ލަންކާގައި ފާއިތުވި ދެ ދުވަހު ބޯކޮށް ވެހުނު ވާރެއާއި ގަދަ ވައިގެ ސަބަބުން ފެންބޮޑުވެ، މިހާތަނަށް ފަސް މީހުން މަރުވެއްޖެއެވެ. މީގެ ތެރޭގައި ސްކޫލުން އެނބުރި ގެއަށް ދަތުރުކުރަމުންދިޔަ ތިން ކުދިން ހިމެނެ އެވެ.

އެގައުމުގެ ކަމާބެހޭ އިދާރާތަކުން ހާމަކޮށްފައިވާ ގޮތުގައި، މޫސުން ގޯސްވުމުގެ ސަބަބުން ގެދޮރާއި ދަނޑުބިންތަކާއި މަގުތައް ފެންބޮޑުވެ، ސައިފަތް ހައްދާ ފަރުބަދަ ސަރަހައްދުތަކުގައި ރޭލު ދަތުރުތައް ހުއްޓާލަން ޖެހިފައިވެ އެވެ.

އަންގާރަ ދުވަހުގެ ހަވީރު، ސްކޫލުން އެނބުރި ގެއަށް ދަތުރުކުރަމުންދިޔަ 11 ކުދިން ދަތުރުކުރި ޓްރެކްޓަރެއް ފެންބޮޑުވުމުގެ ސަބަބުން އޮޔާ ދަމައިގަތުމާ ގުޅިގެން، އަށް މީހަކު ގެއްލިގެން ރިޕޯޓްކޮށްފައިވެ އެވެ. ފުލުހުން މައުލޫމާތު ދީފައިވާ ގޮތުގައި، މި ހާދިސާއިން ފަސް ކުދިން ސަލާމަތްވެފައިވާއިރު، ބުދަ ދުވަހު އޭގެތެރެއިން ތިން ކުއްޖެއްގެ ހަށިގަނޑު ފެނިފައިވެ އެވެ.

މީގެ އިތުރުން، ފާރެއް ވެއްޓިގެން އަންހެނަކު މަރުވެފައިވާއިރު، ފެންބޮޑުވުމުގެ ސަބަބުން އިތުރު އެކަކު މަރުވެފައިވާ ކަމަށް ބޭރުގެ މީޑިއާތަކުން ރިޕޯޓުކޮށްފައިވެ އެވެ.

ލަންކާގެ ޓީވީ ޗެނަލް ޑެރާނާއިން ރިޕޯޓުކޮށްފައިވާ ގޮތުގައި، އެއާފޯސް ހެލިކޮޕްޓަރުތަކުގެ އެހީތެރިކަމާއެކު ގެއްލުނު މީހުން ހޯދުމުގެ މަސައްކަތް ސިފައިން ދަނީ ކުރަމުންނެވެ.

ބޯކޮށް ވާރޭވެހި ފެންބޮޑުވުމުގެ ސަބަބުން ބުދަ ދުވަހުގެ ނިޔަލަށް 3،000 އަށް ވުރެ ގިނަ މީހުން ވަގުތީ ހިޔާތަކަށް ބަދަލުކޮށްފައިވާއިރު، ގާތްގަނޑަކަށް 600 ގެއަކަށް ވަނީ ގެއްލުން ލިބިފަ އެވެ.

ލަންކާގެ މޫސުމާ ބެހޭ އިދާރާއިން ވަނީ ބޭ އޮފް ބެންގާލްގައި އުފެދިފައިވާ ކޮޅިގަނޑެއްގެ ސަބަބުން ނޮވެމްބަރު 27 އިން ފެށިގެން ފަސް ދުވަހަށް މޫސުން ގޯސްވާނެކަމަށް ލަފާކޮށްފަ އެވެ. އަދި މިއަދުގެ ވަގުތެއްގައި ލަންކާއާ ކައިރިއަށް މި ކޮޅިގަނޑު ދަތުރުކޮށް ތޫފާނަކަށް ބަދަލުވުން އެކަށީގެންވާ ކަމަށް އެ އިދާރާއިން ވަނީ އިންޒާރު ދީފައެވެ.