ބޮލީވުޑްގެ ޒުވާން އެކްޓަރު ކާތިކް އާރްޔަންއާއި މަޝްހޫރު ޕްރޮޑިއުސަރު ކަރަން ޖޯހަރުގެ މެދުގައި އޮތް ރުޅިވެރިކަން އެންމެ ފަހުން ނިމުމަކަށް އަތުވެއްޖެ އެވެ.

2021 ވަނަ އަހަރު ހަބަރުތައް ފެތުރުނު ގޮތުގައި ކަރަންއާއި ކާތިކްގެ މެދުގައި ޖެހުނު މައްސަލައެއްގެ ސަބަބުން ކަރަންގެ ފިލްމު "ދޯސްތާނާ 2"އިން ކާތިކް ވަކިވި އެވެ. އެކަމަކު އޭގެ ތިން އަހަރު ފަހުން އެ ދެތަރިންގެ މެދުގައި އޮތް މައްސަލަތައް ހައްލުކޮށް އެކުގައި ފިލްމެއްގެ މަސައްކަތް ކުރާނެކަން މިވަނީ އިއުލާން ކޮށްފަ އެވެ.

މި މައްސަލައާ ގުޅިގެން ކަރަންގެ ޕްރޮޑަކްޝަން ހައުސް "ދަރްމާ ޕްރޮޑަކްޝަންސް"އިން އަލަށް އުފައްދާ ފިލްމެއް ކަމަށްވާ "ތޫ މޭރީ މޭ ތޭރާ މޭ ތޭރީ ތޫ މޭރީ"ގެ ލީޑު ރޯލުން ފެނިގެންދާނީ ކާތިކް އެވެ.

ކަރަންއާއެކު މަސައްކަތް ކުރަން އުޅޭކަން ކާތިކް އިއުލާން ކޮށްފައިވަނީ އޭނާގެ އެކްސް އެކައުންޓްގައި ހިއްސާކުރި ވީޑިއޯއެއް މެދުވެރިކޮށެވެ.

2026 ވަނަ އަހަރުގެ ކްރިސްމަސްއާ ދިމާކޮށް ރިލީޒްކުރަން ނިންމާފައިވާ އެ ފިލްމުގެ ލީޑު އަންހެން ތަރިއެއް އަދި ކަނޑައަޅާފައިނުވާ ކަމަށް ހަބަރުތައް ބުނެ އެވެ.