ހޮލީވުޑްގެ މަޝްހޫރު ލަވަކިޔުންތެރިޔާ އެރިއާނާ ގްރާންޑޭގެ އެންމެ ފަހު ފެނިލުމުގައި އޭނާގެ ހަށިގަނޑަށް އައިސްފައިވާ ބޮޑު ބަދަލުގެ ސަބަބުން ސަޕޯޓަރުން ކަންބޮޑުވެއްޖެ އެވެ.

މިފަހުން ބޭއްވި ޕްރޮމޯޝަނަލް އިވެންޓެއްގައި އެރިއާނާ ފެނިގެންދިޔައިރު އޭނާގެ ހަށިގަނޑު ވަނީ ވަރަށް ބޮޑަށް ހިކި އަނަރޫފަ ވެފަ އެވެ. އެ ފޮޓޯޝޫޓުގައި އޭނާއާއެކު މަސައްކަތްކުރި އެހެން ތަރިންނާއެކު ފޮޓޯ ނަގާފައިވާއިރު ހަށިގަނޑުގެ އަނަރޫފަކަން މީޑިއާއަށް ވަރަށް ބޮޑަށް ފާހަގަވި އެވެ.

އެއާއެކު އާއްމުން ވަނީ އެރިއާނާގެ ސިއްހަތާމެދު ކަންބޮޑުވުން ފާޅުކުރަން ފަށާފަ އެވެ. އެގޮތުން ކުޑަ ދުވަސްކޮޅެއްގެ ތެރޭގައި ހަށިގަނޑަށް އެހާބޮޑު ބަދަލެއް އަންނާނީ ސިއްހީ މައްސަލައެއްގެ ސަބަބުން ކަމަށް ގިނަ ބަޔަކު ބުނެ އެވެ.

މީގެ އިތުރުން ބައެއް މީހުން އަންނަނީ އޭނާގެ ހަށިގަނޑަށް އެހާ ބޮޑު ބަދަލެއް އައުމުގެ ފަހަތުގައި ވަނީ ޒާތީ ދިރިއުޅުމުގައި ކުރިމަތިވަމުން އަންނަ ކަންތައްތައް ކަމަށް ވެސް ބުނަމުންނެވެ.

އެރިއާނާ އެންމެ ފަހުން ފެނިގެން ގޮސްފައިވަނީ މިފަހުން ރިލީޒް ކުރެވުނު ފިލްމު "ވިކެޑް"އިންނެވެ. އެ ފިލްމަށް އާއްމުންގެ ބޮޑު ތަރުހީބެއް އަންނަނީ ލިބެމުންނެވެ.