މޯލްޑިވްސް މީޑިއާ ކައުންސިލް (އެމްއެމްސީ) އިން މިދިޔަ ބުދަ ދުވަހުގެ ރޭ ބޭއްވި ނޫސްވެރިކަމުގެ އެވޯޑާ ގުޅޭގޮތުން ދޮގު ބަޔާންތަކެއް ނެރުމަށް ސަރުކާރުން ބައެއް މީޑިއާތަކަށް އަންގައިފި އެވެ.

ސަރުކާރުގެ އޮފިޝަލަކު "ހުރިހާ"އަށް ވިދާޅުވީ ރައީސް ޑރ. މުހައްމަދު މުއިއްޒުގެ ދޮންމަންމައަށް ހެދި އިހާނެތި ގޮތުގެ ތަފްސީލީ ހެއްކާއެކު އަދަދު ނޫހުން ނެރުނު ޑޮކިއުމެންޓްރީއަށް އެވޯޑު ލިބުމުން މުޅި ސަރުކާރު ވަނީ "އެލާޓަށް" ގެނެސްފައި ކަމަށެވެ. އެގޮތުން އެ އެވޯޑުގެ އިންސާފުވެރިކަމާ މެދު ސުވާލު އުފައްދަން އެކި އެކި ކަންކަންކުރުމަށް ރާވާފައިވާ ކަމަށް އޭނާ ވިދާޅުވި އެވެ.

އެ އޮފިޝަލް ވިދާޅުވީ އެރޭވުމުގެ ދަށުން އެވޯޑަށް ކުރިމަތިލީ ބައެއް މީޑިއާތައް ލައްވައި އާންމުންނަށް ތެދުކަމަށް ގަބޫލުކުރެވޭ ދަރަޖައަށް ދޮގު ބަޔާންތަކެއް ނެރުމަށް ސަރުކާރުން އަންގާފައިވާ ކަމަށެވެ.

"މިހާރު ނެރެފައި އޮތް އޯޑަރަކީ ސްކީލާން ޑޮކިއުމެންޓްރީގައި ހުރި ހަގީގަތްތައް ރައްޔިތުންނަށް ގަބޫލުކުރެވިދާނެތީ، އެކަން އެގޮތަށް ވިޔަނުދިނުމަށްޓައި ކުރަންޖެހޭ ކަންކަން ކުރުމަށް ނިންމީ. އެގޮތުން ބައެއް މީޑިއާތައް ލައްވައި ދޮގު ބަޔާން ނެރުމުގެ މަސައްކަތް ލަސްތަކެއް ނުވެ ފަށާނެ،" އޮފިޝަލް ވިދާޅުވި އެވެ.

ސަރުކާރުން ވަނީ އެ އެވޯޑަށް އިންސާފުކުރި ފަނޑިޔާރުންނަށް ބިރުދައްކައިގެ އެ މީހުން ލައްވައި ދޮގު ބަޔާނެއްގައި ސޮއިކުރުވައި ނެރެފަ އެވެ.

"ސީދާ ވަކި ވަކި ފަނޑިޔާރުންނަށް ރައީސް އޮފީހުން ގުޅައިގެން އެ ބަޔާނުގައި ސޮއިކުރުވީ. އަދި އެކި އެކި މަގާމްތަކުގައި ތިއްބެވި ބޭފުޅުންނާ ހަވާލުކޮށްފައި ވަނީ އެ ބަޔާން ވަކި ވަކި ނޫސްވެރިންނަށް ފޮނުވުމަށް،" އޮފިޝަލް ވިދާޅުވި އެވެ.

އެމްއެމްސީން ބޭއްވި ނޫސްވެރިކަމުގެ އެވޯޑު ހަފްލާގައި ނައިބު ރައީސް ހުސައިން މުހައްމަދު ލަތީފާއި ރައީސް އޮފީހުގެ މިނިސްޓަރު އިބްރާހީމް ހަލީލް ބައިވެރިވަނީ. --- ފޮޓޯ: އެމްއެމްސީ

ސަރުކާރުން ދެއްކި ބިރާއެކު ފަނޑިޔާރުން ސޮއިކޮށް އިއްޔެ ވަނީ ކަމުގެ ހަގީގަތް އޮޅޭގޮތަށް ބަޔާނެއް ނެރެފަ އެވެ. އެ ބަޔާނުގައި ދައްކާފައިވާ ވާހަކަތަކަށް ބެލުމުން އެއީ ދޮގު ވާހަކަތަކެއްކަން ފާހަގަވެ އެވެ.

އޮފިޝަލް ވިދާޅުވީ މިހުރިހާ ކަމެއް ކުރުމުގެ ބޭނުމަކީ އެ އެވޯޑު އަތުލުމަށް މަސައްކަތް ކުރުވުން ކަމަށެވެ. އެގޮތުން މީޑިއާ ކައުންސިލްގެ މެންބަރުންގެ ގޮތުގައި ތިބި ސަރުކާރުގެ ވަޒީފާތަކުގައި ތިބި ބައެއް މެމްބަރުންނަށް ސްކީލާން ޑޮކިއުމެންޓްރީއަށް ލިބިފައިވާ އެވޯޑު އަތުލަން ކައުންސިލް ޖަލްސާގައި ވަކާލާތުކުރަން އަންގަން ސަރުކާރުގެ އެންމެ މަތީފަންތީގެ މަޝްވަރާއަކަށްފަހު ނިންމާފައިވާ ކަމަށް އޭނާ ވިދާޅުވި އެވެ.

މީޑިއާ ކައުންސިލުން ނޫސްވެރިކަމުގެ އެވޯޑު ދޭތާ މިއީ 11 ވަނަ ފަހަރެވެ. މި ފަހަރުގެ އެވޯޑު ގޯސްވީ ރައީސް މުއިއްޒުގެ ދޮންމަންމައަށް ހެދި އިހާނެތި ގޮތުގެ ހެއްކާއެކު ނެރުނު ތަހުގީގީ ރިޕޯޓަށް އެވޯޑު ދިނުމުންނެވެ.