ހއ. ކެލާގައި ސިހުރު ޖެހި ބަޔަކު ބަލިވިކަމުގެ ތުހުމަތުގައި ފުލުހުން މިއަދު އެ ރަށަށް އަރާ ގެތައް ބަލާ ފާސްކޮށް، ބަޔަކު ހައްޔަރުކޮށްފި އެވެ.

އެނގިފައިވާ ގޮތުގައި މިއަދު ފުލުހުންގެ ބޮޑު ޓީމެއް އެރަށަށް ގޮސް ވަނީ ބައެއް ގެތައް ފާސްކޮށް ބައެއް ތަކެތިވެސް ގެންގޮސްފަ އެވެ. އަދި އެކަން ކުރާކަމަށް ޝައްކުކުރެވޭ ބައެއް މީހުން ފުލުހުންގެ ބެލުމުގެ ދަށަށް ގެންގޮސްފައިވެ އެވެ.

"ހުރިހާ" އާ ވާހަކަ ދައްކަމުން އެރަށު މީހަކު ބުނީ ރަށުގެ ވަރަށް ގިނަ މީހުނަށް ގޮތް ނޭންގޭ އުނދަގޫތަކެއް ވާން ފެށުމުން ބެލިބެލުމުން ސިހުރު ޖެހިފައިވާ ކަން އެނގިގެން ފުލުހުންނަށް އެ މައްސަލަ ހުށަހެޅީ ކަމަށެވެ. އަދި ދިއްދޫގައި ތިބޭ ފުލުހުންގެ ތެރެއިން ގިނަ ބަޔަކު ކެލައަށް ގޮސް އެއް ވަގުތެއްގައި ސިހުރު ހަދާކަމަށް ޝައްކުކުރެވޭ ގޭގެއަށް ވަންކަމަށް އެމީހާ ބުންޏެވެ.

ސިހުރުގެ މައްސަލައަކީ ވަރަށް ބޮޑުވެފައިވާ މައްސަލައެއް ކަމަށް ކެލާގެ ގިނަ ބަޔަކު ބުނެ އެވެ. އެގޮތުން ސުކޫލު ކުދިންނަށްވެސް ސިހުރު ހަދާކަމުގެ ތުހުމަތުވެސް ބައެއް މީހުން ކުރެ އެވެ.

މިކަމާއި ގުޅިގެން އެ ރަށުގައިވަނީ ބޮޑު ނުތަނަވަސްކަމެއް އުފެދިފަ އެވެ.