ވަޒީރުންގެ މަޖިލީހުގެ ނިންމުން ބަދަލުކޮށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ދަށަށް ފެނަކަ ކޯޕަރޭޝަން ބަދަލު ނުކުރަން ނިންމައިފި އެވެ.

އެގޮތަށް ނިންމާފައިވަނީ ފިނޭން މިނިސްޓްރީން މި މަހުގެ 24 ވަނަ ދުވަހު އެސްޓީއޯއަށް އެންގުމާއި ގުޅިގެންކަމަށް އެ ކުންފުނިން ބުނެ އެވެ.

އެގޮތުން މިއަދު އެސްޓީއޯގެ ބޯޑު ބައްދަލުވުމުގައި ވަނީ އެސްޓީއޯގެ ސަބްސިޑަރީ ކުންފުންޏަކަށް ފެނަކަ ބަދަލުކުރުމަށް ކުރަމުންދިޔަ މަސައްކަތް ހުއްޓާލުމަށް ނިންމާފަ އެވެ.

ބޮޑު ދަރަނީގައި ހިންގަމުން އަންނަ ފެނަކަ ކޯޕަރޭޝަން އެސްޓީއޯގެ ދަށަށް ބަދަލުކުރަން ނިންމަވާ މިދިޔަ އޮގަސްޓް މަހު ރައީސް މުހައްމަދު މުއިއްޒު ވަނީ އިއުލާންކުރައްވާފަ އެވެ. އޭރު ސަރުކާރުން ބުނެފައިވަނީ އަންނަ ޖެނުއަރީ މަހުން ފެށިގެން ފެނަކަ ހިންގާނީ އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި ކަމަށެވެ.

ނަމަވެސް 2025 ވަނަ އަހަރަށް ލަފާކުރާ ބަޖެޓް ފޮތުގައި ވަނީ އެސްޓީއޯގެ ދަށަށް ފެނަކަ ގެންދިއުމުގެ ބަދަލުގައި ފެނަކަ އާއި ސްޓެލްކޯ އެއްކޮށްލުން ފަދަ ކޮންމެވެސް ދާއިމީ ހައްލެއް ހޯދުމަށް ފިނޭންސް މިނިސްޓްރީން މަސައްކަތް ކުރަމުން ދާކަމަށެވެ.