އާރްޑީސީގެ ކުރީގެ މެނޭޖިން ޑިރެކްޓަރު މޫސާ އަލީ މަނިކު ދިރިއުޅުއްވި ގެއިން ގިނަ އަދަދެއްގެ ނޮކިއާ ފޯނުތަކެއް ފުލުހުން ގެންދިޔަ ކަމަށް އޭނާ ވިދާޅުވެއްޖެ އެވެ.

ފޭސްބުކުގައި މޫކޭ މިއަދު ވަނީ ފުލުހުން އޭނާ ދިރިއުޅުއްވި ގެއިން ގެންދިޔަ ތަކެތީގެ ލިސްޓެއް އާންމުކުރައްވާފަ އެވެ. އެ ލިސްޓްގައިވާގޮތުން 20އަށް ވުރެ ގިނަ ނޮކިޔާ ފޯނު ފުލުހުން އެގެއިން ގެންދިޔަ އެވެ.

މޫކޭ ވިދާޅުވީ އެއީ ކެމްޕޭން ތެރޭގައި ކޯލްސެންޓަރުން ގިނަ މީހުންނަށް ގުޅުމަށް ބޭނުންކުރި ފޯނުތަކެއް ކަމަށެވެ. ދެން ފުލުހުން އެގެއިން ގެންދިޔައީ ސިމްކާޑަކާއި ގޭމިން ލެޕްޓޮޕެކެވެ.

ކޯޓު އަމުރެއްގެ ދަށުން މޫކޭ ދިރިއުޅޭ ގެ ބަލައި ފާސްކުރީ މިދިޔަ ބުރާސްފަތި ދުވަހުގެ ރޭ ދަންވަރުގެ ވަގުތެއްގަ އެވެ. މޫކޭގެ އިތުރުން އާރްޑީސީގެ ކުރީގެ ޗީފް ފައިނޭންޝަލް އޮފިސަރު ޔާސިރު ހަސަންން ދިރިއުޅުނު ގެއާއި އޭނައާ ގުޅުންހުރި ބައެއް ތަންތަން ވެސް ފުލުހުން ބަލައިފާސްކޮށްފައިވެ އެވެ.

ކުރީ ސަރުކާރުގެ ބައެއް ވެރިންނާއި އެމީހުންގެ މަސްހަލަތު އޮންނަ ކުންފުނިތަކަށް ރޯޑް ޑިވޮލޮޕްމެންޓް ކޯޕަރޭޝަން، އާރުޑީސީގެ ފައިސާތަކެއް ވަދެފައިވާކަމަށް ތުހުމަތުކުރެވޭ މައްސަލަ ދިވެހި ފުލުހުންގެ ޚިދުމަތުން ތަހުގީގުކުރަން ފެށީ މިދިޔަ އަހަރުގެ ނޮވެމްބަރު މަހު އެވެ. މިމައްސަލާގައި އެ ކުންފުނީގެ ވެރިއެއްގެ އެކަންޓަކަށް 14 މިލިއަން ރުފިޔާ ވަދެފައިވާ ކަމަށް ފުލުހުން ތުހުމަތު ކުރެ އެވެ.

މިމައްސަލާގައި ތިން މީހެއްގެ ބައިވެރިވުން އޮތްކަން ޔަގީންކުރެވިފައިވާ ކަމަށާއި އަދި އެތިން މީހުންގެ އަމިއްލަ އެކައުންޓުން ކުންފުނީގެ 14 މިލިއަން ރުފިޔާ ދައުރުކޮށްފައިވާކަމަށް ވެސް ފުލުހުން ބުނެފައިވެ އެވެ. އަދި މީގެ ތެރެއިން އެކެއްގެ އެކައުންޓަށް 11 މިލިއަން ރުފިޔާ އަދި އިތުރު ދެ މީހެއްގެ އެކައުންޓަށް 4 މިލިއަން ރުފިޔާ ޖަމާކޮށްފައިވާ ކަމަށް ބުނެ އެވެ.