ހޮލީވުޑްގައި މިހާރު އެންމެ ނުފޫޒު ގަދަ ފަންނާނުގެ ގޮތުގައި ފާހަގަކުރެވޭ އިންޑިއާގެ މަޝްހޫރު ބަތަލާ ޕްރިޔަންކާ ޗޯޕްރާގެ އަމިއްލަ މޭކަޕް ކަލެކްޝަނެއް ލޯންޗްކޮށްފި އެވެ.

ޕްރިޔަންކާ މިފަހަރު މޭކަޕް ކަލެކްޝަން ލޯންޗްކޮށްފައި ވަނީ 114 އަހަރުގެ ތާރީހެއް އޮތް މެކްސް ފެކްޓާއާ ގުޅިގެންނެވެ.

އިނގިރޭސިވިލާތުގައި ބޭއްވި ރަސްމިއްޔާތެއްގައި ލޯންޗްކޮށްފައިވާ މޭކަޕް ކަލެކްޝަނަށް ކިޔަނީ "ޔުނިވާސަލް ކަލަ ކަލެކްޝަން" އެވެ.

ޕްރިޔަންކާގެ މޭކަޕް ކަލެކްޝަންގައި ލޮލާއި ތުންފަތާއި ނިޔަފަތިތަކަށް ހާއްސަ އުފެއްދުންތައް ހިމެނެ އެވެ.

މިކަލެކްޝަން އާއި ބެހޭ ގޮތުން 40 އަހަރުގެ ބަތަލާ ޕްރިޔަންކާ ބުނީ މިއީ ހުރިހާ ކުލައެއްގެ އަންހެނުންނާ ވެސް ގުޅޭ ވަރަށް ފެންވަރު ރަގަޅު އުފެއްދުމެއް ކަމަށެވެ. އަދި މިކަލެކްޝަންގެ ބޭނުމަކީ އަންހެނުންނަށް އެ މީހުންގެ ރީތިކަން ދައްކުވައި ދިނުމާ އެކީ އަމިއްލަ ނަފުސަށް އޮންނަ އިތުބާރު އިތުރުކޮށް ދިނުން ކަމަށް ޕްރިޔަންކާ ބުންޏެވެ.

https://www.facebook.com/watch/?v=905310344157989

"ހުދު އަހަންނަކީ ވެސް މޭކަޕާ ވަރަށް ދޯޅު މީހެއް. އެހެންވީމަ މޭކަޕަ އަކީ މިހާ މުހިއްމުކަން އެއްޗެއްކަން އެނގޭ، މޭކަޕް ކުރުމަކީ އަހަރެމެންގެ ނަފުސު ބާރުވެރިކޮށްދޭ ކަމެއް." ދެހާސް ވަނަ އަހަރު މިސް ވޯލްޑްގެ ތާޖު ވެސް ހާސިލުކުރި ބަތަލާ ބުންޏެވެ.

މެކްސް ފެކްޓާއާ ގުޅިގެން މޭކަޕް ކަލެކްޝަނެއް ލޯންޗްކުރި އިރު، 2020 އިން ފެށިގެން ޕްރިޔަންކާ އަކީ މެކްސް ފެކްޓާގެ ބްރޭންޑް އެމްބެސެޑަރެއް ވެސް މެ އެވެ.

މިދިޔަ އަހަރު ޕްރިޔަންކާ ވަނީ އަމިއްލަ ހެއާކެއާ ބްރޭންޑެއް ލޯންޗް ކުރުމަށް ނިންމާފަ އެވެ. "އެނޮމަލީ" ނަމުގައި ލޯންޗް ކުރާ ބްރޭންޑްގައި އަންހެނުންނާއި ފިރިހެނުންގެ އިސްތަށިގަނޑަށް ބޭނުންވާ ޝޭމްޕޫ އާއި ކޮންޑިޝަނާއާ އެކު އަށް އުފެއްދުމެއް ނެރޭނެ އެވެ.