އީދުގެ ޗުއްޓީއަށް ފަހު، ސަރުކާރުގެ އޮފީސްތައް މާދަމާއިން ފެށިގެން އަލުން ހުޅުވުމަށް ހަމަޖެހުނަސް، ދިރާސީ އައު އަހަރުގެ ކިޔެވުން ފެށުމަށް ހަމަޖެހިފައި ވަނީ އަންނަ ހަފުތާގެ ހޯމަ ދުވަހު އެވެ.

މި ދިގު ޗުއްޓީއާއެކު، ސަރުކާރުގެ މުވައްޒަފުންނަށް ދެ ހަފުތާގެ ބަންދެއް ލިބިފައިވެ އެވެ.

ސްކޫލްތަކުގެ ބޮޑު ޗުއްޓީ ފެށުނީ ފެބްރުއަރީ 27 ގައި ކަމަށްވާއިރު، މި 40 ދުވަހުގެ ޗުއްޓީއަށްފަހު، އާންމު އުސޫލާ ހިލާފަށް މިފަހަރު ކިޔެވުން ފަށާނީ އާދީއްތަ ދުވަހުގެ ބަދަލުގައި ހޯމަ ދުވަހު އެވެ. ނަމަވެސް، މުދައްރިސުން މިހާރު ވަނީ މަސައްކަތަށް ނުކުންނަން ފަށައިފަ އެވެ.

އެޑިއުކޭޝަން މިނިސްޓްރީގެ ކަލަންޑަރުގައިވާ ގޮތުން، ފުރަތަމަ ޓާމުގެ ޗުއްޓީ ފެށޭނީ ޖުލައި 24 ގައި ކަމަށާއި، ދެވަނަ ޓާމު ފެށޭނީ އޮގަސްޓު 10 ގަ އެވެ. މި އަހަރުގެ ދިރާސީ އަހަރު ނިމޭނީ ޑިސެންބަރު 28 ގަ އެވެ.

އެ ކަލަންޑަރުގައިވާ ގޮތުން، މިއަހަރުގެ ބޮޑު ޗުއްޓީ ލިބޭނީ ޑިސެންބަރު 28 އިން ޖެނުއަރީ 27، 2026 އަށެވެ. އަންނަ އަހަރުގެ ބޮޑު ޗުއްޓީ އެއްކޮށް ޑިސެންބަރުގައި ލިބޭނެ ކަމަށް އެ މިނިސްޓްރީން ކުރިން ބުނެފައިވެ އެވެ.