ޔުނައިޓެޑް އަރަބް އެމިރޭޓްސްގެ ޝާރްޖާއިން ވެލާނާ އިންޓާނޭޝަނަލް އެއާޕޯޓް (ވީއައިއޭ) އަށް އެއާ އެރޭބިއާގެ ސީދާ ދަތުރުތައް މިއަދު ފަށައިފި އެވެ.

އެއާ އެރޭބިއާގެ ފުރަތަމަ ފްލައިޓް ވެލާނާ އިންޓަނޭޝަނަލް އެއާޕޯޓަށް ޖައްސާފައި ވަނީ މިއަދު މެންދުރު 01:28 ގަ އެވެ. މިފްލައިޓަށް މަރުހަބާ ކިޔުމުގެ ގޮތުން ވަނީ ރަސްމިއްޔާތެއް ބާއްވާފަ އެވެ.

މި ރަސްމިއްޔާތުގައި ރާއްޖެއިން ޔުނައިޓެޑް އަރަބް އެމިރޭޓްސްއަށް ކަނޑައަޅާފައިވާ ޑެޕިއުޓީ އެމްބެސަޑަރު ހަސަން ވަހީދާއި އެއާ އެރޭބިއާގެ ޔޫއޭއީގެ އޭރިއާ މެނޭޖަރު ޝަހްޒަދް ނަގްވީ އާއި އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުހައްމަދުގެ އިތުރުން ކުންފުނީގެ އިސްބޭފުޅުންނާއި ސްޓޭކްހޯލްޑަރުން ބައިވެރިވެވަޑައިގެންނެވި އެވެ.

އެމްއޭސީއެލްގެ އެމްޑީ ޝަރީފް ވިދާޅުވީ ވެލާނާ އިންޓަނޭޝަނަލް އެއާޕޯޓާއި ޝާރްޖާއާއި ދެމެދު ސީދާ ދަތުރުތައް ފެށުމަކީ މެދުއިރުމަތީގެ އިތުރުން ދުނިޔޭގެ ގިނަ ސިޓީތަކާއި ރާއްޖެއާއި ދެމެދު ފަސޭހައިން ދަތުރުކުރެވޭނެ މަގު ހުޅުވިގެންދާނެ ކަމެއް ކަމަށެވެ. އަދި މިގޮތަށް އުފެދޭ އިތުރު ކޮންމެ ކަނެކްޝަނަކާއެކު ސަރަޙައްދީ ވައިގެ ދަތުރުފަތުރާއި ދުނިޔޭގެ މި ސިނާއަތުގައި ވެސް ވެލާނާ އިންޓަނޭޝަނަލް އެއަރޕޯޓްގެ މަގާމު ރަނގަޅުވެގެންދާނެ ކަމަށް އޭނާ ވިދާޅުވި އެވެ.

އެއާ އެރޭބިއާގެ މިފްލައިޓަކީ ޝާރްޖާއިން ދިވެހި ރާއްޖެއައް ސީދާ ދަތުރުކުރަން ހަމަޖެހިފައިވާ ފުރަތަމަ ފްލައިޓެވެ. ޝާރްޖާއާއި ވީއައިއޭއާ ދެމެދު އެއާ އެރޭބިއާއިން ދުވާލަކު ފްލައިޓެއް އޮޕަރޭޓްކުރުމަށް ވަނީ ނިންމާފަ އެވެ. މިދަތުރުތަކުގައި ބޭނުންކުރާނީ އެއާބަސް އޭ320 މަރުކާގެ މަތިންދާބޯޓެވެ.

އެއާ އެރޭބިއާއަކީ މެދުއިރުމައްޗާއި އުތުރު އެފްރިކާ ސަރަހައްދުގެ ފުރަތަމަ އަދި އެންމެ ބޮޑު ލޯ-ކޮސްޓް ކެރިއާ އެވެ. މި އެއާލައިނުން މެދުއިރުމަތި، އުތުރު އެފްރިކާ، އޭޝިއާ އަދި ޔޫރަޕްގެ 170 އަށްވުރެ ގިނަ މަންޒިލަށް ދަތުރުކުރެ އެވެ.