ހުޅުމާލޭގެ އެންމެ އަގުބޮޑު އެއް އޭރިއާގައި ވެމްކޯގެ ކުނިތައް ޖަމާކުރާނެ ބޮޑު ކުނިގޮނޑެއް ހަދަން ނިންމައިފި އެވެ.

ވެމްކޯ އިން ހުޅުމާލޭގައި ވެސްޓް ޓްރާންސްފާ ސްޓޭޝަނެއް ހަދަން ނިންމި ބިން މިހާރު ބޭނުންކުރަނީ އެމްޕީއެލް އިން ހުސް ކޮންޓެއިނަރު ބެހެއްޓުމަށެވެ. އަދި އެ ސަރަހައްދަކީ މެރީނާ ވިއު އެޕާޓްމަންޓްސް އާއި ރެނާޓަސް އެޕާޓްމަންޓްސް އާއި ސޮލިޓަޔާ އެޕާޓްމަންޓްސް އަދި ރެއިންބޯ އިން ހަދާ އޮފީސް ބިލްޑިންގް ހިމެނޭ ހުޅުމާލޭގެ އެންމެ އަގުބޮޑު އެއް އޭރިއާ އެވެ.

އެންވަޔަރަންމަންޓް މިނިސްޓަރުގެ ނައިބު އަހުމަދު ނިޒާމް ސޮއިކުރައްވައި މިމަހުގެ ތިންވަނަ ދުވަހު އެމްޕީއެލްއަށް ފޮނުވި ސިޓީއެއްގައި ވަނީ ހުޅުމާލޭގައި ވެސްޓް ޓްރާންސްފާ ސްޓޭޝަނެއް ހެދުމަށް ހުޅުމާލޭގެ ފޭސް 1ގެ ލޮޓް ނަމްބަރު 11877 ގެ ބިން މިމަހުގެ 17ގެ ނިޔަލަށް ހުސްކޮށް ދިނުމަށް އެދޭ ކަމަށެވެ.

ހުޅުމާލޭގައި ވެމްކޯއިން ކުނިގޮނޑު ހަދަން ނިންމާފައިވާ ސަރަހައްދު އަންގައިދޭ ޗާޓެއް.

މިކަމާ ގުޅިގެން އެ ސަރަހައްދުގައި ދިރިއުޅޭ މީހުން ގެންދަނީ ނުރުހުން ފާޅުކުރަމުންނެވެ.

"މި ބަޔަކު ކުނިކޮއްޓެއް އަޅާ ކަހަލަ ސަރަހައްދެއް ނޫން. މިތަނުގެ ކުރިމަތީގައި މިހާރު ވެސް ކޮންޓެއިނަރުތަކެއް ބަހައްޓައި އަދި ޑްރައިވިން ސްކޫލްތައް ހިންގާތީ ވެސް އަޅުގަނޑުމެންނަށް ވަރަށް ބޮޑު އުނދަގުލަކަށްވޭ،" މެރީނާ ވިއު އެޕާޓްމަންޓްސްގައި ދިރިއުޅޭ މީހަކު ބުންޏެވެ.

އޭނާ ބުނިގޮތުގައި އެ ސަރަހައްދުގައި ކުނި ކޮއްޓެއް ހެދުމުން އެތަނުގެ ކައިރީގައި ދިރިއުޅޭ މީހުންނަށް ވަރަށް ބޮޑު އުނދަގުލަކަށްވާނެ އެވެ. އަދި ހުޅުމާލޭގައި ކުނިކޮއްޓެއް ހެދުމަށް އިންޑަސްޓްރިއަލް އޭރިއާއިން ބިމެއް ހަމަޖެއްސުމަށް އެ މީހުން އެދެ އެވެ.

"މިތަނުން އަޅުގަނޑުމެން އެތައް މިލިއަން ރުފިޔާ ދީފައި އެޕާޓްމަންޓް ގަތީ ޖެހިގެން އަންނަ ދުވަހު ގޭ ދޮރުމަތީގައި ގޮނޑެއް ހަދާނެ ކަމަށް ބަލާފައެއް ނޫން. މިހެން ހެދުމުން އެޗްޑީސީގެ އެއްވެސް ޕްލޭނެއް ނެތްކަން މި އެނގެނީ،" އެ ސަރަހައްދުގައި ދިރިއުޅޭ މީހަކު ބުންޏެވެ.