ރާއްޖޭގައި އޮޕަރޭޓް ކުރަމުން އަންނަ 11 ރިސޯޓަކުން ސާވިސް ޗާޖު ރުފިޔާއިން ދޭން ނިންމައިފި އެވެ.

ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް) އިން ބުނީ އެގޮތަށް ނިންމައި ސާކިއުލާތައް ނެރުނު ރިސޯޓްތަކުގެ ނަންތައް އެ ޖަމިއްޔާއިން ހާމަކުރާނެ ކަމަށެވެ.

ގާނޫނު ބުނާގޮތުން މުވައްޒަފުންނަށް ސާވިސްޗާޖަކީ ދިނުން ލާޒިމް އެއްޗެއްކެވެ.

ބައެއް ރިސޯޓްތަކުން ނެރުނު ސާކިއުލާތަކުގައި ބުނެފައި ވަނީ ރިސޯޓުން ސާވިސް ޗާޖު ރުފިޔާއިން ދޭން ނިންމީ އަލަށް އަމަލުކުރަން ފެށި ބޭރު ފައިސާ މާރުކުރުމުގެ ގާނޫނުގެ ސަބަބުން ކަމަށެވެ.

ބޭރު ފައިސާއާ ބެހޭ ގާނޫނުގައި ވަނީ ރިސޯޓްތައް ކެޓަގަރައިޒްކޮށްފަ އެވެ. އެގޮތުން "ކެޓެގަރީ އޭ" ގައި ހިމެނޭ ރިސޯޓުތަކަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު ނުވަތަ މީލާދީ މަހެއްގެ ތެރޭގައި ލިބޭ އާމްދަނީގެ 20 ޕަސެންޓު މާރުކުރަން ވަނީ މަޖުބޫރުކޮށްފަ އެވެ.

މިކަމާ ގުޅިގެން ރިސޯޓް މުވައްޒަފުން އަންނަނީ ކަންބޮޑުވުންފާޅު ކުރަމުންނެވެ. މިކަމާ ގުޅޭގޮތުން ޓޫރިޒަމް މިނިސްޓްރީން ވަކި އެއްޗެއް ނުބުނެ އެވެ.