މީގެ ފަސް މަސް ކުރިން ރައްޔިތުންގެ މަޖިލީހަށް އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން މަނާކުރަން ހުށަހެޅި ބިލުގެ މަސައްކަތް އިތުރަށް ދަންމާލުމަށް މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ފާސްކޮށްފި އެވެ.

މިއަދު އޮތް ކޮމިޓީ ބައްދަލުވުމުގައި މި މައްސަލަ އެކި ދާއިރާތަކުގެ މީހުންނާއި އިދާރާތަކާއި ޖަމިއްޔާތަކާއި ސުވާލުކޮށް ދިރާސާ ކުރުމަށް ތުޅާދޫ ދާއިރާގެ މެންބަރު އަބްދުލްހައްނާނު އަބޫބަކުރު ހުށަހެޅުއްވުމުން މާފަންނު އުތުރު ދާއިރާގެ މެންބަރު މުހައްމަދު ނާޒިމް ވަނީ އެކަމަށް ތާއީދުކުރައްވާފަ އެވެ.

އެގޮތުން އެ ދިރާސާތަކާއެކު އަންނަ އަހަރުގެ ފެބްރުއަރީއާ ހަމައަށް ބިލުގެ މަސައްކަތް ކުރިއަށް ގެންދިއުމަށް ކޮމިޓީން ވަނީ ފާސްކޮށްފަ އެވެ.

އިޒްރޭލު ޕާސްޕޯޓުގައި ރާއްޖެއަށް މީހުން އެތެރެވުން ހުއްޓުވަން އިމިގްރޭޝަން ގާނޫނު އިސްލާހުކުރަން ގަލޮޅު ދެކުނު ދާއިރާގެ މެންބަރު މީކާއީލް ނަސީމް މެއި މަހު ހުށަހެޅުއްވި ބިލު ބަލައިގަތީ 10 ޖޫން ގަ އެވެ. ނަމަވެސް އެ ކޮމިޓީ މަސައްކަތް ފެށީ ބިލު ބަލައިގަނެ ކޮމިޓީއަށް ފޮނުވިތާ ފަސް މަސް ފަހުން މިއަދު އެވެ.

ކޮމިޓީން ބިލުގެ މަސައްކަތް ކުރިއަށް ނުގެންގޮސް ގިނަ ދުވަސްތަކެއް ވަމުންދާތީ އިދިކޮޅުން އެކި ފަހަރުމަތިން ހުށަހެޅި ކުއްލި މައްސަލަތައް ވެސް ޕީއެންސީގެ ސުޕާ މެޖޯރިޓީ އޮންނަ މަޖިލީހުން ވަނީ ބޭރުކޮށްލާފަ އެވެ. މިއަދުވެސް އެމްޑީޕީން ވަނީ މި ބިލުގެ މަސައްކަތް އަވަސްކޮށްދިނުމަށް ގޮވާލާ މަޖިލީހަށް ގަރާރެއް ހުށަހަޅާފަ އެވެ.

މި މައްސަލަ ކޮމިޓީގައި އެޖެންޑާކުރީ ރައީސް މުހައްމަދު މުއިއްޒު ފަލަސްތީނުގެ މައްސަލައިގައި އިސްލާމީ ގައުމުތަކުގެ ލީޑަރުންގެ ބައްދަލުވުމަށް ސައުދީއަށް ވަޑައިގަންނަވަން ޖެހުމުންކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމު ވަނީ ތުހުމަތުކުރައްވާފަ އެވެ.

މިއަދު ކޮމިޓީން އިތުރަށް މި ބިލުގެ މަސައްކަތް ދަންމާލަން ނިންމުމުން ސަރުކާރުން މިކަން ކުރުމުގައި އިހުލާސްތެރިކަމެއް ނެތްކަން ހާމަވާކަމަށްބުނެ ގިނަ ބަޔަކު ދަނީ ފާޑު ކިޔަމުންނެވެ.