އޭޑީކޭއަށް މަހަކު 14،500ރ ދައްކަންޖެހޭ ގޮތަށް އިންޓާންޝިޕް ހެދުމުގެ ފުރުސަތު އެ ހޮސްޕިޓަލުން އިއްޔެ ހުޅުވާލައިފި އެވެ.

އަންނަ ޖެނުއަރީގައި ފަށުމަށް ހަމަޖެހިފައިވާ މެޑިކަލް އިންޓާންޝިޕަށް އަންނަ މަހުގެ ނިޔަލަށް ފޯމު ހުށަހެޅުމަށް ވަނީ ހުޅުވާލާފައިވެ އެވެ.

އޭޑީކޭއިން އިންޓާންޝިޕް ހަދާނަމަ ޑޮކްޓަރުން ކޮންމެ މަހަކު ވެސް 14،500ރ. ދައްކަންޖެހޭނެ ކަމަށް އިއުލާނުގައިވެ އެވެ.

އިންޓާންޝިޕްގެ ފުރަތަމަ ބުރުގައި 20 ޖާގަ ދިނުމަށް އެ ހޮސްޕިޓަލުން ވަނީ ނިންމާފަ އެވެ.

މޯލްޑިވްސް މެޑިކަލް ކައުންސިލްގެ ގަވައިދު އޮންނަގޮތުން ޕްރެކްޓިސްކުރުމަށް ޑޮކްޓަރުންނަށް ލައިސެންސް ދެވޭނީ 5-6 އަހަރުގެ ކިޔެވުމަށް ފަހު އެއް އަހަރުގެ އިންޓާންޝިޕެއް ފުރިހަމަކުރުމުންނެވެ. އެ އުސޫލުން ބަލާ ނަމަ، އޭޑީކޭގައި އިންޓާންޝިޕް ހަދަން އެ ތަނަށް 174،000ރ. ގެ ފީއެއް ދައްކަންޖެހެ އެވެ.

އައިޖީއެމްއެޗް ގައި 2018 އިން ފެށިގެން އިންޓާންޝިޕް ހެދެ އެވެ. މި ވަގުތު ވެސް އެ ހޮސްޕިޓަލުގައި 60 ޑޮކްޓަރުން އަންނަނީ އިންޓާނުންގެ ގޮތުގައި މަސައްކަތް ކުރަމުންނެވެ.

އައިޖީއެމްއެޗްގައި އިންޓާންޝިޕް ޑިމާންޑު ބޮޑުވުމުން، އޭޑީކޭގައި އިންޓާންޝިޕް ޕްރޮގްރާމް ފަށައިދިނުމަށް އެދުނީ ހެލްތު މިނިސްޓްރީންނެވެ.