ރިޔާސީ އިންތިހާބުގެ ފުރަތަމަ ބުރަށް ވުރެ ރީ-ރަޖިސްޓްރީ ކުރި މީހުންގެ އަދަދު ކުއްލިއަކަށް އިތުރުވުމަކީ ސުވާލު އުފެދޭ ކަމެއް ކަމަށް ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވިދާޅުވެއްޖެ އެވެ.

ރިޔާސީ އިންތިހާބުގެ ދެވަނަ ބުރުގައި ވޯޓުލާ ތަން ބަދަލުކުރުމަށް ހުޅުވާލި ފުރުސަތު މިއަދު ހަމަވާއިރު މިހާތަނަށް 25،000 އަށް ވުރެ ގިނަ ފޯމު ވަނީ އިލެކްޝަންސް ކޮމިޝަނަށް ހުށަހަޅާފަ އެވެ.

ކުއްލިއަކަށް އެހާ ގިނަ ބަޔަކު ރީ-ރަޖިސްޓްރީ ކުރަން ހުށަހެޅުމުން އިދިކޮޅު ސިޔާސީ ޕާޓީތަކުން ގެންދަނީ ކަންބޮޑުވުން ފާޅުކުރަމުންނެވެ.

ރައްޔިތުންގެ މަޖިލީހުގެ ނައިބު ރައީސް އީވާ ވިދާޅުވީ ރިޔާސީ އިންތިހާބުގެ އެއް ވަނަ ބުރުގައި ރަޖިސްޓްރީ ކުރުމުގެ ޝައުގުވެރިކަން ކުޑަކަމަށް ބަލާއިރު، ދެވަނަ ބުރުގައި ރީ-ރަޖިސްޓްރީވުމަށް މިހާ ގިނަބަޔަކު ކުއްލި އަކަށް ހުށަހެޅުމަކީ ސުވާލު އުފެދޭ ކަމެއް ކަމަށެވެ.

ހާއްސަކޮށް ރައީސް އިބްރާހީމް މުހައްމަދު ސޯލިހުގެ ކެމްޕޭނުގައި ރިޝްވަތާއި، ކޮރަޕްޝަން، އަދި ދައުލަތުގެ ވަސީލަތްތައް ބޭނުންކުރުން ފަދަ ކަންކަން ހިމެނުނުއިރު، މިއީވެސް އިންތިހާބަށް ނުފޫޒުފޯރުވުން ފަދަ ކަމެއް ނޫންކަން ޔަގީން ކުރުމަށް އިލެކްޝަންސް ކޮމިޝަނުގެ މެންޑޭޓް ދަމަހައްޓަން ޖެހޭ ކަމަށް އީވާ ވިދާޅުވި އެވެ.

އިދިކޮޅު ޕީޕީއެމް އިންވެސް ވަނީ މިކަމުގެ ކަންބޮޑުވުން ފާޅު ކޮށްފަ އެވެ. ޕީޕީއެމް، ޕީއެންސީ ހިންގުމާ ހަވާލުވެ ހުންނެވި އަބްދުއްރަހީމް އަބްދުﷲ ވިދާޅުވީ ރީ-ރަޖިސްޓްރޭޝަނަށް ހުޅުވާލިތާ ދެ ދުވަހުގެ ތެރޭގައި 25،000 އަށްވުރެ ގިނަ މީހުން ރީ-ރަޖިސްޓްރީވުމަށް ހުށަހަޅާފައިވާ ކަމަށާއި އެއީ ގަބޫލުކުރެވޭ އަދަދެއް ނޫން ކަމަށެވެ. އަބްދުއްރަހީމް ތުހުމަތުކުރެއްވި ގޮތުގައި ހުށަހެޅި ފޯމުތަކުގެ ތެރޭގައި އޮޅުވާލައިގެން ވެސް ހުށަހަޅާފައިވާ ފޯމުތައް ހިމެނެ އެވެ.