ހަތަރެސްކަން ފިލައެއްގެ މަތީގައި ވަރަށް ފާޑުވެރި ކަމާއެކު، އެހާމެ ހިތްގައިމު ގޮތަކަށް ބޮލި އަތުރައިގެން އޭނާ ހުރީ އެ ރަށަށް އަންނަ ޓޫރިސްޓުންނަށް ބޮލި ވިއްކުމަށެވެ. މިއީ މި ޒަމާނުގައި ރަށްރަށުން ފެންނަ އެހާމެ އާއްމު މަންޒަރެއް ނޫނެވެ. އެހެންވެ އެކަމާ މެދު ކުއްލިއަކަށް އެތަން ބަލައިލާ ހިތްވެއްޖެ އެވެ. ކައިރިއަށް ގޮސް ބަލާލުމުން އެ ފިލާމަތީގައި ބޮލީގެ އިތުރުން ކުދި ކާށި ތެޔޮފުޅިތަކެއް ވެސް އަތުރާފައި ހުއްޓާ ފެނުނެވެ.
މިކަހަލަ ފައިދާހުރި މަސައްކަތެއް ކުރުމުގައި ދެމިހުރުމަކީ ކުރިމަގު އުޖާލާ ވާނެ ކަމެކެވެ. މީހުންގެ މެދުގައި މަގުބޫލު މީހަކަށް ވާނެ ކަމެކެވެ. މި ހަފްތާގެ ހުނަރުވެރިޔާ ދިމާވީ ކ. ދިއްފުއްޓަށް ކުރި ދަތުރެއްގައި ޓޫރިސްޓުންނަށް ބޮލި ވިއްކަން ހުއްޓަ އެވެ. މިއީ އެ ހުނަރުވެރި މަސައްކަތްތެރިޔާގެ ވާހަކަ އެވެ.
ދިއްފުއްޓަށް އުފަން އެ ރަށު މާތިލަ ފައުޒިއްޔާ ހުސެއިން (ފައުޒިއްޔާ) ނިސްބަތްވަނީ މަސައްކަތްތެރި އައިލާއަކަށެވެ. އޭނާގެ ބައްޕައަކީ މަސްވެރިއެކެވެ. މަންމަގެ މަސައްކަތަކީ މަސް ކެއްކުމުގެ އިތުރުން ކާށިން ތެޔޮ ހޭނުމާއި، ފަންގެ ވިނުމާއި، އަދި ރޯނު ވެށުމެވެ. ވަރަށް ޅައިރުން ފެށިގެން ފައުޒިއްޔާ ވަނީ އޭނާގެ މައިންބަފައިންގެ ފިޔަވަޅު މަތިން ހިނގަން ފަށައިފަ އެވެ. މަންމަ އަށް އަތް ގާތްކޮށްދިނުމުގެ ތެރެއިން އަމިއްލައަށް ގިނަ ކަންކަން އޭނާ ދަސްކުރި އެވެ. ޒަވާޖީ ހަޔާތެއް ފަށައި އެ ކައިވެއްޏަށް އަށް ކުދިން ލިބުނެވެ. އެހެން ނަމަވެސް އޭނާ އެންމެ ޅައިރު ކުރަމުންދިޔަ މަސައްކަތެއް ހުއްޓައެއް ނުލަ އެވެ.
"މިއީ އަބަދު ވެސް ކުރާ މަސައްކަތް. ކާށި ތެލާއި ބޮލި ވިއްކުމުގެ އިތުރުން ފަންގި ވިނަން. ރޯނު ވަށަން. ކާށި ހޮވަން. ބަލި ނުވާއިރު ރަށު ތެރޭގައި ކުރާ ކުދިކުދި މަސައްކަތުގެ ތެރެއިން އަޅުގަނޑު ނުކުރާ މަސައްކަތެއް މަދުވާނެ،" ފައުޒިއްޔާ ބުންޏެވެ.
އޭނާ ޒުވާން ދުވަސްވަރު އަމިއްލައަށް ބޮލި ހިލި ނަމަވެސް، މިއަދު ބޮލި ހިލައިދެނީ އޭނާގެ ދަރިންނާއި މާމަ ދަރިންކަން ފާހަގަ ކުރި އެވެ. ދިޔަވަރު ހިކޭ ދުވަސް ދުވަހު އެ ކުދިން ފަރަށް ގޮސް ބޮލި ހިލައިދެ އެވެ. ފައުޒިއްޔާގެ މަސައްކަތް ފެށެނީ އެ ހިސާބުންނެވެ. ކުދިން ބޮލި ގެނެސްދިނުމުން އެންމެ ފުރަތަމަ ގޭތެރޭގައި ބޮލިތައް ވަޅުލަ އެވެ. ދުވަސްކޮޅަކު އެހެން ބެހެއްޓުމަށް ފަހު ބޮލިތައް ނަގައި ފެން އަޅައިގެން ދޮވެ ސާފުކުރެ އެވެ. އެއަށްފަހު ބޮލިތައް ހިއްކައި އޮފުކުރުމަށް ތެޔޮ ކޮޅެއް ބޮލިތަކުގެ މަތީގައި ހާކާލަ އެވެ.
"ފަތިސް ނަމާދުން ފައިބައިގެން އައިސް ހެނދުނު ނުވައެއް ޖަހަން ދެން އެފެން ތަށީ ކައިރީގައި ބޮލިތައް ސާފު ކުރަން އަޅުގަނޑު އިންނަން. އިރު އޮއްސެން ކައިރިވީމަ ބޮލިތައް އަނެއްކާ ދޮވެގެން ގެނެސް ބޮޑު ސޯފާ މަތީ އަތުރާލަނީ، ހެނދުނު ހޭލާއިރު އެ ބޮލިތައް ހުންނާނީ ހިކިފައި. ދެން ފަތިސް ނަމާދު ކޮށްގެން އެ ބޮލިތައް ކޮތަޅަކަށް އަޅައިގެން ވިއްކަން ގެންދަނީ،" އަތިރިމަތީ ޖޯއްޔެއްގައި ހުރެ ފައުޒިއްޔާ ބުންޏެވެ.
ފައުޒިއްޔާގެ ބޮލިތަކުގެ ބޮޑުކަމާއި ރީތިކަމުން ގިނަ ބަޔަކު އޭނާގެ އަތުން ބޮލިގަނެ އެވެ. ފަތުރުވެރީންގެ އިތުރުން ދިވެހިން ވެސް އޭނާގެ އަތުން ބޮލިގަނެ އެވެ.
ބޮލި ވިއްކުމަށް ފައުޒިއްޔާ ބުރަ މަސައްކަތްތަކެއް ކުރާ ކަމަށް އޭނާގެ އެންމެ ހަގު އަންހެން ދަރިފުޅު ވެސް ބުންޏެވެ.
"އެއްފަހަރަކު އަޅުގަނޑު ކައިރީ މަންމަ ބުނި ދަރިފުޅާއޭ މީހަކު އައިސް އެއްކޮށް ބޮލި ކޮޅު ގަނެފިއޭ. ހުރި ހުރިހާ ބޮލިތަކެއް ހުސްވެއްޖެއޭ. ހިނގާށޭ ބޮލި ކޮޅެއް ހޯދަން އުޅެމާ. ދެން އަޅުގަނޑުމެން ދެ ދުވަސްތެރޭ ބޮލި ހޯދައިގެން އައިސް މަންމަ އަތަށް ދިނީމަ އެ ދުވަހު ހަތަރު ދަމު ނަމާދު ކޮށްލައިގެން ނުކުމެ ބޮލި ސާފު ކުރުމުގެ މަސައްކަތް ކުރީ. އެ ބޮލިތައް ގެނައީ އަލަށް ހިއްކަމުންދާ ސަރަހައްދުން. އެހެން ގެންނަ ބޮލިތައް ހުންނާނީ ވެލިވަދެ ހަރުވެފައި. ވަރަށް ގިނައިރު ވަންދެން ކޮއްޓައި ތަޅައިގެން ބޮލި ސާފު ކުރާނީ،" ފައުޒިއްޔާގެ އެންމެ ހަގު އަންހެން ދަރިފުޅު ފައުޒާ ކިޔައިދިނެވެ.
ފައުޒިއްޔާގެ ތެޔޮ ހޭނުން: ފަތުރުވެރިންގެ މެދުގައި އޭނާ ހާނާ ކާށި ތެލަށް ލިބޭ ތަރުހީބު ބޮޑު
ކާށި ތެޔޮ ހޭނުމަކީ ވެސް ފައުޒިއްޔާ ވަރަށް ޝައުގުވެރިކަމާއެކު ކުރާ މަސައްކަތެކެވެ. އެކަމަށްޓަކައި އޭނާ ވަލު ތެރެއަށް ކާށި ހޮވަން ދެ އެވެ. އެ މަސައްކަތަށް އެހީތެރިވުމުގެ ގޮތުން އޭނާގެ ދަރިންނާއި ރައްޓެހިން ވެސް އޭނާއަށް ކާށި ގެނެސްދެ އެވެ. ކާށި މުޅިން ހުސްވެގެން ދާހިނދެއްގައި އަމިއްލައަށް ކާށި ގަނެގެން ވެސް އެ މަސައްކަތް ކުރެ އެވެ.
ކުރީ ޒަމާނާ އަޅާ ބަލާއިރު މިޒަމާނުގައި ކާށިން ތެޔޮ ހޭނުން ވަރަށް ބޮޑަށް ފަސޭހަ ކަމަށް އޭނާ ބުންޏެވެ. އިހުގައި ނަމަ، އޭނާ ކުރޮޅި ގާނާފައި ތިން ދުވަސް ނުވަތަ ހަތަރު ދުވަސް ވަންދެން އަވީގައި ބަހައްޓަ އެވެ. ތެޔޮ ހާނަން ބޭނުން ކުރަނީ ދަރު އުނދުނުނެވެ. އެއިން ކޮންމެ ކަމަކީ އެތައް ވަގުތެއް ހޭދަވާ ކަމެކެވެ. ނަމަވެސް މިއަދު ޒަމާނީ އާލާތްތަކުގެ އެހީގައި އެ މަސައްކަތް ފަސޭހަވެފައި އަވަހެވެ.
"ކާށިން ތެޔޮ ހޭނުމަށްޓަކައި މިހާރު ހަދާ ގޮތަކީ އަޅުގަނޑު ކާށި އުތުވާފައި އަޅުގަނޑުގެ މަންޖެ އަތަށް ދެނީ. އޭނަ މިކްސަރުން ގިރާ އެއްކޮށްލާފައި، ފެން ނާޅާ ވަރަށް އޮލަކޮށް އެއިން ކިރު ފެލާނެ. ދެން އެ ކިރު މަތިޖެހި އެއްޗަކަށް އަޅާލާފައި ފްރިޖް ކުރާނީ. އެއް ދުވަހު އެހެން ބެހެއްޓުމަށް ފަހު އަނެއް ދުވަހުގެ ހެނދުނު އެ ކިރު ފްރިޖުން ނަގާއިރު ހުންނާނީ މަތީބައި ގަނޑުވެލާފައި. އެގަނޑުވެފައި ހުރި ބައި ނަގައި ތެއްޔަކަށް އަޅައިގެން ހާނާނީ. ދެން ސުޕާރީ ހުސްކުރި ފުޅިއަށް އަޅާ ބަނދު ކުރަނީ،" ފައުޒިއްޔާ ބުންޏެވެ.
ފައުޒިއްޔާ ހާނާ ކާށި ތެޔޮ އެންމެ ގިނައިން ގަންނަނީ އިޓަލީ މީހުންނާއި ފްރާންސް މީހުން ކަމަށް އޭނާ ބުންޏެވެ.
މަގުމަތީގައި ވިއްކުމުގެ އިތުރުން އޭނާގެ ގޭގެ އެއްބައިގައި ހުންނަ ގެސްޓް ވިޔަފާރި ކުރާ ފިހާރައަށް ވެސް ކާށިތެޔޮ ވިއްކަން ލަ އެވެ. ފިހާރައިން ހުސްވުމުން އެނާގެ ގެއަށް ތެޔޮ ގަންނަން ވެސް ގިނަ ބަޔަކު އަންނަ ކަމަށް ވެސް އޭނާ ބުންޏެވެ. މިކަމުން އަންގައި ދެނީ އޭނާ ތައްޔާރުކުރާ ކާށިތެލަށް އޮތް ޑިމާންޑް ބޮޑުކަމެވެ.
ފައުޒިއްޔާގެ މަސައްކަތުން ލިބޭ މެސެޖަކީ ހީވާގި ކަމާއެކު ފައިދާހުރި މަސައްކަތެއް ކުރުމުގައި ދެމިހުރެއްޖެ ނަމަ ކުރިއަރާދާނެ ކަމެވެ. މީހުން ބަލައިގަންނާނެ ކަމެވެ. ދިއްފުށީ އަތިރިމަތިން މި ފެންނަނީ އެ މަންޒަރެވެ. ފައުޒިއްޔާ ކުރާ މަސައްކަތް ބަލައިގަންނަނީ ހަމައެކަނި ދިވެހިންނެއް ނޫނެވެ. އޭނާގެ މަސައްކަތަށް ރާއްޖެ އަންނަ ފަތުރުވެރިންގެ ސަމާލުކަން ވެސް އެހާމެ ބޮޑެވެ.
