ޝްރައްދާ ކަޕޫރުއާއި އަދިތުޔާ ރޯއީ ކަޕޫރަކީ 2013 ވަނަ އަހަރު ނުކުތް ކާމިޔާބު ލޯބީގެ ފިލްމު "އާޝިގީ 2"ގެ ލީޑު ރޯލުތަކުން އެކުގައި ފެނުނު ދެ ތަރިންނެވެ.

އެ ފިލްމަށް ލިބުނު ކާމިޔާބާއެކު ދެ ތަރިންގެ މެދުގައި ގާތް ރަހުމަތްތެރިކަމެއް އުފެދި މިއަދާ ހަމައަށް ވެސް އެ ރަހުމަތްތެރިކަން ދެމި އެބަ އޮތެވެ.

އެހެން ނަމަވެސް ދާދި ފަހުން ދިމާވި ކަމަކުން ޝްރައްދާއާއި އަދިތުޔާގެ އެކުވެރިކަމަށް ގިނަ ބަޔަކު ވަނީ ސުވާލު އުފައްދަން ފަށާފަ އެވެ.

މިހާރު އިންޓަނެޓުގައި ދައުރުވަމުން އަންނަ ވީޑިއޯއެއްގައި ފެންނަނީ އަދިތުޔާއާ ވަރަށް ވައްތަރު މީހަކު އެއާޕޯޓުގެ ތެރެއިން ޝްރައްދާއާ ބައްދަލުވެ ސެލްފީއަކަށް އެދޭ މަންޒަރެވެ.

ޝްރައްދާ އެ ސަޕޯޓަރަށް ބަލަންހުރި ގޮތުން އޭނާއަކީ އަދިތުޔާ ކަމަށް ހީވެ ޔަގީން ކުރަން ބަލަހައްޓައިގެން ހުރީ ކަމަށް ގިނަ ބަޔަކު އަންނަނީ ބުނަމުންނެވެ.

"ޝްރައްދާއަށް ވެސް އަދިތުޔާ އޮޅުނީތަ؟ އެހެން ވަރަށް ހީވޭ!" އެ ވީޑިއޯއަށް ކޮމެންޓްކުރި މީހަކު ބުނެފައިވެ އެވެ.

"އާޝިގީ 2"އަށްފަހު އެ ދެ ތަރިން ވަނީ 2017 ވަނަ އަހަރު ނުކުތް ފިލްމު "އޯކޭ ޖާނޫ"އިން ވެސް އެކުގައި ފެނިގެން ގޮސްފަ އެވެ.