އަނެއް ކެންޑިޑޭޓުގެ ލިންކްތަކަށް ބަލާއިރު ބިރުގަންނަ ކަންކަން އެބަހުރި: ރައީސް

ރިޔާސީ އިންތިޚާބުގެ ދެވަނަ ބުރުގައި ވާދަކުރައްވާ އަނެއް ކެންޑިޑޭޓުގެ ލިންކްތަކަށް ބަލާއިރު ރައްޔިތުން ބިރުގަންނަ ކަންކަން އެބަހުރި ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ރާއްޖެ ޓީވީގެ "ފަށާއިރު" ޕްރޮގްރާމަށް ފޯނުން ދެއްވި އިންޓަވިއުއެއްގައި ރައީސް ވިދާޅުވީ އެމަނިކުފާނުގެ އެދުމަކީ ގައުމު ގޮސް ވެއްޓޭނެ އަނދަވަޅުން ސަލާމަތްކުރުމަށް އެންމެން އެކުގައި ގޮސް އިތުރު ހިތްވަރެއް ލައިގެން މަސައްކަތް ކުރަން ޖެހޭ ކަމަށެވެ.

"އެހެން ނޫނިއްޔާ އަޅުގަނޑުމެންނަށް ފެންނަ މަންޒަރު ވަރަށް ބަނަ، ވަރަށް އަނދިރިކޮށް ފެންނަނީ. އަޅުގަނޑުމެންގެ އަނެއް ކެންޑިޑޭޓް (ޕީއެންސީން ވާދަކުރައްވާ ޑރ. މުހައްމަދު މުއިއްޒު) ގެ ލިންކްތަކަށް ބަލާއިރު އަޅުގަނޑުމެން ބިރުގަންނަ ކަހަލަ އެތައް ކަންތައްތަކެއް އެބަހުރި އެކަން އެގޮތަށް ވެއްޖިއްޔާ. އެކަމުން ސަލާމަތް ވުމަށް ހުރިހާ ރައްޔިތުންނަށް ދަންނަވާނީ އަޅުގަނޑުމެން އެންމެން އެކީގައި މަސައްކަތް ކުރުން. މި ކާމިޔާބުކުރަން އެބަ ޖެހޭ،" ރައީސް ވިދާޅުވި އެވެ.

ރައީސް ވިދާޅުވި އިދިކޮޅު ކެންޑިޑޭޓުގެ ލިންކްތަކާއި އެ ކެންޑިޑޭޓުގެ ފަރާތުން ފެންނަ ބިރުގަންނަ ކަންކަމުގެ އިތުރު ތަފްސީލެއް ނުދެއްވަ އެވެ.

ރައީސް ވަނީ އިންތިޚާބުގައި އެމަނިކުފާނަށް ވޯޓު ދެއްވި އެންމެންްނަށާއި އެ މަސައްކަތުގައި ޕާޓީގެ ފަރާތުންނާއި ވޮލަންޓިއަރުންގެ ގޮތުގައާ އަދި ހެޔޮ އެދިގެން މަސައްކަތް ކުރެއްވި އެންމެންނަށް ޝުކުރު އަދާކުރައްވައިފަ އެވެ.

އިތުރު ޕާޓީތައް ގުޅޭނެ ކަމުގެ ފެހި ސިގްނަލް ލިބިއްޖެ

އިންތިޚާބުގެ ދެވަނަ ބުރަށް ނުދިޔަ ޕާޓީތަކުގެ ތެރޭން ބައެއް ޕާޓީތަކުން ސަރުކާރު ކޯލިޝަނާ އެކު ކުރިއަށްދާނެ ކަމުގެ ފެހި ސިގްނަލް ލިބިފައިވާ ކަމަށް ރައީސް ވިދާޅުވި އެވެ.

ރައީސް ވިދާޅުވީ ޕާޓީތަކާ އެކު އިއްޔެ ވެސް މަޝްވަރާ ކުރެވުނު ކަމަށާއި ދެ ބަޔަކު ނޫނީ ތިން ބަޔަކު ގުޅޭނެ ކަމަށް ގަބޫލް ކުރެވޭ ކަމަށެވެ.

"އަޅުގަނޑުމެން ވެސް އެބަ ވާހަކަ ދައްކަން ދެވަނަ ބުރަކަށް ނުދިޔަ ޕާޓީތަކާ. އަޅުގަނޑުމެންނާ އެކު ކުރިއަށްދާނެ ކަމުގެ ފެހި ސިގްނަލް ދެއްވާފައި ތިބި ބައެއް ބޭފުޅުން އެބަތިބި. ރަސްމީކޮށް އެކަން އިއުލާން ކުރެވޭ ހިސާބަކަށް އަދި ނުދޭ. ދެން އޮތް މަސައްކަތަކަށް ވާނީ އެކަން ކުރުން. އެކަން ކުރެވުނީމާ ލިބޭނެ ފުދޭވަރެއްގެ ކުރިއެރުމެއް،" ރައީސް ވިދާޅުވި އެވެ.

ދޮގު ވާހަކަތަކަށް އަޅައި ނުލައި ނުހުންނާނަން، ރައްދު ދޭނަން

ރައީސް ވިދާޅުވީ ކެމްޕޭންތަކުގައި ސަރުކާރަށް އަމާޒުކޮށް އިދިކޮޅު ފަރާތްތަކުން ދެއްކި ދޮގު ވާހަކަތަކެއް އެބަހުރި ކަމަށާއި އެއަށް އެކަށީގެންވާ ރައްދު ނުދެވުމަކީ ކުރިމަތިވި އެންމެ ބޮޑު ގޮންޖެހުން ކަމަށެވެ.

"އޭގެ ތެރޭގައި ގައުމުގެ މިނިވަންކަމާއި އިސްތިގްލާލް ގެއްލުވާލަން އަޅުގަނޑުމެން މަސައްކަތްކޮށްފައިވާ ކަމަށް ވާހަކަ ދައްކާފައި އެބަހުރި. ބޭރުގެ ސިފައިން ތިބޭ ވާހަކަ އާއި އެކަހަލަ ދޮގު ވާހަކަތައް ދައްކައިގެން ރައްޔިތުންނަށް އެކަންކަން ގަބޫލް ކުރެވޭ ވަރަށް ވަނީ ދައްކާފައި. އެއީ ވެސް ހަގީގަތެއް ހުރި ވާހަކަތަކެއް ނޫން،" ރައީސް ވިދާޅުވި އެވެ.

އެމަނިކުފާން ވިދާޅުވީ ދެވަނަ ބުރުގައި އެކަންކަމަށް ރައްދުދީ، އޮޅުން ފިލުވައިދީ، ހާމަކުރެވެން ހުރި ހުރިހާ މައުލޫމާތެއް ހާމަކުރައްވާނެ ކަމަށެވެ.

"ރާއްޖޭގެ ސަރަހައްދުން އެއްވެސް ބައެއް ގެއްލޭފަދަ ކަމެއް ކޮށްފައެއް ނޯންނާނެ. އެ އެއްޗެހި ކިޔައިދިނީމާ ރައްޔިތުންނަށް ވިސްނޭނެ އެއީ އޮޅުވާލުމުގެ ތެރޭން ދައްކާފައި ހުރި ވާހަކަތައް ކަމަށް،" ރައީސް ވިދާޅުވި އެވެ.

ފުރަތަމަ ބުރުގެ އެންމެ ބޮޑު މައްސަލަ އަކީ ޓާންއައުޓް ދަށްވުން

ރައީސް ވިދާޅުވީ ފުރަތަމަ ބުރުގައި ދިމާވި އެންމެ ބޮޑު މައްސަލަ އަކީ ޓާންއައުޓް ދަށްވުން ކަމަށެވެ. ޕްލެޖް ވޯޓާއި ވޯޓުދޭން ނިންމައިގެން ތިބި މީހުންނަށް ވޯޓު ނުލެވިހުރިކަން ރައީސް ވަނީ ފާހަގަ ކުރައްވައިފަ އެވެ.

"އިދާރީ ގޮތުން ރަނގަޅުކޮށްލަން ޖެހޭ ބައެއް ކަންކަން އެބަހުރި. ބައެއް ރަށްރަށުގައި ޕްލެޖް ވޯޓުގެ ތެރޭން 300-400 ވޯޓު އެބަހުރި ނުލެވި. އެއީ ކިހިނެއްވީ ކަމެއްތޯ ބަލައި އެކަން ކަމަށް ސަމާލުކަން ދެމުން މިދަނީ،" ރައީސް ވިދާޅުވި އެވެ. "ބައެއް ދާއިރާތަކުން މި ބުނަނީ ވޯޓުލާ ގަޑި ޓަސްލާފައި 4 ޖެހީމާ ބަންދުވީމާ ބައެއް މީހުންނަށް ވޯޓުލާން ތިބި މީހުންނަށް ނާދެވުނީއްޔޭ. އަނެއް ކަމަކަށް ވޯޓުލާން މީހުން ނެރެން ކުރިން ކުރެވުނު ވަރަށް މިފަހަރު މަސައްކަތް ނުކުރެވުނު ކަމަށް އެބަ ފާހަގަކުރެވޭ."

މިފަހަރުގެ އިންތިޚާބުގައި ވޯޓުލީ މީހުންގެ ނިސްބަތް އުޅެނީ އެހެން ފަހަރުތަކަށް ވުރެ ދަށުގަ އެވެ. މި އަހަރުގެ އިންތިޚާބުގައި ވޯޓުލާފައި ވަނީ ގާތްގަނޑަކަށް 79 ޕަސެންޓް މީހުންނެވެ.

މި މަހު 30 ވަނަ ދުވަހު ބާއްވާ ދެ ވަނަ ބުރުގައި ވާދަކުރައްވާނީ، ފުރަތަމަ ބުރުން އެންމެ ގިނަ ވޯޓު ހޯއްދެވި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒާއި ރައީސް އިބްރާހިމް މުހައްމަދު ސޯލިހެވެ. މުއިއްޒަށް 101،128 ވޯޓް (46 ޕަސެންޓް) ލިބިވަޑައިގެންނެވި އިރު ރައީސް ސޯލިހަށް 85،000 ވޯޓު (39 ޕަސެންޓް) ލިިބިވަޑައިގެންފައިވެ އެވެ.