ރާއްޖެއަށް މެޑިކަލް ޓޫރިޒަމް ތައާރަފުކުރުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)އާއި އޭޑިކޭ ހޮސްޕިޓަލާ ދެމެދު އެއްބަސްވުމެއްގައި ސޮއިކޮށްފި އެވެ.

މި އެއްބަސްވުމުގައި ސޮއިކުރެއްވީ އެމްއެމްޕީއާރުސީގެ މެނޭޖިން ޑިރެކްޓަރު އިބްރާހީމް ޝިއުރީއާއި އޭޑީކޭ ހޮސްޕިޓަލްގެ މެނޭޖިން ޑިރެކްޓަރު އަހުމަދު އައްފާލެވެ.

މި ކަމާ ގުޅުން ހުރި މައުލޫމާތުތައް ހިއްސާކުރައްވައި އައްފާލް ވިދާޅުވީ، އެއްބަސްވުމުގައި ދަށުން އެމްއެމްޕީއާރުސީއާ ގުޅިގެން ރާއްޖޭގައި މެޑިކަލް ޓޫރިޒަމް ތައާރަފުކޮށް، އެކަން ކުރިއަރުވަން މަސައްކަތް ކުރާނެ ކަމަށެވެ.

އެގޮތުން، ރާއްޖޭގެ ސިއްހީ ޚިދުމަތްތައް ހޯދަން ރާއްޖެއިން ބޭރުގެ މީހުން އައިސް ޚިދުމަތް ހޯދޭނެ ގޮތް ތައާރަފު ކުރުމަށާއި ހިންގާ ސިއްހީ އަދި ތައުލީމީ ކޮންފަރެންސް ފަދަ ހަރަކާތްތަކަށް ވެސް ރާއްޖޭން ބޭރުގެ މީހުން ގެނައުމުގެ ފުރުސަތުތައް އިތުރުކުރަން މަސައްކަތް ކުރާނެ ކަމަށް އޭނާ ވަނީ ވިދާޅުވެފަ އެވެ.

އެ އެއްބަސްވުމުގެ ދަށުން، މެޑިކަލް ޓޫރިޒަމްގެ ޒަރިއްޔާއިން ރާއްޖޭގެ ސިއްހީ ދާއިރާއާއި ފަތުރުވެރިކަމުގެ ދާއިރާ ސިންދަފާތު ކުރުމަށް މަސައްކަތް ކުރާނެ ކަމަށް ވެސް އައްފާލް ވިދާޅުވި އެވެ.

މީގެއިތުރުން، މި އެއްބަސްވުމުގެ މަސައްކަތްތައް މިއަދުން ފެށިގެން ކުރިއަށް ދާނެ ކަމަށާއި އެކަމުގެ ތެރެއިން އެކި ހަރަކާތްތައް ކުރިއަށްދާނެ ކަމަށް އައްފާލް ވިދާޅުވި އެވެ.