=

އިލެކްޝަން ކޮމިޝަން (އީސީ)ގެ ރައީސް ކަމުން އިސްތިއުފާ ދިނުމަށް ފުއާދު ތައުފީގު ނިންމަވައިފި އެވެ.

ބައެއް މީޑިއާތަކުގައި ރިޕޯޓް ކޮށްފައިވާ ގޮތުގައި ފުއާދު އިސްތިއުފާ ދިނުމަށް ނިންމާފައިވަނީ އީސީ ތެރޭގައި އުފެދިފައިވާ ހިޔާލު ތަފާތުވުންތަކާއި ގުޅިގެންނެވެ.

ކުރިން ވެސް އީސީގެ ރައީސްކަން ކުރައްވާފައިވާ ފުއާދު އެ ކޮމިޝަންގެ ރައީސް ކަމަށް ފަހުން އައްޔަންކުރީ 2019 ގަ އެވެ. އަދި އީސީގެ ރައީސް ކަމަށް ފުއާދު ހަމަޖެއްސީ ސެޕްޓެމްބަރު 15، 2021 ގަ އެވެ.

ފުއާދު އީސީން އިސްތިއުފާ ދެއްވަން ނިންމެވި އިރު، އޭނަގެ މައްޗަށް އިތުބާރެއް ނެތް ކަމަށް އީސީގެ މެންބަރުން މި އަހަރުގެ ރިޔާސީ އިންތިހާބުގެ ކުރިން ވިދާޅުވެފައިވެ އެވެ.

އެހެން ނަމަވެސް ފުއާދު ބައެއް މީޑިއާތަކުގައި ވިދާޅުވެފައިވަނީ ކޮމިޝަންގެ ރައީސް ކަމުންނާއި މެންބަރު ކަމުން އަދި އިސްތިއުފާ ދިނުމަށް ނިންމާފައިނުވާ ކަމަށެވެ. އެހެން ނަމަވެސް ކޮމިޝަން ތެރޭގައި އުފެދިފައިވާ ހިޔާލު ތަފާތުވުންތަކާއި ގުޅިގެން ކޮމިޝަންގައި މަސައްކަތް ކުރައްވަމުން އުނދަގޫވާ ކަމަށް ފުއާދު ވިދާޅުވި އެވެ.

ފުއާދު ވިދާޅުވީ އެހެން ދިމާލަކުން ރައްޔިތުންނަށް ހިދުމަތް ކުރެއްވުމަށް ފުރުސަތު ލިބިއްޖެ ނަމަ ކޮމިޝަނުން އިސްތިއުފާ ދިނުމަށް ވިސްނާ ކަމަށެވެ.

ރިޔާސީ އިންތިޚާބާ ކުރިމަތިވިއިރު މެންބަރުގެ ތެރޭގައި މި މައްސަލަ ބޮޑުވެފައި އޮތް ނަމަވެސް އިންތިޚާބުގެ ކަންކަން ދިޔައީ ވަރަށް އަމާންކޮށެވެ. އީސީގެ އިންތިޒާމުތައް ރަނގަޅު ވެގެން ބައިނަލްއަޤުވާމީ ފަރާތްތަކުންނާއި ދިވެހިން ވެސް އެ ކޮމިޝަނަށް ތައުރީފު ކުރި އެވެ.