ރައްޔިތުންގެ މަޖިލީހުގެ ފުވައްމުލަކު މެދު ދާއިރާގެ ޕީއެންސީގެ މެމްބަރު އަލީ ފަޒާދުގެ ރަހުނު ހިމެނޭ ލޯނުގެ މައްސަލައެއް ކޯޓުން ބޭރުގައި ހައްލު ކުރަން ނިންމައިފި އެވެ.

އެ މައްސަލައަކީ މެންބަރު ފަޒާދުގެ އަނބިކަނބަލުން އައިޝަތު އަނީސްގެ ނަމުގައި ރަޖިސްޓްރީ ކޮށްފައިވާ ކުންފުންޏެއް ކަމަށްވާ ކިޔަވާ މޯލްޑިވްސް ޕްރައިވެޓް ލިމިޓެޑަށް އެމްޑީޕީގެ ވެރިކަމުގައި އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަނުން ނަގާފައިވާ 3.6 މިލިއަން ރުފީޔާގެ ލޯނެއް ނުދައްކައިގެން އެ ކޯޕަރޭޝަނުން ކޯޓަށް ހުށަހެޅި މައްސަލައެކެވެ. އެ ލޯނަށް ގެރެންޓީ ދީފައިވަނީ ފަޒާދުގެ ދެމަފިރިންނެވެ. ފަހުން އެ ކުންފުނީގެ ހިއްސާދާރެއްގެ ގޮތުގައި ވެސް ފަޒާދު ހިމެނެ އެވެ.

އެސްޑީއެފްސީން ކޯޓުގައި އެދިފައިވަނީ ލޯނު އެއްބަސްވުމާ، ދައުވާ ލިބޭ ފަޒާދު، އޭނާގެ އަނބިކަނބަލުން އަދި ކުންފުނިން ހިލާފުވެފައިވާތީ ލޯނަށް ފައިސާ ނުދައްކާކަން ކަނޑައަޅައި، އެ ފައިސާއާ މެދު ފަޒާދު އާއި އޭނާގެ އަނބިކަނބަލުން ޒިންމާވާން ޖެހޭނެ ކަމަށް ކަނޑައަޅައި، އަދި ރަހުނު ވިއްކާލުމުގެ ހުއްދަ ހޯދުމަށެވެ.

މި މައްސަލައިގައި ކޯޓުން ނިންމީ އެ ފައިސާ ދެއްކުމާމެދު، ފަޒާދު އާއި އޭނާގެ އަނބިކަނބަލުން އަދި ކުންފުނިން އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަނާއެކު ވާހަކަ ދައްކަމުންދާތީ އެ ފަރާތްތަކުން އެދިފައިވާ ގޮތަށް ދައުވާ އަނބުރާ ފޮނުވާލުމަށެވެ.

މި މައްސަލައިގައި ދަރަނި ސާބިތުވެ ހުކުމާއި ހަމައަށް ދިޔަނަމަ މެންބަރު ފަޒާދުގެ ގޮނޑި ގެއްލޭނެ އެވެ. ރައްޔިތުން މަޖިލިސް މެންބަރަކު ސާބިތު ދަރަންޏަށް ފައިސާ ނުދެއްކުމަކީ ގޮނޑިގެއްލޭނެ ކަމެކެވެ. މީގެ ކުރިން ވެސް އޭނާ ވަނީ ތިމަރަފުށީ ދާއިރާގެ ކުރީގެ މެމްބަރު އަބްދުﷲ ރިޔާޒް އަތުން ނެގި އެއްލައްކަ ރުފިޔާގެ މައްސަލައެއް ވެސް އޮތް ކޯޓުން ބޭރުގައި ހައްލުކޮށްފަ އެވެ. އެ މައްސަލަ ނިންމީ ވެސް އޭނާ އިންތިހާބުވި ފަހުންނެވެ.