ހަރަދު ކުޑަކުރަން ސަރުކާރުން މުވައްޒަފުންގެ މުސާރަ ކަނޑަން ނިންމާފައި ވަނިކޮށް ރައީސް މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު ޓެންޒެނިޔާއަށް ކުރައްވާ ރަސްމީ ދަތުރުފުޅެއްގައި ރޭ ފުރާވަޑައިގެންފި އެވެ.

ދައުލަތުގެ ފައިސާއިން ހަރަދުކޮށްގެން ރައީސުންގެ އަނބިއަނބި ކަނބަލުން ރަސްމީ ދަތުރުފުޅުތަކުގައި ގައުމުން ބޭރުގެ ރަސްމިއްޔާތުތަކަށް ވަޑައިގަތުމަކީ މީގެ ކުރިން އާއްމުކޮށް ކޮށް އުޅުނު ކަމެއް ނޫނެވެ. އަދި ރައީސްގެ އަނބިކަނބަލަކީ ރަސްމީ އެއްވެސް ހައިސިއްޔަތެއް އޮންނަ މީހެއް ވެސް ނޫނެވެ. ގާނޫނުން ކުރަން ކަނޑައަޅާފައިވާ ހަރަދު ފިޔަވައި ދައުލަތުގެ ބަޖެޓުން ރަސްމީ އެއްވެސް ކަމަކަށް ހަރަދެއް އޭނާގެ މައްޗަށް ނުކުރެވޭނެ އެވެ.

ރައީސް އޮފީހުން ބުނިގޮތުގައި އެކަމަނާގެ މި ދަތުރުފުޅަކީ، މޭކް ފައުންޑޭޝަން އެފްރިކާ އޭޝިއާ ލޫމިނަރީގެ 11 ވަނަ އަހަރީ ކޮންފަރެންސްގައި ބައިވެރިވެވަޑައިގަތުމަށްޓަކައި ކުރައްވާ ދަތުރުފުޅެއް ކަމަށެވެ.

މި ދަތުރުފުޅުގައި ކޮންފަރެންސްގެ މަތީފަންތީގެ ފަސްޓް ލޭޑީސް ޕެނަލާއި މޭކް ފައުންޑޭޝަން ފަސްޓް ލޭޑީސް އިނިޝިއޭޓިވް ކޮމިޓީ ބައްދަލުވުމުގައި ވެސް ސާޖިދާ ވާހަކުފުޅުދައްކަވާ ގޮތަށް ހަމަޖެހިފައިވާ ކަމަށް ރައީސް އޮފީހުން ބުނެ އެވެ.

ރައީސް އޮފީހުން ބުނީ މިމަހުގެ 29 އިން 30 އަށް ކުރިއަށްދާ މި ކޮންފަރެންސްގެ 11 ވަނަ ބައްދަލުވުމުގައި އަންހެނުން ބާރުވެރިކުރުވުމާއި ބަލިތައް މެނޭޖްކުރުމާއި އެފްރިކާ އާއި އޭޝިއާގެ އެކި ކަންކޮޅުތަކުގައި ފެންވަރު ރަނގަޅު ސިއްހީ ހިދުމަތްތައް ފުޅާކުރުން ފަދަ މައުޟޫއުތަކާ ގުޅޭ މުހިންމު މަޝްވަރާތައް ކުރިއަށްދާނެ ކަމަށް ރައީސް އޮފީހުން ބުނެ އެވެ.

މޭކް ފައުންޑޭޝަން އަކީ 2017 ވަނަ އަހަރު ޖަރުމަނުގައި އުފެދުނު ލިމިޓެޑް ލައިބިލިޓީ ފައުންޑޭޝަނެކެވެ.