އިއްޔެގެ މުހިންމު ހަބަރުތައް ކުރުކޮށް: ސަރުކާރު ވައްޓާލަން މަޖިލީހުގައި ގޮވާލައިފި

ރައީސް ޑރ. މުހައްމަދު މުއިއްޒުގެ ސަރުކާރަށް އެއް މަސް ނުވަނީ އިދިކޮޅު އެމްޑީޕީގެ މެމްބަރުން ސަރުކާރު ވައްޓާލަން މަޖިލީހުގައި ގޮވާލައްވައިފި އެވެ. އެމްޑީޕީ މެމްބަރުން މިފަދައިން ގޮވާލެއްވީ އިއްޔެ މަޖިލީހަށް ހުށައެޅި ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލަން އެއްބަސްވެފައިވާ ކަމަށް ބުނެ، އެ އެއްބަސްވުން ހާމަކުރަން ގޮވާލައި މަޖިލިހުގެ މެޖޯރިޓީ އޮތް އެމްޑީޕީން ހުށަހެޅި ކުއްލި މައްސަލައިގެ ބަހުސްގެ މަރުހަލާގެ ތެރޭގަ އެވެ. މަޖިލިހުގެ ޖަލްސާ އަށް އެ ކުއްލި މައްސަލަ ހުށަހެޅުއްވީ މަޖިލިހުގެ ބާރަށު ދާއިރާގެ އެމްޑީޕީގެ މެމްބަރު އަހުމަދު އެވެ.

ކުއްލި މައްސަލައިގައި ބުނެފައި ވަނީ އިންޑިއާގެ ހަތިޔާރު އެޅި އެތައް ހާސް ސިފައިންގެ ބަޔަކު ރާއްޖޭގައި ތިބި ކަމަށް ވިދާޅުވެ ރައްޔިތުންގެ ހިތުގައި ބިރުވެރިކަން އުފައްދަން ރައީސް ޑރ. މުއިއްޒު މީޑިއާގައި ވާހަކަ ދައްކަވާފައިވާ ކަމަށެވެ.

ސިޔާސީ ބޭނުމެއްގައި އިންޑިއާއާ ޒާތީވުން ހުއްޓާލަން ޖެހޭ: ދޮންބިލެތް

ސިޔާސީ މަގްސަދެއް ހާސިލް ކުރުމަށް އަވަށްޓެރި އިންޑިއާއާ ޒާތީވުން ހުއްޓާލަން ޖެހޭ ކަމަށާއި އެހެން ނޫން ނަމަ، ދިވެހިންނަށް އޭގެ އުނދަގޫ ޖެހިދާނެ ކަމަށް ރައްޔިތުން މަޖިލީހުގެ ބިލަތްދޫ ދާއިރާގެ މެންބަރު އަހްމަދު ހަލީމް (ދޮންބިލެތް) އިއްޔެ ވިދާޅުވެއްޖެ އެވެ.

ރާއްޖޭގައި ތިބި އިންޑިއާ ސިފައިން ފޮނުވާލުމަށް އިންޑިއާގެ ބޮޑުވަޒީރު ނަރެންދުރަ މޯދީއާ އެކު މި ސަރުކާރުން ވެފައިވާ އެއްބަސްވުން ހާމަކުރަން ގޮވާލައި މަޖިލިހަށް ހުށަހެޅި ކުއްލި މައްސަލަ އަށް ބަހުސް ކުރައްވަމުން ހަލީމް ވިދާޅުވީ ރާއްޖެ އާއި އިންޑިއާގެ ގުޅުމަކީ ޖޯކެއް ނޫން ކަމަށާއި ރާއްޖޭގައި އިންޑިއާ ސިފައިން ނެތް ކަން ތަންދޮރު ދަންނަ ވަރަށް ގިނަ ބަޔަކަށް އެނގޭނެ ކަމަށެވެ.

ޑޮކިއުމަންޓުތައް ރަނގަޅަށް ނެތް، ލިޔުމަކާ ނުލައި އިންޑިއާ ސިފައިން ތިބި ކަމަށްވޭ: ނަސީމް

ރާއްޖޭގައި ތިބި އިންޑިއާ ސިފައިންގެ އަދަދު ރައީސް ޑރ. މުހައްމަދު މުއިއްޒުގެ ސަރުކާރަށް ހާމަނުކުރެވިގެން އުޅެނީ ޑޮކިއުމަންޓުތައް ރަނގަޅަށް ފެންނަން ނެތީމަ ކަމަށާއި ލިޔުމަކާ ނުލައި ވެސް އިންޑިއާ ސިފައިން ރާއްޖޭގައި އެބަތިބި ކަމަށް ރައްޔިތުންގެ މަޖިލިހުގެ ތުލުސްދޫ ދާއިރާގެ ޕީއެންސީ މެމްބަރު އިބްރާހިމް ނަސީމް އިއްުޔެ ވިދާޅުވެއްޖެ އެވެ.

ރައީސް އޮފީހުގައި ބޭއްވި ޕްރެސް ކޮންފަރެންސްގައި ރައީސް މުއިއްޒު ވިދާޅުވީ މިހާތަނަށް ލިބުނު ލިޔުންތަކުން، ރާއްޖޭގައި ތިބި އިންޑިއާ ސިފައިންގެ އަދަދު ޔަގީން ކުރެވިފައިނުވާ ކަމަށެވެ. ފޮރިން މިނިސްޓްރީ އާއި ޑިފެންސް މިނިސްޓްރީން ލިބުނު ލިޔުންތަކުގައި 77 އިން ފެށިގެން 89 އާ ހަމައަށް ސިފައިންގެ އަދަދު ދައްކާ އިރު، އެއަށް ވުރެ އިތުރުވުމަކީ ވެސް އެކަށީގެންވާ ކަމެއް ކަމުގައި ރައީސް މުއިއްޒު ވަނީ ވިދާޅުވެފަ އެވެ.

މަޖިލިހަށް ހުށަހެޅި ކުއްލި މައްސަލަ އަށް ބަހުސް ކުރައްވަމުން މަޖިލިހުގައި ވެރިކަން ކުރާ ޕާޓީ ތަމްސީލް ކުރައްވާ ހަމައެކަނި ދެ މެމްބަރުންގެ ތެރެއިން ނަސީމް ވިދާޅުވީ ރާއްޖޭގައި އިންޑިއާ ސިފައިން ތިބި މިންވަރު މި ސަރުކާރުން ހާމަކުރާނެ ކަމަށެވެ. އެކި މުއައްސަސާތަކުން ހާމަކޮށްފައި ވަނީ އެކި އަދަދުތައް ކަމަށާއި އެއްވެސް ލިޔުމަކާ ނުލައި ވެސް ބައެއް ސިފައިން ތިބި ކަމަށް ތުހުމަތު ކުރެވޭ ކަމަށް ވެސް ނަސީމް ވިދާޅުވި އެވެ.

ޕީއެންސީން މަޖިލީހުގެ ސުޕަ މެޖޯރިޓީ ހޯދާނަން: ރައީސް މުއިއްޒު

ވެރިކަން ކުރާ ޕީއެންސީން މަޖިލީހުގެ ސުޕަމެޖޯރިޓީ ހޯދާނެ ކަމަށް އެ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ. ޕީއެންސީގެ އޮފީސް ހުޅުވުމަށް މިރޭ ބޭއްވި ޖަލްސާގައި ރައީސް މުއިއްޒު ވިދާޅުވީ ޕީޕީއެމާ ގުޅިގެން އެ ޕާޓީން މަޖިލީސް އިންތިހާބުގެ ތައްޔާރީތައް ކުރިއަށްގެންދާނެ ކަމަށެވެ.

ފްލެޓް މައްސަލާގައި އަޑު ގަދަކުރީ 10 މީހުން، ފްލެޓް ދިނުން އޭސީސީއަށް ނުހުއްޓުވޭނެ

ރައީސް އިބްރާހިމް މުހައްމަދު ސޯލިހުގެ ސަރުކާރުން ކުރިއަށް ގެންދިޔަ ގެދޮރުވެރިޔާ ސްކީމްގެ ދަށުން ފްލެޓް ލިބޭ މީހުންގެ ލިސްޓް އާންމުކުރުމުން އެ ލިސްޓާ މެދުގައި ހިތްހަމަނުޖެހުން ފާޅުކުރީ އެންމެ ދިހަ މީހުން ކަމަށާއި ފްލެޓް ދިނުން އޭސީސީއަށް ނުހުއްޓުވާނެ ކަމަށް ކުރީގެ ސަރުކާރުގެ ފްލެޓް ކޮމިޓީގެ ޗެއާމަންކަން ކުރެއްވި އަކްރަމް ކަމާލުއްދީން އިއްޔެ ވިދާޅުވެއްޖެ އެވެ.

ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް މިފަދައިން ވިދާޅުވީ ކުރީ ސަރުކާރުން އެކުލަވާލި ފްލެޓް ލިސްޓުގެ މައްސަލައާ ގުޅިގެން މަޖިލީހަށް ހުށަހަޅާފައިވާ ޕެޓިޝަނާ ގުޅިގެން މަޖިލީހުގެ ޕެޓިޝަން ކޮމެޓީގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.

އަންނަ ހަފްތާގައި ރައީސް އަތޮޅުތަކަށް ދަތުރުތައް ފައްޓަވަނީ

އަންނަ ހަފްތާގައި އަތޮޅުތެރެއަށް ދަތުރުތައް ރައީސް މުހައްމަދު މުއިއްޒު ފެއްޓެވުމަށް ނިންމައިފި އެވެ.

މިއީ ރިޔާސީ އިންތިހާބު ކާމިޔާބު ކުރެއްވުމަށް ފަހު ރައީސް މުއިއްޒު އަތޮޅު ތެރެއަށް ކުރައްވާ ފުރަތަމަ ދަތުރެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ ރައްޔިތުންގެ ޚިޔާލާއި މަޝްވަރާއާ އެކު މަސައްކަތް ކުރެއްވުމަށް ރައްޔިތުންނާ ބައްދަލުކުރެއްވުމަށް ކުރިއަށް އޮތް ހަފްތާގެ ތެރޭގައި ދަތުރުތައް ފެއްޓެވުމަށް ހަމަޖެހިފައިވާ ކަމަށެވެ.

މަޖިލިހުގެ ތިން ވަނަ ދައުރު މި މަހުގެ 18 އަށް ދަންމާލަން ނިންމައިފި

ރައްޔިތުންގެ މަޖިލީހުގެ މި އަހަރުގެ ތިން ވަނަ ދައުރު ދަންމާލަން މަޖިލިހުގެ ރައީސް މުހައްމަދު އަސްލަމް ނިންމަވައިފި އެވެ.

މަޖިލިހުގެ މިއަދުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލިހުގެ ރައީސް މުހައްމަދު އަސްލަމް ވިދާޅުވީ މި މަހުގެ 18 ވަނަ ދުވަހާ ހަމައަށް މި ދައުރު ކުރިއަށް ގެންދަން ބޭނުންފުޅުވާ ކަމަށެވެ.

ހިޔާ ފްލެޓުގައި މީހަކަށް ތޫނު އެއްޗަކު ހަމަލާދީ، ޒަހަމްކޮށްލައިފި

ހިޔާ ފްލެޓް ސަރަހައްދުގައި އިތުރު މާރާމާރީއެއް ހިންގައި ތޫނު އެއްޗަކުން ހަމަލާދީ މީހަކު ޒަހަމްކޮށްލައިފި އެވެ.

ފުލުހުން މީޑީއާތަކަށް ފޮނުވި މެސެއްގައި ބުނެފައިވަނީ ހިޔާ ފްލެޓް އެޗް6ގެ އެޕާޓްމަންޓެއްގައި މީހަކަށް ތޫނު އެއްޗަކުން ހަމަލާދީފައިވާ ކަމުގެ ރިޕޯޓު އެ އިދާރާއަށް ވަނީ ލިބިފައިވާ ކަމަށެވެ. މިހާރު އެސަރަހައްދުގައި ފުލުހުން ހަރަކާތްތެރިވަމުން އަންނަ ކަމަށްވެސް ފުލުހުން ބުނެ އެވެ.

ޑެޕިއުޓީ މިނިސްޓަރުގެ މަގާމަށް އިތުރު ނުވަ މީހަކު އައްޔަންކޮށްފި

ޑެޕިއުޓީ މިނިސްޓަރުގެ މަގާމަށް އިތުރު ނުވަ މީހަކު، ރައީސް ޑރ. މުހައްމަދު މުއިއްޒު އައްޔަންކުރެއްވީ ވެސް އިއްޔެ އެވެ.

ރައީސް އޮފީހުގެ ވެބްސައިޓުގައި ވަނީ، މިނިސްޓަރުންގެ ނައިބުގެ މަގާމަށް އައްޔަންކުރެއްވި މި ނުވަ ބޭފުޅުންގެ ތަފުސީލް ހާމަކޮށްފަ އެވެ.

ޑެޕިއުޓީ މިނިސްޓަރަކަށް މުސާރަ އާއި އެލަވަންސްގެ ގޮތުގައި ކޮންމެ މަހަކު ލިބިވަޑައިގަންނަވާނީ 35،500ރ. އެވެ. އެއީ 20،500ރ. ގެ މުސާރަ އާއި 15،000ރ. ގެ އެލަވަންސެކެވެ.

މީގެ ކުރިން ވެސް ޑެޕިއުޓީ މިނިސްޓަރުގެ މަގާމަށް ބޭފުޅުން ވަނީ އައްޔަން ކޮށްފަ އެވެ. ރައީސް އޮފީހުގެ ވެބްސައިޓްގައިވާ ގޮތުން ޑެޕިއުޓީ މިނިސްޓަރުގެ ގޮތުގައި ތިބީ 59 ބޭފުޅުނެވެ