ވޯޓް ގުނާލަން ވެސް ފުރުަސަތު ނުދީ ގައުމީ މަޖިލިސް ޖަލްސާގެ ތެރޭގައި އަޑުގަދަ ކޮށް ހަލަބޮލިކޮށް، ގަޑުބަޑުކޮށްލީ ސީދާ ގަސްދުގައި ޗެއާޕާސަންގެ މަގާމަށް އަބްދުﷲ ވަހީދު ބޮޑުތަނުން ހޮވުމުން ކަމަށާއި އެކަން ކުރީ ވަކިބަޔަކަށް އެކަން ގަބޫލުކުރަން އުނދަގޫވެ، ހަޖަމް ނުވުމުން ކަމަށް އެމްޑީޕީގެ ހަރަކާތްކުގައި އިސްކޮށް އުޅުއްވާ މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވިދާޅުވެއްޖެ އެވެ.

އެމްޑީޕީގެ ޗެއާޕާސަންގެ މަގާމުން ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް އިސްތިއުފާ ދެއްވާފައި ވަނީ މިމަހުގެ 23 ވަނަ ދުވަހުގައި އެމްޑީޕީ ގައުމީ މަޖިލީހުގެ ޖަލްސާއެއްގެ ތެރެއިންނެވެ. ފައްޔާޒް އިސްތިއުފާ ދެއްވުމަށް ފަހު އެ ޕާޓީގެ ޗެއާގެ މަގާމު ވަނީ ހުސްވެފަ އެވެ. އެގޮތުން އެމްޑީޕީގެ ވަގުތީ ޗެއާޕާސަނަކު ހޮވަން ހުކުރު ދުވަހުގެ ރޭ ވަނީ އެ ޕާޓީގެ ގައުމީ މަޖިލީހުގެ ޖަލްސާއެއް ބާއްވާފަ އެވެ. އެ ބައްދަލުވުން އޮތީ ސިއްރުކޮށްފަ އެވެ. ނަމަވެސް އެ ބައްދަލުވުން ހޫނުވެ، އެ މާގަމަށް މީހަކު ހަމަޖެއްސޭނެ ގޮތެއް ނުވުމުން ވަނީ ބައްދަލުވުން ނިންމާލާފަ އެވެ.

ޖަލްސާގައި ވަގުތީ ޗެއާޕާސަންއަކަށް ތިން މެންބަރެއްގެ ނަން ހުށަހަޅައި ތާއީދު ލިބުނެ އެވެ. އެއީ ރައްޔިތުންގެ މަޖިލީހުގެ ކުރީގެ ރައީސް މުހައްމަދު އަސްލަމް އާއި ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދާއި ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ އެވެ.

އެ ބޭފުޅުންގެ ތެރެއިން އަސްލަމްގެ ނަމަށް ވޯޓަށް އަހަން ރިޔާސަތުގައި އިންނެވި ޑެޕިޔުޓީ ޗެއާޕާސަން އިބްރާހިމް ވަހީދު ވަނީ ދެކޮޅު ހަދައިފަ އެވެ. އޭނާ ވިދާޅުވީ ވަގުތީ ޗެއާޕާސަނެއް އައްޔަން ކުރަން ޖެހޭނީ ގައުމީ މަޖިލީހުގެ މެންބަރުންގެ ތެރެއިން ކަމަށެވެ.

ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދަށް ތާއީދު އޮތްތޯ ބަލަން ނެގި ވޯޓުގައި ހާޒިރުވި 96 މެންބަރުންގެ ތެރެއިން 47 މެންބަރުން ފެންނަ ކަމަށް ވޯޓު ދެއްވި އެވެ. ނަމަވެސް އޭނާ އެ މަގާމަށް އައްޔަންކުރަން ފެންނަ ވަރަށް ވޯޓު ނުލިބޭ ކަމަށް ރިޔާސަތުން ނިންމި އެވެ.

އަސްލަމްގެ ނަމަށް ވޯޓަށް ނޭހުމުންނާއި ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު ޗެއާޕާސަން ކަމަށް ނޮހޮވޭ ކަމަށް ނިންމުމުން ޖަލްސާ ހޫނުވެ މެންބަރުން ވަނީ ނުކުމެގެން ގޮސްފަ އެވެ.

މިކަމާ ގުޅީގެން ވަރަށް ބޮޑަށް ހިތްހަމަޖެހިވަޑައިނުގެން ރާއީ ވަނީ އެކްސްގައި ކުރެއްވި ޕޯސްޓުގައި ވިދާޅުވީ އެ ވޯޓުން ވަހީދު ހޮވުމުން އެކަން ހަޖަމް ނުވާ ބަޔަކު ވޯޓު ގުނާލަން ވެސް ފުރުސަތު ނުދީ މުޅި ޖަލްސާ ތެރޭގައި އަޑުގަދަކޮށް ގަޑުބަޑުކޮށްލީ ކަމަށެވެ. އަދި ވޯޓުން ވަހީދު ކާމިޔާބު ކުރެއްވިކަން އެއީ ޖަލްސާގައި ތިބި އެންމެންނަށް ވެސް ވަރަށް ސާފުކޮށް އެނގޭ ކަމެއް ކަމަށް ވެސް އޭނާ ވިދާޅުވި އެވެ.

"ވޯޓް ގުނާލަން ވެސް ފުރުސަތު ނުދެއްވާ، އަޑުގަދަކޮށް ހަލަބޮލިކޮށްލީ ސީދާ ގަޑުބަޑު ކޮށްލީ، ވަހީދު ބޮޑުކޮށް ނެގިކަން ހުރިހާ ބޭފުޅުން ވެސް ގަބޫލު ކުރޭ، ހަގީގަތަކީ، ހައިބަތު ބޮޑު މާބޮޑެތި މަގާމުތައް ފުރުއްވާފައިވާ، ބޭފުޅަކު މާބޮޑުތަނުން ގމ [ގައުމީ މަޖްލިސް]ގެ ވޯޓަކުން ބަލިވި ބަލިވުން ގަބޫލު ކުރަންދަތިވީ، ހަގީގަތް ގަބޫލުކޮށް ބަދަލު އަންނާނެކަން ވެސް ގަބޫލު ކޮށް އައު މޫނުތަކަށް ފުރުސަތު ލިބުމަކީ، އެމްޑީޕީގެ ކުރިމަގަކީ." ރާއީ ވިދާޅުވި އެވެ.

މިފަދަ އެތަކެއް މައްސަލަތަކެއް ފެންމަތިވެ، އެމްޑީޕީ ތެރޭގައި ބައިބައިވެ، ދެ ފެކްޝަނެއް އުފެދިފައިވާ ކަމަށް ގިނަ ބަޔަކު އަންނަނީ ބުނަމުންނެވެ.