އިޖުތިމާއީ ދާއިރާއަށް ހެޔޮ ބަދަލްތަކެއް އަންނާނީ ޒިންމާދާރު ކަމާއެކު ހުރިހާ ދާއިރާއެއްގެ އެންމެންގެ މަސައްކަތް ހިމެނިގެން ކަމަށް ނައިބު ރައީސް ފައިސަލް ނަސީމް ވިދާޅުވެއްޖެ އެވެ.

ޕްރިންސިޕަލުން ތަމްރީނުކުރުމަށް ކުރިޔަށްގެންދިޔަ ސްކޮލަޝިޕް ޕްރޮގްރާމުގެ ފުރަތަމަ ބުރު ނިންމި ބައިވެރިންނަށް މަޤާމުގެ މަސްއޫލިއްޔަތުގެ ލިއުން ހަވާލުކޮށްދެއްވުމަށް ރޭ ޗަމްޕާ ސެންޓްރަލް ހޮޓެލްގައި ބޭއްވި ރަސްމިއްޔާތު ޝަރަފްވެރިކޮށްދެއްވާ ވާހަކަ ދައްކަވަމުން ފައިސަލް ވިދާޅުވީ ތައުލީމީ ދާއިރާއިން ގިނަ ރަށްތަކެއްގައި އާ ކްލާސް ރޫމްތައް އަޅައި ވަސީލަތްތައް އިތުރު ކުރުމާއި ސްކޫލްތަކުގެ ޖާގައިގެ ދަތިކަމަށް ދިމާވެފައިވާ މައްސަލަ ހައްލު ކުރުމަށް ސަރުކާރުން ގިނަ މަސައްކަތަކެއް ކުރި ކަމަށެވެ.

އިޖުތިމާއީ ދާއިރާއަށް ހެޔޮ ބަދަލްތަކެއް އަންނާނީ ގިނަ މަސައްކަތްތަކެއް ކޮށްގެން ކަމަށް ފައިސަލް ވިދާޅުވި އެވެ.

ޤައުމަށް އެންމެ ބޭނުންވާ ދާއިރާތަކުން މީހުން ބިނާކުރުމަށް ސަރުކާރުން ވަރަށް ބޮޑު އިސްކަމެއްދޭކަން ފައިސަލް ފާހަގަކުރެއްވި އެވެ. އެގޮތުން ގިނަ ދާއިރާތަކަކަށް އަމާޒުކޮށް މީހުން ތަމްރީނުކުރުމަށް ސަރުކާރުން މިހާރު ވެސް ޕްރޮގްރާމުތަކެއް ފަށައިގެން ކުރިޔަށް ގެންދާ ކަމަށް ނައިބު ރައީސް ފައިސަލް ވިދާޅުވި އެވެ.

މީގެ އިތުރުން ރޭގެ ރަސްމިއްޔާތުގައި މަޤާމުގެ ލިއުމާ ހަވާލުވެވަޑައިގެންނެވި ޕްރިންސިޕަލުން އެބޭފުޅުންގެ ޒިންމާ އަދާކުރެއްވުމުގައި ކަމާގުޅޭ ހުރިހާ ފަރާތްތަކާއި ގުޅިގެން، އެއް އަމާޒަކަށް ވާސިލުވުމަށް ނައިބު ރައީސް ފައިސަލް ވަނީ އެދިވަޑައިގެންފަ އެވެ.

ޕްރިންސިޕަލުން ތަމްރީނު ކުރުމަށް ހިނގާ ސްކޮލަޝިޕް ޕްރޮގްރާމަކީ ތިން އަހަރު ދުވަހުގެ މުއްދަތަކަށް ބަހާލައިގެން ކުރިއަށް ގެންދިއުމަށް ހަމަޖެހިފައިވާ ޕްރޮގްރާމެކެވެ. މި ސްކޮލަޝިޕް ޕްރޮގްރާމުގެ ދެވަނަ ބުރު މި އަހަރު ތެރޭގައި ފެށުމަށް ހަމަޖެހިފައިވާއިރު މުޅި މި ޕްރޮގްރާމް ނިމޭއިރު ސަރުކާރުން ހިންގާ ހުރިހާ ސްކޫލެއްގައި ތަމްރީނު ލިބިފައިވާ ދިވެހި ޕްރިންސިޕަލުން ތިބޭނެއެވެ.