މާލޭގެ މަޖީދީމަގުގެ ދެ ފަރާތުގައި ހުރި ކާނުތައް މުޅިން ސާފުކޮށް ނިންމާލައިފި އެވެ.
މި މަސައްކަތް ފެށީ މިދިޔަ މާޗު މަހުގެ 8 ވަނަ ދުވަހު އެވެ.
މަޖީދީމަގުގެ ލަގްޒަރީ ފިހާރަ ހުންނަ ސަރަހައްދުން ފެށި މި މަސައްކަތް ނިންމާލާފައި ވަނީ މި އޭޕްރީލް މަހުގެ 3 ވަނަ ދުވަހު ކަމަށް ޕަބްލިކް ވާކްސް މިނިސްޓްރީން ބުނެ އެވެ.
މާލޭގެ ކާނުތަކުގައި އެކި ބާވަތުގެ ކުނިބުންޏާއި، ވެއްޔާއި، ޖަނަވާރުތަކުގެ ނަޖިސް ފަދަ ތަކެތި ހުރުމުގެ ސަބަބުން ވާރޭ ވެހޭ މޫސުމުގައި މާލޭގައި އިންތިހާއަށް ފެންބޮޑުވެ އެތައް ބަޔަކަށް ބޮޑު ތަކުލީފަކާ ކުރިމަތިވެ އެވެ. އެއާއެކު މިކަމަށް ހައްލެއް ހޯދުމުގެ ގޮތުން އެ މިނިސްޓްރީން ވަނީ މާލޭގެ ހުރިހާ ކާނުތަކެއް ސާފުކުރުމުގެ މަސައްކަތް ފަށާފަ އެވެ.
ޕަބްލިކް ވާކްސް މިނިސްޓްރީން ބުނިގޮތުގައި މި މަސައްކަތް ކުރިއަށް ގެންދިޔައީ ފުލުހުންނާ ވެސް ގުޅިގެންނެވެ. އެގޮތުން، ކޮންމެ ދުވަހަކު ވެސް ސާފުކުރަން ހަމަޖެހިފައިވާ ސަރަހައްދުތަކުގައި މަސައްކަތް ފެށުމުގެ 24 ގަޑިއިރު ކުރިން ކޯނު ޖަހައި، އެ ސަރަހައްދުތަކުގައި ޕާކުކޮށްފައި ހުންނަ އުޅަނދުފަހަރު ނެގުމުގެ މަސައްކަތް ކުރިއަށް ގެންދިޔައީ ފުލުހުން ބުނެ އެވެ.