ކުރީގެ ރައީސް އިބްރާހީމް މުހައްމަދު ސޯލުހުގެ ވެރިކަމުގައި އިންޑިއާގެ ލޯނު އެހީގައި ތަރައްގީކުރަން ފެށި ހަނިމާދޫ އިންޓަނޭޝަނަލް އެއާޕޯޓްގެ މަސައްކަތް ނިންމައި އަންނަ ޖުލައި މަހު ހުޅުވާނެ ކަމަށް ރީޖިނަލް އެއާޕޯޓްސް ކޮމްޕެނީން ބުނެފި އެވެ.

އިންޑިއާގެ އެގްޒިމް ބޭންކުގެ 2.1 ބިލިއަން ރުފިޔާގެ ލޯނެއްގެ ދަށުން ކުރިއަށް ގެންދާ އެ މަޝްރޫއުގެ އަމަލީ މަސައްކަތް ފެށީ ޖެނުއަރީ 18، 2023 ގަ އެވެ. އެ މަސައްކަތް ކުރަނީ އިންޑިއާގެ ބޮޑު އިންފްރާސްޓްރަކްޗާ ކުންފުންޏެއް ކަމަށްވާ ޖޭއެމްސީ އެކްސްޕޯޓްސް އިންނެވެ.

ރީޖިނަލް އެއާޕޯޓްސްގެ އޮފިޝަލަކު ވިދާޅުވީ ހަނިމާދޫ އެއާޕޯޓް ތަރައްގީކުރުމުގެ މަޝްރޫއުގެ ދަށުން މިހާރު ނުނިމި ވަނީ ހަމައެކަނި ޓާމިނަލްގެ މަސައްކަތް ކަމަށެވެ. ދެ ބުރީގެ އެ ޓާމިނަލުން އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭނެ އެވެ. ޓާމިނަލް ޑިޒައިންކޮށްފައި ވަނީ މަޑިއެއްގެ ބައްޓަމަށެވެ.

"އިރަދަކުރެއްވިއްޔާ ޖުލައި މަހުގެ ތެރޭގައި ހަނިމާދޫ އެއާޕޯޓް ހުޅުވޭނެ. މަސައްކަތް ހުއްޓުމެއް ނެތި ބާރަށް ކުރިއަށް އެބަދޭ،" އޮފިޝަލް ވިދާޅުވި އެވެ.

މި މަޝްރޫއުގެ ދަށުން ހަނިމާދޫ އެއާޕޯޓްގައި 2.46 ކިލޯމީޓަރުގެ އާ ރަންވޭއެއް ވަނީ ތަރައްގީކޮށްފަ އެވެ. އަދި މިމަޝްރޫއު ނިމުމުން އެއާބަސް A320 އާއި ބޯއިން 737 މަރުކާގެ ބޯޓުފަހަރަށް ހަނިމާދޫ އެއާޕޯޓުން ހިދުމަތް ދެވޭނެ އެވެ.

އެމްޑީޕީން ސަރުކާރުން ވަނީ ސ. ގަން އިންޓަނޭޝަނަލް އެއާޕޯޓް ތަރައްގީކުރަން ވެސް ހަވާލުކޮށްފަ އެވެ. އެއީ 17 މިލިއަން ޑޮލަރުގެ މަޝްއޫއެކެވެ.