މިދިޔަ 2024 ވަނަ އަހަރު ރާއްޖެއަށް އައި ޓޫރިސްޓުންގެ އަދަދު އޭގެ ކުރީ އަހަރާއި އަޅާބަލާއިރު 9 ޕަސެންޓް އިތުރުވެފައިވާ ކަމަށް ތަފާސްހިސާބުތަކުން ދައްކައިފި އެވެ.

2024 ވަނަ އަހަރަކީ ރާއްޖެއަށް މިހާތަނަށް އެންމެ ގިނަ ޓޫރިސްޓުން އައި އަހަރެވެ.

ސަރުކާރުން 2024 ވަނަ އަހަރު ކަނޑައެޅީ ދެ މިލިއަން ޓޫރިސްޓުން އަހަރު ނިމުމުގެ ކުރިން ގެނައުމަށެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން 2024 ވަނަ އަހަރު ރާއްޖެއަށް 2،047،435 ޓޫރިސްޓުން ވަނީ އައިސްފަ އެވެ. މިއީ އޭގެ ކުރީ އަހަރާއި އަޅާބަލާއިރު 9 ޕަސެންޓް އިތުރުވުމެކެވެ. 2023 ވަނަ އަހަރު ރާއްޖެ އައިސްފައި ވަނީ 1،878،543 ޓޫރިސްޓުންނެވެ.

މިދިޔަ އަހަރު ރާއްޖޭގެ ޓޫރިސްޓުން ވަނީ ގިނަ ރެކޯޑްތަކެއް ހަދާފަ އެވެ. މިދިޔަ އަހަރަކީ އެއް ދުވަހެއްގައި އަދި އެއް މަހެއްގައި ރާއްޖެއަށް އެންމެ ގިނަ ޓޫރިސްޓުން އައި އަހަރެވެ. އެއް މަހެއްގައި އެންމެ ގިނަ ޓޫރިސްޓުން އައީ މިދިޔަ ފެބްރުއަރީ މަހު އެވެ. އެއީ 217،392 ޓޫރިސްޓުންނެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން 2024 ވަނަ އަހަރު ރާއްޖެއަށް އެންމެ ގިނައިން ޓޫރިސްޓުން އައި 5 ގައުމުގެ ތެރޭގައި ހިމެނެނީ ޗައިނާ، ރަޝިއާ، އިނގިރޭސިވިލާތް، ޖަރުމަން އަދި އިޓަލީ އެވެ.

އޭގެ ތެރޭގައި ހިމެނޭ ޗައިނާ އަދި ރަޝިއާއިން ދެ ލައްކައަށް ވުރެ ގިނަ ޓޫރިސްޓުން އައިސްފައިވެ އެވެ. އިނގިރޭސިވިލާތް، ޖަރުމަން އަދި އިޓަލީން ލައްކައަށް ވުރެ ގިނަ ޓޫރިސްޓުން އައިސްފައިވާ ކަމަށް ތަފާސްހިސާބުތައް ދައްކަ އެވެ.

މި އަހަރު ސަރުކާރުން އާމާޒުހިފާފައި ވަނީ ޓޫރިސްޓުންގެ އަދަދު އިތުރުކުރުމުގެ އިތުރުން ރާއްޖެއަށް ލިބޭ އާމްދަނީ ވެސް އިތުރު ކުރުމަށެވެ. އެގޮތުން ޓޫރިޒަމުން ދައުލަތައް ލިބޭ އާމްދަނީ 5 ބިލިއަން ޑޮލަރަށް އެރުވުމަކީ އަމާޒެއް ކަމަށް ބުނެފައިވެ އެވެ. އަދި ރާއްޖެ އަންނަ ޓޫރިސްޓުންގެ އަދަދުން 15 ޕަސެންޓްގެ ކުރިއެރުމެއް މިއަހަރު ހޯދުމަށް ވަނީ ކަނޑައަޅާފަ އެވެ.