މާލޭގައި މަރުވި ނޭޕާލްއަށް ނިސްބަތްވާ ކަންޗަން ޑަންގަލް، 25، ގެ ހަށިގަނޑާ ހަވާލުވާނެ މީހަކު ނުވި އެވެ.

މިދިޔަ އަހަރުގެ ޑިސެމްބަރު 9 ވަނަ ދުވަހު މަރުވި ކަންޗަންގެ ހަށިގަނޑާ ހަވާލުވާނެ މީހަކު ނެތި މޯޗަރީގައި އޮންނަތާ 24 ދުވަސް ވަނީ ވެފަ އެވެ.

ފުލުހުން ގެންނަދަނީ އޭނާގެ ހަށިގަނޑާމެދު އަމަލު ކުރާނެ ގޮތަކާއި މެދު ނޭޕާލް އެމްބަސީއާ މަޝްވަރާ ކުރަމުންނެވެ.

ކަންޗަން އައިޖީއެމްއެޗް ހޮސްޕިޓަލުގެ އީއާރަށް ގެނައީ ވަރަށް ބޮޑަށް ބަނޑުގައި ރިއްސާތީ ކަމަށާއި ހޮސްޕިޓަލަށް ގެނައި މަގުމަތީގައި ހަބަރު ހުސްވެފައިވާ ކަމަށް މިހާތަނަށް ތަހުގީގަށް އެނގިފައިވާ ކަމަށް ފުލުހުން ކުރިން ބުނެފައިވެ އެވެ.

ފުލުހުން ބުނީ މެޑިކޯ ލީގަލް ރިޕޯޓުން ކަންޗަން މަރުވި ސަބަބު އެނގިފައި ނުވާއިރު، އޭނާއަށް ޖިންސީ އަނިޔާއެއް ލިބިފައިވާކަން އެއްވެސް މިންވަރަކަށް ފާހަގަ ކުރެވިފައި ނުވާ ކަމަށެވެ.

ނަމަވެސް އޭނާއަކީ އެނީމިއާގެ މެޑިކަލް ހިސްޓްރީއެއް އޮންނަ މީހެއްކަން އެނގިފައިވާ ކަމަށް ފުލުހުން ބުންޏެވެ.

ކަންޗަން މަރުވުމުން ހަށިގަނޑު މޯޗަރީއަށް ގެންދިޔައީ ފުލުހުންނެވެ. އޭނާގެ ހަށިގަނޑާ ސްޕޮންސަރުގެ ފަރާތުން ހަވާލުވެފައިނުވެ އެވެ.

ޓިކްޓޮކްގައި އެކްޓިވްކޮށް އުޅުނު ކަންޗަން މަރުވި ދުވަހުގެ ކުރީ ދުވަހުވެސް ޕޯސްޓްކޮށްފައި ވާކަން ފާހަގަކޮށްލެެވެ އެވެ.

އޭނާގެ މަރުގެ މައްސަލަ ތަހުގީގު ކުރަމުންދާކަމަށް ފުލުހުން ބުނެފައިވެ އެވެ.