2020 ވަނަ އަހަރު މުޅި ދުނިޔެއަށް ކުރިމަތިވެފައި އޮތް ކޮވިޑް 19 ޕެންޑެމިކްގެ ތެރޭގައި ހޮލީވުޑްގެ ތަރި އެލް ޕަސީނޯއަށް ކުރެވުނު މަރުގެ ތަޖުރިބާ ހިއްސާ ކޮށްފި އެވެ.

އެލް ޕަސީނޯގެ ކުރިއަށް އޮތް ފިލްމު "ސޮނީ ބޯއީ"ގެ އިވެންޓެއްގައި ވާހަކަ ދައްކަމުން އޭނާ ބުނީ ކޮވިޑްގައި އޭނާއަށް ކުރެވުނީ މަރުގެ ތަޖުރިބާއެއް ކަމަށް ބުނެފަ އެވެ.

އެގޮތުން ކޮވިޑްގައި އޭނާގެ ހާލު ދެރަވެ ވިންދު ގެއްލިގެންވެސް ވަގުތުތަކެއް ހޭދަވި ކަމަށާއި މަރުން ސަލާމަތްވީ ހަމަ ކިރިޔާ ކަމަށް އެލް ޕަސީނޯ ބުންޏެވެ.

"އެކަން ވީ ހަމަ ކުއްލިއަކަށް. ލޯ ހުޅުވުނުއިރު ވަށައިގެން ތިބީ ޑޮކްޓަރުން އެލާޓްގައި. އެއީ ބިރުވެރި ތަޖުރިބާއެއް" އެލް ޕަސީނޯ ބުންޏެވެ.

އޭނާ އިތުރަށް ބުނީ އެ ތަޖުރިބާއަށްފަހު މަރާމެދު އޭނާ ދެކޭ ގޮތް ވަރަށް ބޮޑަށް ބަދަލުވި ކަމަށެވެ. އެގޮތުން ހެޔޮލަފާ ދަރިންތަކެއް ދޫކުރެވުނީތީ އުފާވާ ކަމަށާއި އޭނާ މަރުވުމަށްފަހު ދިރިތިބި މީހުން އޭނާ ހަނދާން ކުރާނެ މަސައްކަތްތަކެއް ކުރެވުނީތީ ވެސް ހިތްހަމަޖެހޭ ކަމަށެވެ.

އެލް ޕަސީނޯއަކީ ހޮލީވުޑްގެ އެންމެ ކުރީ ސަފުގައި ގުނާލެވޭ ތަރި އެކެވެ. އޭނާގެ ފިލްމުތަކަކީ ބެލުންތެރިންގެ ބޮޑު ތަރުހީބެއް ލިބުނު ފިލްމުތަކެކެވެ.