އަންނަ މަހު ރިލީޒްކުރަން ހަމަޖެހިފައިވާ ފިލްމު "ޗަންދޫ ޗެމްޕިއަން" ގައި ބޮލީވުޑްގެ މަޝްހޫރު އެކްޓަރު ކާތިކްް އާރިއަން ފެނިގެންދާނެ ގޮތް ބެލުންތެރިންނަށް ދައްކާލައިފި އެވެ.

އަންނަ މަހު 14 ގައި ރިލީޒްކުރުމަށް ހަމަޖެހިފައިވާ މިފިލްމަށް ކާތިކްގެ ހަށިގަނޑަށް ވަނީ ބޮޑު ބަދަލެއް ގެނެސްފަ އެވެ.

ކާތިކްގެ ހަށިގަނޑަށް ގެނެސްފައިވާ ބަދަލުތައް ފެންނަ ޕޯސްޓަރު އާންމުކޮށްފައިވާއިރު ފުރަތަމަ ޕޯސްޓަރުން ކާތިކް ފެނިގެންދަނީ އަނަރޫފަ ހަށިގަނޑަކާ އެކީ ދުވާ ތަނެވެ. އަނެއް ޕޯސްޓަރުގައި ކާތިކް ފެނިގެންދަނީ ވަރުގަދަ ހަށިގަނޑަކާ އެކީ ބޮކްސިން ރިންގްގައި އުޅޭ ތަނެވެ.

"ޗަންދޫ ޗެމްޕިއަން" ގެ ޑައިރެކްޓަރު ކަބީރް ސިންގް ބުނި ގޮތުގައި މި ފިލްމަށް ކާތިކް ހަށިގަނޑަށް ގެނެސްފައިވާ ބަދަލަކީ އޭނާގެ ބުރަ މަސައްކަތް ކަމަށެވެ. އަދި މިއީ އެއްވެސް ބޭހަކާ ނުލައި ކާތިކް ގެނެސްފައިވާ ބަދަލެއް ކަމަށް ވެސް ކަބީރް ބުންޏެވެ.

https://www.instagram.com/p/C7BIXizoWDr/?utm_source=ig_embed&ig_rid=df2eb50f-a841-40ef-9d14-0c087b5035b8

މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "ޗަންދޫ ޗެމްޕިއަން" އަކީ ސާޖިދު ނަދިއަދުވާލާ ޕްރޮޑިއުސްކުރި ފިލްމެކެވެ.

މި ފިލްމުގައި ގެނެސްދޭ ވާހަކަ ބިނާކޮށްފައިވަނީ 1970 ވަނަ އަހަރުގެ ކޮމަންވެލްތު ގޭމްސް އަދި 1972 ވަނަ އަހަރު ޖަރުމަނީގައި ބޭއްވި ޕެރަލިމްޕިކްގައި ރަން މެޑަލް ހޯދި ކުރީގެ އެތްލީޓް މުރްލީކަންތު ޕެޓްކަރުގެ ހަޔާތުގެ މައްޗަށެވެ.

މިއީ ފިލްމު "ބަޖްރަންގްޖީ ބައިޖާން"، "އޭކް ތާ ޓައިގާ" އަދި "83" ފަދަ ފިލްމުތައް ގެނެސްދީފައިވާ ޑައިރެކްޓަރު ކަބީރާއެކު ކާތިކް މަސައްކަތްކުރި ފުރަތަމަ ފިލްމެވެ.

މި ފިލްމަށް ފަހު މި އަހަރުގެ ނޮވެމްބަރުގައި ކާތިކް ހޮރޯ-ކޮމެޑީ "ބޫލް ބުލައްޔާ 3" ސިނަމާތަކަށް އަންނާނެ އެވެ.