މިއަދު ހެނދުނުން ފެށިގެން ނ. ހެނބަދޫއަށް ބޯކޮށް ވާރޭ ވެހި ފެންބޮޑުވުމުގެ ސަބަބުން 75 ގެއަކަށް ގެއްލުން ލިބިފައިވާ ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނެފި އެވެ.

އެރަށުގެ ގިނަ ގެތަކަށް ފެން ވަނުމުގެ ސަބަބުން ވަނީ ގެތަކުގައި ހުރި ހިފާގެންގުޅޭ ސާމާނަށް ބޮޑެތި ގެއްލުންތަކެއް ވެފަ އެވެ.

މިއަދު ކުރަމުންދާ ވިއްސާރައިގައި ނ. ހެނބަދޫއަށް ބޯކޮށް ވާރޭ ވެހި ފެންބޮޑުވެފައި --- ފޮޓޯ: އެންޑީއެމްއޭ

އެ ރަށު ކައުންސިލުން ބުނީ ހެނދުނު 6:30އިން ފެށިގެން 11:00 ޖަހަން ދެން ހުއްޓާނުލާ އެރަށަށް ވަރަށް ބޯކޮށް ވާރޭ ވެހުނު ކަމަށެވެ. އަދި އެރަށުން ފެން ހިންދުމުގެ މަސައްކަތް އެމްއެންޑީއެފާއި ފުލުހުންނާއި އާންމު ރައްޔިތުން ގުޅިގެން ކުރަމުން އަންނަކަމަށް ކައުންސިލުން ބުންޏެވެ.

ހެނބަދޫ ގެއެއްގެ ގޯތި ތެރޭގައި ފެންބޮޑުވެފައި --- ފޮޓޯ: އެމްއެންޑީއެފް

ލިބުނު ގެއްލުމުގެ ތަފްސީލު އެނގޭނީ ފެން ހިންދާ ނިމުމުން ކަމަށްވެސް ކައުސިލުން ބުންޏެވެ. މިހާރު ކުރަމުންދަނީ ފެން ވަދެފައިވާ ގެތަކުން ފެންހިނދުމުގެ މަސައްކަތެވެ.

ބޯކޮށް ވާރޭވެހި، ގުގުރާނެ ކަމަށް ލަފާކޮށް މޫސުމާ ބެހޭ ގައުމީ އިދާރާއިން ވަނީ މިއަދު 11:15 އިން ފެށިގެން 15:00ގެ ނިޔަލަށް ހއ. އަތޮޅުން އދ.އަތޮޅާ ހަމައަށް ރީނދޫ ސަމާލު ނެރެފަ އެވެ.

އިއްޔެގެ ވަގުތެއްގައި މެޓް އޮފީހުން ބުނެފައިވަނީ މިއަދުން ފެށިގެން ރާއްޖެ ކައިރީގައި އުފެދެމުންދާ ދެ ކޮޅިގަނޑުގެ އަސަރު ރާއްޖެއަށް ކުރާނެކަމަށެވެ. އެގޮތުން ވާރޭ ވެހުމާއެކު، ވައިގަދަވެ، ކަނޑުތައް ވަރަށް ގަދަވާނެކަމަށް ލަފާކޮށްފައިވެ އެވެ. އޭގެ އިތުރުން ބައެއް ސަރަހައްދުތަކަށް އުދައިގެ އަސަރު ކޮށްފާނެކަމަށްވެސް އެ އިދާރާއިން ލަފާކުރެ އެވެ.