ޑާކްރެއިން އެންޓަޓެއިންމަންޓުން މިއަހަރު އޮލިމްޕަސް ސްކްރީނުގައި އަޅުވާ ބޮޑު ތަރުހީބެއް ލިބުނު ފިލްމު "ފުރޭތަ" މީޑިއާނެޓުގެ ވީޑިއޯ ކްލަބަށް އައުމަށް މިވަނީ ތައްޔާރުވެފަ އެވެ. އެންމެ ފަހުގެ މޮޅެތި އަމިއްލަ އުފެއްދުންތައް ދިވެހިންނާ ހަމައަށް ގެނެސްދިނުމަށް ވީޑިއޯ ކްލަބުން ކުރާ މަސައްކަތުގައި މިއީ ހަމަ ޔަގީނުން ވެސް ފާހަގަކޮށްލެވޭ ފިލްމަކަށް ވެގެންދާނެ އެވެ. ސަބަބަކީ މި ފިލްމު އޮލިމްޕަސް ސްކްރީނުގައި އެޅުވިތާ މާގިނަ ދުވަހެއް ނުވެ އަދިވެސް ދިވެހިން ދެކެފަރިތަ ފިލްމަކަށް ވާތީ އެވެ.

އަލީ ޝިފާއު (ޗިއްޕެ) ޑައިރެކްޓްކޮށްފައިވާ ރިވެންޖް އެކްޝަން ތްރިލާ ޖޮންރާގެ މި ފިލްމުގެ މޮޅު ވާހަކަ މި ފިލްމު ބެލި ކޮންމެ މީހެއްގެ ދުލުން ވެސް ވަރަށް ފުރިހަމައަށް ކިޔައިދެ އެވެ. އަހުމަދު ތޮލާލްގެ ސްކްރީންޕްލޭ އާއި ޑައިލޮގްތަކާއި އަދި ފިލްމުގައި ފެނިގެންދާ ތަރިންގެ އެކްޓިންގްގެ މޮޅުކަމަށް ގިނަ ބަޔަކު ވަނީ ތައުރީފު އޮއްސާލާފަ އެވެ.

މި ފިލްމުގައި ދައްކުވައި ދެނީ ރާއްޖޭގެ މިހާރުގެ ހާލަތެވެ. ކުށުގެ ވެށި އޮތް ގޮތުގެ ސަބަބުން ކުށްތައް ހުއްޓުވަން ފުލުހުން ކުރާ މަސައްކަތެވެ. އެ މަސައްކަތަށް އެހީތެރިވެދޭ އާންމުންގެ މީހަކަށް ގޭންގުތަކުން ކުރިމަތި ކުރުވާ އިންޒާރުތަކާއި ބިރު ދެއްކުންތަކާއި ގަތުލުތަކެވެ. އިންސާފަށް އެދި ކުރަން ޖެހިފައި އޮތް އުނދަގޫ ދަތުރެވެ. އެންމެ ފަހުން ބަދަލު ހިފަން މަޖުބޫރުވެ ކުރެވޭ މަސައްކަތެވެ.

ފިލްމުގެ އެންމެ އިސްރޯލުން ފެނިގެންދަނީ ދިވެހި ފިލްމީ ދާއިރާގައި މިހާރު އެންމެ ފިޔަޖަހަމުން އަންނަ ތަރި ޝަރަފް އެވެ. މި ފިލްމުގެ މަންޒަރުތައް އެންމެ ފުރިހަމައަށް ގެނެސްދިނުމުގައި ޝަރަފްގެ އެކްޓިންގްގެ ކުޅަދާނަކަން ފާހަގަކޮށްލެވެ އެވެ. މޮޅު އެކްޓިންގްގެ ވާހަކަ ދައްކާއިރު ރަވީ ފާރޫގްގެ ނަން ނުބުނެ ދޫކޮށްލެވޭކަށް ނެތެވެ. މި ފިލްމުގައި ވެސް އެކްޓިން ހަމަ އެހާމެ މޮޅީ އެވެ. މީގެ އިތުރުން މުހައްމަދު މަނިކު، އަހުމަދު ސައީދު، އާދަމް ރިޒްވީ، އައިމިނަތް އަސީލާ، ސޫޒަން އަދި ކުޑަކުއްޖެއްގެ ރޯލު އަދާކުރި އަހްމަދު ނީލްގެ އެކްޓިން ވެސް ފާހަގަކޮށްލެވެ އެވެ.

https://www.youtube.com/watch?v=5euojkBfUeY

ސިނަމާގައި ހޯދި ކާމިޔާބީއަށްފަހު މީޑިއާނެޓުގެ ވީޑިއޯ ކްލަބް މެދުވެރިކޮށް މި ފިލްމު ރިލީޒްކުރުމަށް ހަމަޖެހިފައި ވަނީ މި މަހުގެ 30 ވަނަ ދުވަހުން ފެށިގެންނެވެ.

މި އަހަރަކީ ވީޑިއޯ ކްލަބް ސާވިސް އިތުރު ކުރިއެރުންތަކެއް ހޯދަމުން އަންނަ އަހަރެއްކަން ފާހަގަކުރެވެ އެވެ. އެގޮތުން އެންމެ ފަހުގެ ދިވެހި އަމިއްލަ އުފެއްދުންތައް މި ޚިދުމަތް މެދުވެރިކޮށް ދިވެހިންނާ ހަމައަށް މި އަންނަނީ ގެނެސްދެމުންނެވެ. އެގޮތުން ލޯބީގެ ފިލްމު "ނޮވެމްބަރު"، ތްރިލާ ފިލްމު "ނީނާ"، ބިރުވެރި ފިލްމު "ކަޅަކި" އަދި ސައިކޮލޮޖިކަލް ތްރިލާ "ބަވަތި" ވީޑިއޯ ކްލަބުން ވަނީ މިއަހަރު ތެރޭގައި ބެލުންތެރިންނާ ހަމައަށް ގެނެސްދީފަ އެވެ.

ވީޑިއޯ ކްލަބްގެ އެހެން ކޮންޓެންޓްތަކާއެކީ ފުރޭތަ ފިލްމު ވެސް ވީޑިއޯ ކްލަބް މެދުވެރިކޮށް ޓީވީ އަދި މޯބައިލް ސްކްރީންތަކުން ބަލާލެވޭނެ އެވެ. ރާއްޖެއިން ބޭރުގައި ދިރިއުޅުއްވާ ފަރާތްތަކަށް ވެސް އެމްއެސް ލައިޓް ގްލޯބަލް މެދުވެރިކޮށް ޓީވީއިން އަދި އެމްއެސް ޑިޖިޓަލް ގްލޯބަލް މެދުވެރިކޮށް މޯބައިލް ސްކްރީންތަކުން ބަލާލެވޭނެ އެވެ.