ގެ ނަމުގައި ރިލީޒް ކޮށްފައިވާ އެ ޑޮކިއުމެންޓްރީގައި އޭނާގެ ފިލްމުތަކުގެ މަންޒަރުތައް ހިމެނޭހެން ނަޔަންތަރާގެ ހަޔާތުގެ މުހިއްމު އުސްއަލިތައް ދައްކުވައިދީފައިވެ އެވެ. އެގޮތުން އެ ޑޮކިއުމެންޓްރީގައި 2015 ވަނަ އަހަރު ރިލީޒްކުރި ދަނުޝްގެ ފިލްމެއް ކަމަށްވާ "ނާނުމް ރައުޑީ ދާން"ގެ ތިން ސުކުންތުގެ މަންޒަރެއް ވަނީ ހިމަނާފަ އެވެ.

އެ ފިލްމުގެ ލީޑު ތަރިންގެ ގޮތުގައި ނަޔަންތަރާއާއި ވިޖޭ ސެތުޕުތީ ފެނިގެންދިޔައިރު އެ ފިލްމް ލިޔެ ޑައިރެކްޓްކުރީ ނަޔަންތަރާގެ މިހާރުގެ ފިރިމީހާ ވިގްނޭޝް އެވެ.

"ނަޔަންތަރާ: ބިޔޯންޑް ދަ ފެއަރީ ޓޭލް" ރިލީޒް ކުރުމުގެ ކުރިން ނަޔަންތަރާ ވަނީ އެ ޑޮކިއުމެންޓްރީ އުފެއްދުމުގައި ދާއިރާގައި އުޅޭ އޭނާގެ ގިނަ ރަހުމަތްތެރިންގެ އެއްބާރުލުން ލިބުނު ނަމަވެސް ދަނުޝްގެ ފަރާތުން އުނދަގޫތަކެއް ކުރިމަތިވި ކަމަށް ބުނެފަ އެވެ.

ރައްދުގައި ދަނުޝް މިވަނީ މެޑްރާސް ހައިކޯޓުގައި ހުއްދަނެތި އޭނާގެ ފަންނީ މަސައްކަތެއް ބޭނުން ކުރުމުގެ ދައުވާ ނަޔަންތަރާގެ މައްޗަށް އުފުލާފަ އެވެ.

ގިނަ ބަޔަކަށް ނަޔަންތަރާ އެނގިގެން ދިޔައީ މިދިޔަ އަހަރު ނުކުތް ބޮލީވުޑްގެ ކާމިޔާބު ފިލްމު "ޖަވާން"ގައި ޝާހްރުކް ޚާންގެ ބަތަލާއެއްގެ ގޮތުގައި ފެނިގެން ދިއުމުންނެވެ.