ޑާކްރެއިން އެންޓަޓެއިންމަންޓުގެ މިއަހަރު ގެނެސްދިނުމަށް ހަމަޖެހިފައިވާ ފިލްމު "ހިނދުކޮޅެއް"ގެ ޓްރެއިލާއަށް ބޮޑު ތަރުހީބެއް ލިބިއްޖެ އެވެ.

ލޯބީގެ ވާހަކައެއްގެ މައްޗަށް ގެނެސްދޭ "ހިނދުކޮޅެއް" ޕްރިމިއާ ކުރުމަށް ނިންމާފައި ވަނީ މީޑިއާނެޓްގެ އޯޓީޓީ ޕްލެޓްފޯމް މަލްޓި ސްކްރީން އާއި އެމްއެސްޓީވީގަ އެވެ.

އަހުމަދު ތޮލާލްގެ ސްކްރީން ޕްލޭއަކަށް، އަލީ ޝިފާއު (ޗިއްޕެ) ޑައިރެކްޓްކޮށްފައިވާ މިފިލްމުގައި ލީޑް ތަރިންގޮތުގައި ފެނިގެންދާނީ އަރަމުން އަންނަ ޒުވާން ދެ ތަރިން ކަމަށްވާ އައިމިނަތު ރަޝްފާ (އާޝާ) އާއި ޝަރަފު އެވެ. މިދެ ތަރިންގެ އިތުރުން މަޝްހޫރު ތަރިން ކަމަށްވާ ރަވީ ފާރޫގާއި މަރިޔަމް މަޖުދާ ވެސް ހިމެނެ އެވެ.

https://www.youtube.com/watch?v=T45-SdJrvPQ

ޗިއްޕެ އެންމެ ފަހުން ބެލުންތެރިންނަށް ގެނެސްދިން ފިލްމަކީ 2019 ގެ ކޮމެޑީ ފިލްމު "މާމުއި" އެވެ.

"ހިނދުކޮޅެއް" ގެ ޓްރެއިލާ އާންމުންނަށް ދޫކޮށްލި އިރު، މިދިޔަ ހަފުތާގައި މި ފިލްމުގެ ލަވަތަކުގެ ތެރެއިން "މި ހިތުގެ ރާނީ" ވެސް ވަނީ ދައްކާލާފައިވެ އެވެ.

ޑާކް ރެއިނުން މި އަހަރު ގެނެސްދޭ ފުރަތަމަ ފިލްމަކީ އަންނަ މަހުގެ 6 ގައި އަޅުވަން ހަމަޖެހިފައިވާ "ބީވީމާ" އެވެ. އޭގެ ކާސްޓުންނަކީ މަރިޔަމް އަޝްފާ، އާޝާ، އިސްމާއީލް ރަޝީދު (ކޮޕީ އިއްސެ)، އާދަމް ޒިދާނެވެ.

ޑާކް ރެއިން އެންޓަޓެއިންމަންޓުގެ އިތުރު ދެ ފިލްމެއް އޮލިމްޕަހުގެ ސްކްރީނަށް އަންނަން ވަނީ ތައްޔާރުވެފަ އެވެ. އެއީ އަހްމަދު ޝިނާން ޑައިރެކްޓްކުރާ ބިރުވެރި ފިލްމް "ބަޅިނދު" އަދި އައިޝަތު ފުވާދު ޑައިރެކްޓްކޮށްފައިވާ "ނޮވެމްބަރު" އެވެ. ޑާކްރެއިނުން އެންމެ ފަހުން އޮލިމްޕަހުގައި އެޅުވި ފިލްމަކީ 2019 ގެ ކޮމެޑީ ފިލްމު "މާމުއި" އެވެ.