ސުޕްރީމް ކޯޓުގެ ފަނޑިޔާރު އަބްދުލް ޣަނީ މުހައްމަދު ހިމެނޭހެން ޓެކްސް އެޕީލް ޓްރައިބިއުނަލްގެ މެމްބަރުކަމަށް ކުރިމަތިލި ހަތަރު ބޭފުޅަކަށް ރައްޔިތުންގެ މަޖިލީހުން ރުހުންދީފި އެވެ.

މެންބަރުކަމުގެ މަގާމަށް ޖުމްލަ 13 މެންބަރެއްވަނީ ކުރިމަތިލައްވާފައެވެ. އަދި މި 13 ބޭފުޅުންގެ ނަންވެސް ރައީސުލްޖުމްހޫރިއްޔާ ވަނީ މަޖިލީހަށް ފޮނުއްވާފަ އެވެ. އޭގެ ތެރެއިން ކޮމެޓީ ސްޓޭޖްގައި 7 ބޭފުޅެއްގެ ނަން ވަނީ ޝޯޓްލިސްޓްކޮށް ތަޅުމަށް ފޮނުވާފަ އެވެ. މަޖިލީހުން ވަނީ ކޮންމެ ނަމަކަށް ވަކިވަކިން ވޯޓަށް އަހާ 4 ބޭފުޅަށް ރުހުން ދީފަ އެވެ.

މެމްބަރުކަމަށް ރުހުންދިން ބޭފުޅުންނަކީ

  • ހަސަން ޒުހައިރު މުހައްމަދު، ގ. މާވާރުލު
  • އިބްރާހީމް ޝަރީފް، ގ. އަލިޝާ
  • ޝިފްޒާ ޢަބްދުލްގައްޔޫމް، ގަސްދޮށުގެ، ގއ. ނިލަންދޫ
  • އަބްދުލް ޣަނީ މުހައްމަދު، ހ. ހޯސްޓްސައިޑް

މި ސަރުކާރުން ވަނީ ޓެކްސް އެޕީލް ޓްރައިބިއުނަލްގައި ކުރިން ތިއްބެވި 4 މެންބަރަކު ވަކިކޮށްފަ އެވެ. އަދި މިއަދު ރުހުން ދީފައިވަނީ ހުސްވި މަގާމުތަކަށެވެ.

މަޖިލީހުގެ ލަފައާ އެއްގޮތަށް ރައީސުލްޖުމްހޫރިއްޔާ ޓެކްސް އެޕީލް ޓްރައިބިއުނަލް އިން ވަކިކުރައްވާފައި ވަނީ އެ ޓްރައިބިއުނަލްގެ ރައީސް މުހައްމަދު މުނައްވަރު އަލީ އާއި، ނައިބު ރައީސް ހުސައިން ޒައިދާން ޖަލީލާއި، މެމްބަރު އަހުމަދު އަޝްރަފާއި، މެމްބަރު ހަދީޖާ ނައީމް އެވެ.