ހާލުފޮޅިއޭ ބުނުމުން އެއީ ހދ. ކުޅުދުފުށީގެ ޚާއްސަ ހުދު ހާލުފޮޅިހެން ހީވެދާނެ އެވެ. ދިވެހިންގެ ސަގާފީ ހުދު ހާލުފޮޅި މިހާރު އަންނަނީ ތަފާތު ގޮތްގޮތަށް ބަދަލުވަމުންނެވެ. ކުޅުދުފުށީގެ ހުދު ހާލުފޮޅީގައި ދާދިފަހުން ވަނީ ކުލަ ވެސް ޖައްސާ "މޮޑަން" ކޮށްލާފަ އެވެ. ނަމަވެސް ރަހައަކީ ހަމަ އެއް ރަހަ އެވެ. ތައްޔާރު ކުރަން އެއްކުރަނީ އެކައްޗެކެވެ. މިފަހަރު ގެނެސްދޭން މިއުޅެނީ އަދި މުޅިން ތަފާތު ހާލުފޮޅިއެއްގެ ވާހަކަ އެވެ. އެއީ އއ. މަތިވެރިއަށް ޚާއްސަ، ވަރަށް ހިތްގައިމު ޑިޒައިނަކަށް ހަދާ ހާޅުފޮޅިއެކެވެ. ހަދާގޮތް ވެސް ކުޑަކޮށް ތަފާތެވެ.
މަތިވެރީގައި ހާލުފޮޅި ހެދުމުގައި ވަރަށް މަޝްހޫރު އެރަށު ޕެޝަންފްލާވާ ޝައުނާ އަބްދުލް ޣަފޫރު ބުނިގޮތުގައި މަތިވެރިއަށް ޚާއްސަ ހާލުފޮޅިއަކީ ކާބަފައިންގެ ޒަމާނުއްސުރެ ވެސް އެރަށުގައި ހަދާ ފޮނި ކާއެއްޗެއް ކަމަށެވެ. އެ ރަށުގެ އެންމެންހެން ގޮތަކަށް ކުރާ މިމަސައްކަތް އޭނާ ދަސްކުރީ އެކި މިސްމީހުންގެ ކައިރީގައި އަތްގާތް ކޮށްދިނުމުގައި އުޅުމުގެ ތެރެއިންނެވެ. އޭރު އޭނާގެ އުމުރަކީ 15 ވަރަކަށް އަހަރެވެ. ރަނގަޅު އާމްދަނީއެއް ވެސް ލިބޭ މި މަސައްކަތް އޭނާ ވިޔަފާރިއަށް ކުރާތާ މިހާރު ތިން އަހަރު ވެދާނެ ކަމަށް އޭނާ ބުންޏެވެ. ޝައުނާ ހާލުފޮޅި ހަދާގޮތް ވެސް ކިޔައިދިނެވެ.
"އަޅުގަނޑު ހަތަރު ލާހިފުށަށް އަޅަނީ ދެ ލާހި ހަކުރު. ކޮންމެ ފުށް ލާއްސަކަށް ބިހެއް ވެސް އެއްކުރަނީ. ދެން ފުށާއި ބިހާއި އަދި ހަކުރު އެއްކޮށްލާފައި ފެންއަޅައިގެން ގިރާލާނީ. އަޅުގަނޑު އެއްކުރާ ފުށްގަޑު އެހާ ތަތެއް ނުވާނެ އަދި އެހާ ދިޔައެއް ވެސް ނުވާނެ. މެދުމިންވަރަކަށް ބަހައްޓަނީ. ތަތްކޮށްނާއި ދިޔާކޮށް ފުށްގަނޑު ބަހައްޓާމީހުން އުޅޭ. އޭގައި ހުންނާނީ އެ މީހަކަށް ފަސޭހަ ގޮތެއް. އެއަށްފަހު އޭގައި ގަނޑުވެފައިވާ ތަންކޮޅެއް ހުރެދާނެ ކަމަށްޓަކައި ފުށްކޮޅު ފުރާނާލަނީ،" އޭނާ ބުންޏެވެ.
ދެން އިންޑިއާ މީހުން "ޑޯސާ" ފިހަން ގެންގުޅޭ ތަވައެއްގައި ކަރަންޓު އުނދުން ނުވަތަ ގޭސް އުނދުން މަތީ ފޮޅިތަށް ފިހަލަނީ އެވެ. ފޮޅި ފިހުމަށް ފެންހުސްކުރި 500 މިލި ލީޓަރުގެ ކުޑަ ފުޅިއަކަށް އޮއްސާލަ އެވެ. އެއަށްފަހު ފުޅީގެ މަތިގަނޑު ޖެހުމުގެ ކުރިން ތިން ތަނަކުން މަތިގަނޑު ތޮރުފާލަ އެވެ.
ތަވާ ހޫނުވުމުން ފުޅީގައިވާ ފުށް ތަވާތެރެއަށް ވަށްބުރެއްހެން އޮއްސާއިރު ފައިދިގު މަކުނުގެ ވާތަކެއްހެން ސިފަވާނެ އެވެ. ވަށްބުރު ހަމަވުމުން އޭގެ މައްޗަށް ފުށްއޮއްސައި ތަރިއެއް ކުރަހާނީ އެވެ. ފޮޅި ފިހެވުމުން 4 ފަޅިއަށް ފަތްޖަހާފައި ތެލުލާނީ އެވެ.
"އަޅުގަނޑުމެން އެންމެ ފުރަތަމަ މިމަސައްކަތް ކުރީ ފުޅީގެ ބަދަލުގައި ފޫތޮރުފާފައިވާ ނާއްޓެއް ބޭނުން ކޮށްގެން. އެންމެ ތަނަކުން ނާށި ތޮރުފާފައި ހުންނާނީ. ނާށި ބޭނުންކުރުމުން މަސައްކަތް ކުރެވޭލެއް ލަސް. މިހާރު އަވަސްވެފައި ހަލޮފުޅީގެ ޑިޒައިން ވެސް ވަރަށް ރީތިވާނެ،" ޝައުނާ ކިޔައިދިނެވެ.
500 މިލިލީޓަރުގެ ފުޅިއަކުން 10 ފޮޅިހެދެ އެވެ. ރަށުންނާއި ރަށުން ބޭރުން ބޮޑު ތަރުހީބެއް ލިބޭ މަތިވެރި ޚާއްސަ ހާލުފޮޅި ޝައުނާ ހަދަނީ އޯޑާއެއް ލިބުމުންނެވެ.
ތިޔައީ ތަދުތެރޭ ތޮއްޑުއަށް އައިސްއުޅުނު މަތިވެރީ މީހުން ކޮޕީކޮއްފައިވާ ތޮއްޑޫގެ މޮޑެލެއް މަރުހޫމު މަތިވެރީ ހައްވަމެން ފަދަ މީހުން ތޮއްޑުގައި އުޅުނުއިރު ދަސްކޮށްގެން ދިޔަ މަސައްކަތެއް
ރިޕްލައި