ޕްރިންސިޕަލްއެއް ފެނުމުން ދަރިވަރުން އެއްވެސް ޖެހިލުމަކާ ނުލައި ވާހަކަ ދައްކަން ކެރޭނީ އެ ޕްރިންސިޕަލެއްގެ ކިބައިގައި އެދަރިވަރުން ގަޔާވާ ގިނަ ސިފަތަކެއް ހުރުމުންކަން ޔަގީނެވެ. މިއީ އެފަދަ ޕްރިންސިޕަލެކެވެ. މާލޭގައި ކިޔަވައިދޭ އެންމެ ފެންވަރު ރަނގަޅު އެއް ޕްރީސްކޫލް ކަމަށް ގިނަ ބަޔަކު ގަބޫލުކުރާ ކެންގަރޫ ކިޑްސްގެ ހިންގުންތެރި ވެރިޔާ އެވެ.
އައިމިނަތު ތަހުމީނާ (ތަހޫ) ކިޔަވައި ދިނުމުގެ ދާއިރާއަށް ނުކުންނެވީ ކިޔަވައިދިނުމުގެ އެއްވެސް ތަޖުރިބާއެއް ނެތި އެވެ. އަމީނިއްޔާ ސްކޫލް ނިމުމަށްފަހު ބޭނުންވީ ކެބިންކުރޫއަކަށް ނޫނީ ޓީޗަރަކަށް ވާށެވެ. ނަމަވެސް އެންމެ ގާތްކޮށް އުޅުނު ކުދިން އައިޓީއީ (އިންސްޓިޓިއުޓް އޮފް ޓީޗާން އެޑިއުކޭޝަން) އާއި ގުޅުމުން އޭނާ ވެސް އެ ކޯހުގައި ބައިވެރިވުމަށް ނިންމެވި އެވެ. ޓީޗިންއަށް ހަގީގީ ޝައުގުވެރިކަމެއް އުފެދުނީ އެ ކޯސް ހެދި ދުވަސްވަރުގައިކަން އޭނާ ފާހަގަކުރައްވަ އެވެ. އުމުރުން އެންމެ 19 އަހަރުގައި ޓީޗިން ކޯސް ނިންމުމަށްފަހު ފުރަތަމަ އަދާކުރެއްވީ އިސްކަންދަރު ސްކޫލުގެ ޕްރައިމަރީ ޓީޗަރުކަމެވެ. ފުރަތަމަ ވެސް ކިޔަވައިދެއްވީ ގްރޭޑް 2 ގެ ކުލާހަކަށެވެ.
މަސައްކަތުގައި ހީވާގި ޓީޗަރެއް: ސްކޫލުގައި ގިނަ ވަގުތު ހޭދަކުރުމަށް އެއްވެސް ހުރަހެއް ނެތް
އިސްކަންދަރު ސްކޫލުގައި ކިޔަވައިދިނުމުގެ އިތުރުން އެ ސްކޫލުގެ ގިނަ ހަރަކާތްތަކެއްގައި ވެސް އަމަލީގޮތުން އޭނާ ބައިވެރިވެ ވަޑައިގަތެވެ. ޚާއްސަކޮށް ސްކައުޓިން ހަރަކާތަކީ ވަރަށް ޝައުގުވެރިވި ހަރަކާތެއް ކަމަށް ތަހޫ ވިދާޅުވި އެވެ. އެގޮތުން ރާއްޖެއާއި ރާއްޖޭން ބޭރުގައި ވަރަށް ގިނަ ޖަމްބޮރީތަކުގައި ވެސް ބައިވެރިވެފައިވެ އެވެ. ފަހުން ޒަވާޖީ ހަޔާތެއް ފަށައި ފުރަތަމަ ދަރިފުޅު ލިބުނު ނަމަވެސް ސްކޫލްގެ ކަންކަމުގައި ބައިވެރިވެ އުޅުމަށް، އާއިލާގެ އެއްބާރުލުމާއެކު އެއްވެސް ބަދަލެއް ނާދެ އެވެ.
ދެހާސް ވަނަ އަހަރު ދޮށީ ދަރިފުޅު އިމާދުއްދީން ސްކޫލް ގްރޭޑް 1އަށް ބަދަލުވުމުން، ދަރިފުޅުގެ ކިޔެވުމުގެ ކަންކަން ގާތުން ބެލެހެއްޓުމުގެ ބޭނުމުގައި އިމާދުއްދީން ސްކޫލަށް ބަދަލުވެ ފުރަތަމަ ފަހަރަށް ގެރޭޑް 1އަށް ކިޔަވައި ދިނުމަށް ފުރުސަތު ލިބުނެވެ. އެ އަހަރު ތަހޫ ސިފަކުރެއްވީ އެންމެ "ބެސްޓް" އަހަރުކަމުގަ އެވެ.
"އެއަހަރު ގްރޭޑް 1 ފެށި ކުދިންތަކަކަށް ރަނގަޅު ބިންގާއެއް އަޅައިދެވުމުގެ ސަބަބުން އަހަރު ނިމުނު އިރު އެކުދިންނަށް އައި ބަދަލު ފެނިފައި އަމިއްލައަށް ވަރަށް ފަޚުރުވެރި ވެވުނު،" ތަހޫ ވިދާޅުވި އެވެ.
އިމާދުއްދީނުގައި މަސައްކަތް ކުރެއްވި ދެވަނަ އަހަރު އޭނާގެ ގާބިލްކަމާއި ލީޑާޝިޕް ފެނި އެ ސްކޫލުގެ ސުޕަވައިޒަރުގެ (ލީޑިން ޓީޗަރެއްގެ) މަގާމަށް ބަދަލު ކުރި އެވެ. އޭގެ އަހަރުތަކެއް ފަހުން، 2006 ގައި މުހިންމު އާއިލީ ޒިންމާއެއް އަދާކުރުމަށްޓަކައި ކިޔަވައިދިނުމުގެ ދާއިރާއާ ވަކިވެ، އަވަށްޓެރި ސްރީލަންކާއަށް ދިރިއުޅުން ބަދަލުކުރަން ޖެހިވަޑައިގަތެވެ. އޭގެ ފަސް އަހަރު ފަހުން 2010ގެ ފަހުކޮޅު ރާއްޖެ ވަޑައިގަތުމާއެކު، 2011 ގައި އިމާދުއްދީން ސްކޫލުގައި ކުރިން އަދާކުރެއްވި ވަޒީފާ އަނެއްކާ ވެސް ހަމަޖެހިގެން ދިޔަ އެވެ. ވަރަށް ޝައުގެވެރިކަމާއި ހީވާގިކަމާއެކު އަނެއްކާ ވެސް މަސައްކަތް ކުރައްވަން ފެއްޓެވި އެވެ. ނަތީޖާއެއްގެ ގޮތުން އޭގެ ހަތަރު އަހަރު ފަހުން 2014 ވަނަ އަހަރުގައި އިމާދުއްދީން ސްކޫލުގެ ޑެޕިއުޓީ ޕްރިންސިޕަލްކަން ލިބިވަޑައިގަތެވެ.
"ޑެޕިއުޓި ޕްރިންސިޕަލެއްގެ ގޮތުގައި ހުއްޓައި، އެ ސްކޫލްގެ ޕްރިންސިޕަލްގެ މަގާމު ހުސްވި ދަނޑިވަޅެއްގައި މިނިސްޓްރީން އަޅުގަނޑު ބަދަލުކުރީ އިމާދުއްދީންގެ އެކްޓިން ޕްރިންސިޕަލްގެ މަގާމަށް. އެ މަގާމުގައި ހުރެފައި ދެން އަޅުގަނޑު މެލޭޝިއާއަށް ބަދަލުވާން ޖެހުނު. އެވެސް އާއިލީ ޒިންމާއެއް އަދާކުރުމަށްޓަކައި. އެ ދުވަސްކޮޅު މެލޭޝިޔާގައި ހުރެ ނޮޓިންހަމް ޔުނިވާސިޓިގައި މާސްޓާސް އިން އެޑިއުކޭޝަނަލް ލީޑާޝިޕް އެންޑް މެނޭޖްމަންޓް ކޯސް ފުރިހަމަ ކުރިން،" ތަހޫ ވިދާޅުވި އެވެ.
މެލޭޝިއާގައި ކިޔަވަމުންދިޔަ ދުވަސްވަރު އައިލެންޑާސް އެޑިއުކޭޝަންސްގެ ފަރާތުން ކެންގަރޫ ކިޑްސް ޕްރީ ސްކޫލުގައި މަސައްކަތް ކުރުމަށް ދައުވަތެއް ލިބުނެވެ. ނަމަވެސް މުޅިން ވެސް ޕްރައިމަރީ ގްރޭޑްތަކުގައި މަސައްކަތް ކޮށްފައި ވާތީ ފުރަތަމަ އެ ދައުވަތު ގަބޫލުކުރުމަށް ފަސްޖެހުނު ކަމަށް ތަހޫ ވިދާޅުވި އެވެ.
"އައިލެންޑާސް އެޑިއުކޭޝަންސްގެ އޭރުގެ އެކަޑެމިކް ހެޑް ޖުވޭރިޔާ އިބްރާހިމްއަކީ އަޅުގަނޑުގެ ޕްރިންސިޕަލެއްގެ ގޮތުގައި ކުރިން މަސައްކަތް ކުރެއްވި ބޭފުޅެއް. ވަރަށް އިޙްތިރާމް ކުރާ ބޭފުޅެއް އެއީ. އެ ފުރުސަތު ލިބުމުން ހިތަށް އެރި އަޅުގަނޑުގެ ޕްރީސްކޫލް ބެކްގްރައުނޑެއް ނެތީމައި ޕްރީސްކޫލްއެއް ހިންގާކަށް ނޭނގޭނެޔޭ،" ތަހޫ ވިދާޅުވި އެވެ.
ކެންގަރޫ ކިޑްސް: ތަފާތު ދައްކާ ތަފާތު ކިޔެވުމުގެ މާހައުލެއް
މީގެ ކުރިން ފްރެންޗައިސް އުސޫލުން ރާއްޖޭގައި ހިންގި ކެންގަރޫ ކިޑްސް މިހާރު ހިންގަނީ އައިލެންޑާސް އެޑިއުކޭޝަންސް އާއި އިންޑިއާގެ ލައިޓްހައުސް ލާނިން ގުޅިގެން އެ ދެފަރާތުގެ ދެމެދުގައިވާ އެއްބަސްވުމެއްގެ ދަށުންނެވެ. ލައިޓް ހައުސް ލާނިންއަކީ އިންޑިއާގެ ވަރަށް މަޝްހޫރު ޕްރައިވެޓް އެޑިއުކޭޝަން އިންސްޓިޓިއުޓްއެކެވެ. އެ ކުންފުނީގެ ދަށުން ހިންގާ 11 ބްރޭންޑްގެ ސްކޫލްވެ އެވެ. ކެންގަރޫއަކީ އޭގެ ތެރެއިން އެއްބްރޭންޑެވެ.
އެ ސްކޫލުގެ ކަރިކިއުލަމް ޑިޒައިން ކުރަނީ އިންޑިއާއިންނެވެ. އެއީ ކުދިންނާ ރައްޓެހި އެ ކުދިންނާ ވަރަށް ގުޅޭގޮތަށް ހެދިފައިވާ އެއްޗެކެވެ. ވަޒީފާގެ މައިދާނަށް ނުކުންނައިރު ބޭނުންވާނެ ކަމަށް ރިސާޗުގެ އެހީގައި ހޯދިފައިވާ، ކުދިންގެ މުސްތަގުބަލް ބައްޓަން ކުރަން ބޭނުންވާނެ 9 ހުނަރާއި 15 އާދަ އެކަރިކިއުލަމްގައި ހިމަނާފައިވެ އެވެ.
"އަޅުގަނޑުމެން ކިޔަވައިދިނުމުގައި ބޭނުންކުރަނީ ސްޓޭޝަން ރޮޓޭޝަން މޮޑިއުލް. މިއީ ކިޔަވައިދިނުމުގައި ބޭނުންކުރެވޭ މުޅިން އާ ގޮތެއް. ތަފާތު އެކި އެކްޓިވިޓީސް ހުންނަ ތިން ހަތަރު ސްޓޭޝަނަކަށް ކްލާސް ރޫމް ތެރޭ ބެހިފައި މި އިންނަނީ. ކޮންމެ ސްޓޭޝަނެއްގައި ޓީޗަރެއް ވެސް ހުންނާނެ. ކުދިންވެސް ތިން ހަތަރު ގްރޫޕްއަކަށް ބަހާލައިގެން ފަހަރަކު ސްޓޭޝަނަކަށް ގޮސް އެ ހުންނަ އެކްޓީވިޓީސް ފުރިހަމަ ކުރަމުންދާ ގޮތަށް ހުންނާނީ. ޓީޗަރުން ތިބޭނީ ވަކިވަކިން ކުދިންނަށް އެހީވާން، ގައިޑްކޮށްދޭން. ކުދިން ލައްވައި ސުވާލުކުރަން ދަސްކޮށްދޭން. ކުދިންގެ ވިސްނުން ތަރައްގީ ކުރަން. އެގޮތަށް ހެދީމައި ކުދިން ކިޔެވުމުގައި އަމިއްލައަށް ޒިންމާ ނަގަން ދަސްވޭ،" ތަހޫ އޮޅުން ފިލުވައިދެއްވި އެވެ.
ކެންގަރޫ ކިޑްސް ގިނަ ގޮތްގޮތުން ތަފާތު: އާ ކަންކަމަށް ސިކުނޑި ހުޅުވާލާ
ޕްރީ ސްކޫލް ޕްރިންސިޕަލެއްގެ ހައިސިއްޔަތުން ތަހޫއާ ހަވާލުވެފައިވާ މައްސޫލިއްޔަތު ބޮޑެވެ. އޭގެ ތެރޭގައި ހިމެނެނީ ވަކި މިންގަނޑުތަކެއް ދެމެހެއްޓުމެވެ. އެންމެ ފެންވަރު ރަނގަޅު ޚިދުމަތެއް ދިނުމެވެ. މީގެ އިތުރުން ވެސް ކުދިން އުޅޭ ގޮތް ބެލުމާއި، ކްލާސްތަކަށް ރައުންޑަށް ދިޔުމާއި، ކިޔަވައިދޭ ގަޑީގައި ގޮސް ކުލާސް ކުރިއަށް ގެންދާގޮތް ބެލުމެވެ. އަދި ޓީޗަރުންނަށް ފީޑްބެކް ދިނުމެވެ. ގަތްގަނޑަކަށް 11 ގަޑިއިރު ސްކޫލުގައި ހޭދަކުރައްވާއިރު އަބަދުވެސް ކަމެއް ގޯސްވެދާނެތީ ވިސްނޭ ކަމަށް އޭނާ ވިދާޅުވި އެވެ.
"ބެލެނިވެރިން އުންމީދު ކުރާފަދަ ޚިދުމަތެއް ދެވޭތޯ އަޅުގަނޑުމެން އަބަދުވެސް މަސައްކަތްކުރަން. ހުރިހާ ސްޓަފުންނަށް ވެސް އެކަން އަންގާފައި އޮންނާނީ. އަދި އެލެވެލްއަށް އެސްޓޭންޑަޑަށް އެކޮލިޓީ ހިފަހައްޓަން ވަރަށް ބައިވަރު މަސައްކަތްތަކެއް ކުރަން. ދުރާލާ ގިނަ ތައްޔާރީތައް މިހާރު ވެސް ވަމުން މިދަނީ. އެއް އަހަރުކުރީގައި އަޅުގަނޑުގެ ވިސްނުން ގެންގުޅެން. އެކަޑެމިކް އަހަރު ފެށުމުގެ 6 މަސް ކުރިން، ކުރިއަށް އިންނަ އަހަރުގެ ރޭވުންތައް ރާވައި ނިންމަން،" ތަހޫ ވިދާޅުވި އެވެ.
އޭނާ ވިދާޅުވިގޮތުގައި ތިން ސެޝަނަށް ކުރިއަށް ގެންދާ ކެންގަރޫ ކިޑްސްގައި ހަތަރު ލެވެލްއެއްގެ ކުދިން ތިބެ އެވެ. އެއީ އެއް އަހަރާއި ދިހަ މަސްވުމުން ވައްދާ ޕްލޭ ސްކޫލްއާއި، ނާސަރީ، ޖޫނިއާ އަދި ސީނައާ ކިންޑާ ގާޑްން އެވެ.
އެ ސްކޫލްގައި އޮންނަނީ ކުދިންގެ ހެލިފެލިވެ އުޅުމަށް ބާރުއަލާ މާހައުލެކެވެ. އެ ކުދިން އެއްތަނެއްގައި އިށީންދެގެން 20 މިނަޓަށް ވުރެ ގިނަ އިރު ނުތިބޭނެ ކަމަށް ތަހޫ ވިދާޅުވި އެވެ. ޕްލޭ ގްރައުންޑްގައި ކޮންމެ ދުވަހަކު ވެސް ކުދިން ނުކުމެ ކުޅުން އޮވެ އެވެ.
"ޕްލޭ ގްރައުންޑް ގަޑި ޝެޑިއުލްކުރެވިފައި އިންނާނީ އެއް ލެވެލްއެއްގެ ކުދިން ބައްދަލުވެ ކުޅެވޭ ގޮތަށް. އެކި ލެވެލް މަސްހުނި ނުވާގޮތަށް،" ތަހޫ ވިދާޅުވި އެވެ.
ގޭޓުން ރިސީވްކުރުން: ކުދިން ސްކޫލަށް އަންނަ ގަޑީގައި ހިނގާ ވަރަށް ޚާއްސަކަމެއް
ކެންގަރޫ ކިޑްސްގައި ތިން ސެޝަނަށް ކިޔަވައިދެވޭއިރު ކޮންމެ ސެޝަންއެއް ފަށާއިރު އާއި ކުދިން ގެއަށް ދާގަޑީގައި ގޭޓް ކައިރީގައި ކުދިންނާ ދިމާވެ، ބެލެނިވެރިންނާ ވާހަކަ ދެކެވެ އެވެ. އެ ވަގުތުގައި ކުދިންގެ އިތުރުން ބެލެނިވެރިންނާ ވެސް ވަރަށް ގާތް ގުޅުމެއް އުފެދޭ ކަމަށް އޭނާ ވިދާޅުވި އެވެ.
ބެލެނިވެރިންނާ ދިމާވެ އެކި ކަންކަމާއި އެ ވަގުތު ވާހަކަ ދެކެވި، ގިނަ ކަންކަން ބޮޑެތި މައްސަލަތަކަށް ނުވެ ހައްލު ވެސް ކުރެވެ އެވެ. ކުދިން ރިސީވް ކުރަން ހުރުމަކީ ވެސް އޭނާއަށް ލިބޭ ވަރަށް ބޮޑު އުފަލެއް ކަމަށް ވެސް ވިދާޅުވި އެވެ.
"ކުދިން ދޮރުމަތިން އަހަން ފަށާނެ ވެއާސް ދަ ޕްރިންސިޕަލް (ޕްރިންސިޕަލް ކޮބައިހޭ؟). މީޓިންއެއްގެ ސަބަބުން ރިސީވްކުރަން ނުހުރެވޭ ދުވަހެއްނަމަ، މީޓިން ނިންމާލާފައި ކްލާސް ރައުޑަށް ދާއިރު ވެސް ހަމަ އެ ޝަކުވާ ކުރާނެ. އަހާނެ ކީއްވެހޭ ގޭޓް ކައިރީ ނުހުރީ. ހެދުނު ހުރެފެ ކަމެއް ދިވާވެގެން މެންދުރު ނެތަސް އެ ސުވާލު އަންނާނެ. ހޯދަން ވެސް އަންނާނެ. ވަރަށް ލޯބިކޮށް އުޅޭނީ،" ތަހޫ ވިދާޅުވި އެވެ.
އިޤްގާ ކަރިކިއުލަމް: އިސްލާމް، ދިވެހި، ގުރުއާން ކިޔަވައި ދިނުމަށް ޚާއްސަ މަސައްކަތްތަކެއް ކުރެވޭ
ކެންގަރޫ ކިޑްސްގައި އިސްލާމް، ގުރުއާން އަދި ދިވެހި މާއްދާ ކިޔަވައި ދެވެނީ އައިލެންޑާސް އެޑިއުކޭޝަނުން ތައްޔާރުކޮށްފައި އޮންނަ އިޤްރާ ކިޔާ ކަރިކިއުލަމަކަށެވެ. އެއީ ކެންގަރޫ ކިޑްސްގެ ތީމެޓިކް ކަރިކިއުލަމާއި ދާދިއެއް ގޮތަކަށް ޑިޒައިން ކުރެވިފައިވާ އެއްޗެކެވެ.
"ތީމެޓިކްވުމުގެ ފައިދާއަކީ ކޮންމެ މަހެއްގައި ކުދިން ދަސްކުރަމުން ގެންދާނެ އެމަހަކަށް ޚާއްސަވެފައިވާ ތީމްގައި ހިމެނޭ ހުރިހާ ކަމެއް. ކްލާސް ރޫމްގެ ހަރަކާތްތަކުގެ އިތުރުން ޚާއްސަ ދުވަސް ދުވަސް ފާހަކުރުން އޮންނާނެ. އެފަދަ ދުވަސްދުވަހު ޚާއްސަ މެހެމާނަކު ސްކޫލަށް ޒިޔާރަތްކޮށް ކުދިންނަށް މައުލޫމާތު ދެއްވުން ހިމެނޭ،" ތަހޫ އިތުރަށް އޮޅުންފިލުވައިދެއްވި އެވެ.
ކޮންމެ ދުވަހަކީ ވެސް ގުރުއާން، އިސްލާމް އަދި ދިވެހި މާއްދާ ކިޔަވާ ދުވަހެކެވެ. އެ މާއްދާތަށް ކިޔަވައި ދިނުމަށް ކޮލިފައިޑް ޓީޗަރުން ވެސް ތިބެ އެވެ. އެކަމުގެ ނަތީޖާ ވެސް އަންނަނީ ފެންނަމުން ކަމަށް ތަހޫ ވިދާޅުވި އެވެ.
"ފަލާހް ގުރުއާން މުބާރާތުގައި ކެންގަރޫ ކިޑްސް މިދިޔަ އަހަރު ގެނައި ތިންވަނަ، މިއަހަރު ވެސް ތިންވަނަ. ގިނަ ސްކޫލްތަކެއްގެ ތެރެއިން ހޮވާލެވިގެން ކެންގަރޫ ކިޑްސް އިން ބައިވެރިވާ ކުދިންނަށް ވަނަ ލިބޭނީ މިކޮޅުގައި ޤުރުއާން ކިޔަވައިދެވޭތީ ކަމުގައި ގަބޫލުކުރެވޭ،" އޭނާ ވިދާޅުވި އެވެ.
ކިޔަވައިދިނުމުގެ ދާއިރާގައި 30 އަހަރަށް ވުރެ ގިނަދުވަސް ވެފައިވާއިރު ކޮންމެ ދުވަހަކީ ވެސް އޭނާ މަސައްކަތުގައި އުޅޭ ދުވަހެއް ކަމަށް ހަދަ އެވެ. ކިޔަވައި ދިނުމުގެ ދާއިރާއަށް ނުކުންނަ ކުދިންނަށް ވެސް އޭނަ ދެއްވާ ނަސޭހަތަކީ ޝައުގުވެރިކަން ހުރެގެން ނޫނީ ކިޔަވައިދިނުމުގެ ދާއިރާއަށް ނުނިކުތުމަށެވެ.
ކިޔަވައިދިނުމުގެ ދާއިރާގައި ބުރަކޮަށް އުޅުއްވާއިރު އޭނާގެ ފެމެލީގެ އެއްބާރުލުމާއި އެހީ ވަރަށް ބޮޑަށް ލިބޭކަން ވެސް ފާހަގަ ކުރެއްވި އެވެ. އެއީ ކުދިން އެންމެ ކުޑައިރުވެސް ދުވަހަކު ވެސް ސްކޫލްއަށް ދާން ބޭނުން ވެގެން ނުދެވިފައިނެތުމެވެ. އެކަމަށްޓަކައި އޭނާގެ އާއިލާއަށް ވަރަށް ބޮޑަށް ހިތުގެ އެންމެ ފުންމިނުން ޝުކުރު އަދާކުރައްވަ އެވެ. އޭގެ އިތުރުން ފިރިމީހާގެ އެއްބާރުލުން ވެސް ވަރަށް ބޮޑަށް ލިބޭ ކަމަށާއި ސްކޫލުގައި ކިތަންމެ ގިނައިރުވި ނަމަވެސް އެކަން ނުހުއްޓުވާ ކަމަށެވެ.
އޭނާގެ ބިޒީ ދިރިއުޅުމުން އޭނާގެ ދަރިން މިސާލު ލިބިގެނެފައިވާކަން ފާހަގަކުރަމުން ވިދާޅުވީ އެ ކުދިން ވެސް ވީ ވަޒީފާގައި ވަރަށް އިޚްލާސްތެރި މަސައްކަތްތެރި ކުދިންނަށް ކަމަށެވެ. އަދި އެކަމާ މިއަދު ވަރަށް ފަޚުރުވެރިވާކަމަށް ތަހޫ ވިދާޅުވި އެވެ.
