ނެޝަނަލް ސެންޓަ ފޯ ދަ އާޓްސް (އެންސީއޭ) އިން މިއަހަރުގެ ރަމަޟާން މަހު އޮފީސްތަކުގެ ޓެލެޑްރާމާ މުބާރާތް ބޭއްވުމަށް ނިންމައި، އެ މުބާރާތުގައި ބައިވެރިވުމަށް ހުޅުވާލައިފި އެެވެ.

މި މުބާރާތުގައި ބައިވެރިވުމުގެ ފުރުސަތު މިހާރު ހުޅުވާލައިފައި ވާއިރު، މި މަހުގެ 12 ވަނަ ދުވަހާއި ހަމައަށް ބައިވެރި ވުމުގެ ފުރުސަތު އޮންނާނޭ ކަމަށް އެ ފަރާތުން ބުނެ އެވެ.

އެން.ސީ.އޭ އިން ބުނީ މި މުބާރާތުގައި ބައިވެރިވެވޭނީ ސަރުކާރު އޮފީސްތަކާއި، ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ މުއައްސަސާތަކަށް ކަމަށެވެ.

އަދި ކޮންމެ އޮފީހަކަށް ހުށަހެޅޭނީ އެންމެ ޑްރާމާއެއް ކަމަށާއި މުބާރާތް ބޭއްވުމަށް މަދުވެގެން ފަސް އޮފީހެއްގެ ބައިވެރިވުން ބޭނުންވާނެ ކަމަށެވެ.

މުބާރާތުގައި ބައިވެރިވާ ޑްރާމާތަކުގެ ދިގުމިން ހުންނަންވާނީ މަދުވެގެން 45 މިނެޓާއި ގިނަވެގެން 50 މިނެޓުގެ ދެމެދުގަ އެވެ. އަދި ޑްރާމާ ހުށަހަޅަންވާނީ ދިވެހި ބަހުންނެވެ.

މި މުބާރާތުގައި އެންމެ މޮޅު ޑްރާމާއަށް 50،000 ރުފިޔާގެ އިނާމެއް ދިނުމަށް ވަނީ ހަމަޖެހިފަ އެވެ. މީގެ އިތުރުން އެންމެ މޮޅު އެކްޓަރުންނަށް 15،000 ރުފިޔާ އާއި އެންމެ މޮޅު ސަޕޯޓިން އެކްޓަރުންނަށް 10،000 ރުފިޔާގެ އިނާމު ދިނުމަށް ވަނީ ނިންމައިފަ އެވެ.

އެން.ސީ.އޭއިން ބުނީ، މުބާރާތުގެ ވަނަތައް ހޮވުމުގައި ބަލާނީ ހުރިހާ ފަނޑިޔާރުން ދޭ މާކްސްގެ އެވްރެޖުން އެންމެމަތީ މާކްސް ހޯދާ ފަރާތަކަށްކަމަށެވެ. މީގެ އިތުރުން "ވިއުވާސް ޗޮއިސް" މިއެވޯޑު ލިބޭނީ އެސް.އެމް.އެސްއަށް ހުޅުވަލައިގެން އެންމެ ގިނަ އެސް.އެމް.އެސް ލިބޭ ފަރާތަކަށްކަމަށެވެ.