މާޅޭގެ ކާނިވާ ސަރަހައްދުގައި ހުރި ސްޓޭޖް ތަޅާލައި އެތަނުގައި އާ ސްޓޭޖެއް އަޅައިދޭނެ ބަޔަކު ހޯދަން މާލެ ސިޓީ ކއުންސިލުން އިއުލާންކޮށްފި އެވެ.

ސޓީ ކައުންސިލުން އިއްޔެ ކުރި އިއުލާނުގައި ބުނެފައިވަނީ ކާނިވަލު ތަޅާލުމަށްފަހު އަމިއްލަ ތަކެތީގައި އާ ސްޓޭޖެއް އެތަނުގައި އަޅާދޭނެ ބަޔަކު ހޯދުމަށް ބޭނުންވާކަމަށެވެ.

މި މަސައްކަތް ކޮށްދިނުމަށް ޝައުގުވެރިވާ ފަރާތްތަކުން އަންދާސީ ހިސާބު ހުށަހެޅުމަށް މިހާރު ވަނީ ހުޅަވާލާފައި އެވެ. ސުންގަޑިއަކީ މި މަހުގެ 16 ވަނަ ދުވަހުގެ ހެނދުނު 11:00ގެ ކުރިންނެވެ. އަންދާސީ ހިސާބު ހުށަހެޅޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމެންޓް އަދި ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށް އެކަންނިކަމަށް ސިޓީ ކައުންސިލުގެ އިއުލާނުގައި ބުނެފައިވެ އެވެ.

ސިޓީ ކައުންސިލުގެ އިއުލާނާއެކު އާންމު ކޮށްފައިވާ މައުލޫމާތު ޝީޓުގައި ވާގޮތުން އަލަށް އަޅާ ސްޓޭޖުގެ ކޮންސެޕްޓު ޑިވެލޮޕް ކުރުމާއި އިންޖިނިއަރިން ކުރެހުންތައް ވެސް ތައްޔާރު ކުރަންޖެހޭނީ ކައުންސިލުގެ ޓެކްނިކަލް އިރުޝާދުގެ ދަށުން މަސައްކަތާ ހަވާލުވާ ކުންފުނިންނެވެ.

ސްޓޭޖް އެޅުމުގެ މަސައްކަތައް ކައުންސިލުން އަގު ދައްކާނީ މަސައްކަތްކޮށް ނިންމުމަށްފަހު ބިލް ކުރުމުން ކަމަށް ސިޓީ ކައުންސިލުން ބުންޏެވެ.