ކުރިއަށް އޮތް ބަރަކާތްތެރި ރަމަޟާން މަހަށް 50 ޓަނު ކަދުރު ސައުދީ އަރަބިއްޔާގެ ސަރުކާރުން ރާއްޖެއަށް ހަދިޔާކޮށްފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިިނސްޓަރު ޝަހީމް މިކަން އިއުލާން ކުރެއްވީ މީޑިއާތަކަށް ފޮނުއްވި މެސެޖެއްގަ އެވެ.

މިކަން ހާމަކުރައްވައި މިނިސްޓަރު މީޑިއާތަކަށް ފޮނުއްވި މެސެޖެއްގައި ވިދާޅުވެފައިވަނީ ސައުދީ އަރަބިއްޔާގެ ސަރުކާރުން ކޮންމެ އަހަރަކު ރަމަޟާން މަހަކަށް ރާއްޖެއަށް ދޭ 50 ޓަނުގެ ކަދުރު ރާއްޖެއަށް މިހާރު ލިބިފައިވާކަމަށެވެ.

"ސައުދީ އަރަބިއްޔާގެ ސަރުކާރުން ކޮންމެ އަހަރަކު ރަމަޟާން މަހަށް ދެެއްވާ 50 ޓަނުގެ ކަދުރު ރާއްޖެ އަތުވެއްޖެ. މިނިސްޓްރީ އަށް މިހާރު ވަނީ ލިބިފަ. ރޯދަ މަހުގެ ކުރިން އިންޝާ ﷲ ކަދުރު ބަހައި ނިންމާނެ،" މިނިސްޓަރު ޝަހީމް ކުރެއްވި މެސެޖުގައި ވެ އެވެ.

50 ޓަނުގެ ކަދުރު މިނިސްޓްރީ އަށް މިހާރު ލިބިފައިވާއިރު ރޯދަ މަހުގެ ކުރިން ކަދުރު ބަހައި ނިންމާނެކަމަށްވެސް މިނިސްޓަރު ވިދާޅުވި އެވެ. އަދި މި ފަހަރު ކަދުރު ބެހުމުގައި މިސްކިތްތަކުގައި އިފްޠާރު ޕްރޮގްރާމް ހިންގަން ބޭނުންވާ ޖަމިއްޔާތަކަށް ވެސް ކަދުރުން ބައެއް ދޭނެކަމުގައިވެސް މިނިސްޓަރު ވިދާޅުވި އެވެ.