ރައްޔިތުންގެ މަޖިލީހުގައި ކޮމިއުނިކޭޝަން މިނިސްޓަރު މުހައްމަދު މަލީހުގެ އިތުބާރުނެތް ކަމުގެ ވޯޓު މިއަދު ނެގިއިރު އިދިކޮޅު ޕީޕީއެމް އާއި ޕީއެންސީގެ ތިން މެމްބަރަކު އެމްޑީޕީގެ ތްރީލައިން ވިޕާ އެއްގޮތަށް ވޯޓު ދެއްވައިފި އެވެ.

މަލީގެ އިތުބާރު ނެތްކަމުގެ މައްސަލާގައި އެމްޑީޕީން ބޭނުންވި ގޮތަށް ވޯޓު ދެއްވީ ނައިފަރު ދާއިރާގެ ޝިޔާމްގެ އިތުރުން ގުރައިދޫ ދާއިރާގެ މެމްބަރު އިބްރާހިމް ރިޒާ އާއި ޕީއެންސީގެ ނައިބު ރައީސް އަދި މާވަށު ދާއިރާގެ މެމްބަރު މުހައްމަދު ސައީދު އެވެ. މަޖިލީހުގައި ޕީއެންސީގައި ތިއްބަވަނީ ދެ މެމްބަރުންނެވެ. އެއީ ސައީދުގެ އިތުރުން ފެލިދޫ ދާއިރާގެ މެމްބަރު އިބްރާހިމް ފަޒުލް އެވެ. ފަޒުލް އެ ވޯޓުގައި ބައިވެރިވެވަޑައިނުގަންނަވަ އެވެ.

ގުރައިދޫ ދާއިރާގެ މެމްބަރު އިބްރާހިމް ރިޒާ.
މާވަށު ދާއިރާގެ މެމްބަރު މުހައްމަދު ސައީދު

ޕީޕީއެމްގެ މެމްބަރުންގެ ތެރެއިން މަޑުއްވަރީ ދާއިރާގެ މެމްބަރު އާދަމް ޝަރީފާއި އޭދަފުށީ ދާއިރާގެ މެމްބަރު އަހުމަދު ސަލީމް، މަހިބަދޫ ދާއިރާގެ މެމްބަރު އަހުމަދު ތޯރިގު އާއި ގުރައިދޫ ދާއިރާގެ މެމްބަރު ޣައްސާން މައުމޫން އަދި ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު ވެސް ވޯޓުގައި ބައިވެރިވެވަޑައިނުގަންނަވަ އެވެ. މީގެ އިތުރުން ޖުމްހޫރީ ޕާޓީގެ ކެންދޫ ދާއިރާގެ މެމްބަރު އަލީ ހުސެއިން ވެސް ވޯޓުގައި ބައިވެރިވެވަޑައި ނުގަންނަވަ އެވެ.

މި ވޯޓުގައި އެމްޑީޕީގެ ފުވައްމުލަކު ދެކުނު ދާއިރާގެ މެމްބަރު މުހައްމަދު މުމްތާޒު ވެސް މަޖިލީހަށް ވަޑައިނުގަންނަވަ އެވެ. އަދި ތިމަރަފުށީ ދާއިރާގެ މެމްބަރު އަބްދުﷲ ރިޔާޒް ވޯޓު ދެއްވީ މަލީހު މަގާމުން ވަކިކުރަން ނުފެންނަ ކަމަށެވެ.

މިނިސްޓަރު މަލީހުގެ އިތުބާރު ނެތްކަމުގެ މައްސަލާގައި ވިލިމާލެ ދާއިރާގެ މެމްބަރު އަހުމަދު އުޝާމް އާއި ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ އާއި މިނިވަން މެމްބަރު ތުލުސްދޫ ދާއިރާގެ މެމްބަރު އިބްރާހިމް ނަސީމް އަދި ނިލަންދޫ ދާއިރާގެ މެމްބަރު އަބްދުލް މުހުސިން ހަމީދު ވެސް ވޯޓުގައި ވަކިކޮޅަކަށް ނުދެއްވަ އެވެ.