ސިޔާސީ ޕާޓީއަކުން މެމްބަރަކު ވަކިކޮށްފިނަމަ ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭނެ ކަމަށް ކަނޑައަޅައި ގާނޫނުއަސާސީގެ 73 ވަނަ މާއްދާއަށް ގެނައި އިސްލާހުތައް ބާތިލްކުރަން ސުޕްރީމް ކޯޓަށް ހުށަހަޅާފައިވާ މައްސަލައަށް ތަދައްހުލްވާން އިދިކޮޅު މައި ޕާޓީ، އެމްޑީޕީ އާއި ޑިމޮކްރެޓްސް އިން ނިންމައިފި އެވެ.

ގާނޫނުއަސާސީގެ 73 ވަނަ މާއްދާއަށް ގެނައި އިސްލާހުތައް ބާތިލްކޮށްދޭން އެދި ސުޕްރީމް ކޯޓަށް މައްސަލަ ހުށަހެޅުއްވީ ތަޖުރިބާކާރު ގާނޫނީ ވަކީލު އަދި ކެންދޫ ދާއިރާގެ ކުރީގެ މެމްބަރު އަލީ ހުސައިނެވެ.

އެމްޑީޕީން މިއަދު ނެރުނު ބަޔާނެއްގައި ވަނީ ގާނޫނުއަސާސީއަށް ގެނެސްފައިވާ އެ އިސްލާހަކީ ގާނޫނުއަސާސީގެ ބާރު ކެނޑިގެންދާގޮތަށް ގެނެސްފައިވާ އިސްލާހެއް ކަމަށެވެ.

އެމްޑީޕީން ބުނީ އެ އިސްލާހުގެ ސަބަބުން މަޖިލީހުގައި ރައްޔިތުން ތަމްސީލުކުރާނެ މަންދޫބަކު ހިޔާރުކުރުމަށް ރައްޔިތުންނަށް ލިބިފައި އޮތް ހައްގު ނިގުޅާގަނެފައިވާ ކަމަށެވެ.

ޑިމޮކްރެޓްސް އިން ބުނީ އެ އިސްލާހަކީ ރައްޔިތުންގެ މަޖިލީހުގެ މެމްބަރުން މަޖިލީހުގައި ދައްކާ ވާހަކަތަކާއި، ވޯޓު ދޭ ގޮތުން މެމްބަރެއްގެ މައްޗަށް އެއްވެސް ތަހުގީގެއް، ދައުވާއެއް އަދި ޝަރީއަތެއް ވެސް ނުހިންގޭނެހެން ސީދާ ގާނޫނުއަސާސީއިން ކަށަވަރުކޮށްދީފައިވާ އިމްތިޔާޒުތައް ނިގުޅައިގަނެވޭ އިސްލާހެއް ކަމަށެވެ. އަދި އެ އިސްލާހަކީ އިންތިހާބީ މި މަގާމުތަކުގެ ދެމިއޮތުމާއި ނެތުން ސިޔާސީ ޕާޓީއެއްގެ ފިޔަވަޅު އަޅާ ކޮމިޓީއެއްގެ ބާރުގެ ދަށަށް ގެނެވޭ އިސްލާހެއް ކަމަށް ވެސް ޑޮމޮކްރެޓްސް އިން ބުންޏެވެ.

ސުޕްރީމް ކޯޓަށް ހުށަހެޅި އެ މަައްސަލަ އެ ކޯޓުން އަދި ބަލައިގެންފައެއްނުވެ އެވެ.