ވަޒީފާއަށް ދާ ކޮންމެ މީހަކަށް ވެސް ކުރެވޭ އިހުސާސެއް އޮވެ އެވެ. ބައެއް ދުވަސް ދުވަހު ވަޒީފާއަށް ދާން ފޫހިވާ ގޮތްވެ އެވެ. އެފަދަ ދުވަސް ދުވަހު ރަނގަޅަށް މަސައްކަތް ވެސް ނުކުރެވެ އެވެ.

ޗައިނާގެ ކުންފުންޏަކުން މިވަނީ އެ ކުންފުނީގެ މުވައްޒަފުންނަށް މިކަމަށް ހައްލެއް ހޯދައިދީފަ އެވެ. ޕެންގް ޑޮންގް ލައި ރީޓެއިލް ކުންފުނިން ވަނީ "އަންހެޕީ ލީވް"ގެ ނަމުގައި ޗުއްޓީއެއް ތައާރަފް ކޮށްފަ އެވެ.

އެ ކުންފުނީގެ ފައުންޑަރު އަދި ޗެއާމަން ވިދާޅުވީ ކޮންމެ މުވައްޒަފަކަށް ވެސް "އަންހެޕީ ލީވް"ގެ ގޮތުގައި ކޮންމެ އަހަރަކު 10 ދުވަސް ލިބޭނެ ކަމަށެވެ.

"މިކަމުގެ މަގްސަދަކީ މުވައްޒަފުންނަށް އުފާވެރި މަސައްކަތުގެ މާހައުލެއް ގާއިމްކޮށްދީ ރަނގަޅު މަސައްކަތް ކުރަން ހިތްވަރު ދިނުން" އޭނާ ވިދާޅުވި އެވެ.

މިއަހަރުގެ އޭޕްރީލް މަހު މި އުސޫލަށް އަމަލު ކުރަން ފަށާފައިވާއިރު އޭގެ ފަހުން މުވައްޒަފުންގެ މަސައްކަތުގެ ފެންވަރު ބޮޑުތަނުން ރަނގަޅުވެފައިވާ ކަމަށް އެ ކުންފުނިން ބުނެ އެވެ.

މި އުސޫލު ތައާރަފް ކުރުމާއެކު ސޯޝަލް މީޑިއާގައި އެ ކުންފުންޏަށް ގިނަ ބަޔަކު ތައުރީފު ކުރި އެވެ. ބައެއް ކުންފުނިތަކުން އެ އުސޫލު ބޭނުން ކުރަން ވެސް ދަނީ ވިސްނަމުންނެވެ.