އެކިއެކި ވިޔަފާރިތަކުގެ ތެރެއިން 15 މިލިއަން ޑޮލަރުގެ އާމްދަނީއެއް ލިބޭ ވިޔަފާރިއެއް ނަމަ، އެމްއެމްއޭގައި ރަޖިސްޓާވާން މަރުކަޒީ ބޭންކުން ހުޅުވާލައިފި އެވެ.

ބޭރު ފައިސާއާބެހޭ ގާނޫނުގެ ދަށުން އެމްއެމްއޭގައި ރަޖިސްޓަރީކުރުމާ ބެހޭ އުސޫލުތައް ބަޔާންކޮށް "ބޭރު ފައިސާއާބެހޭ ގާނޫނުގެ ދަށުން ރަޖިސްޓަރީކުރުމުގެ ގަވާއިދު" އެމްއެމްއޭއިން މިހާރު ވަނީ ގެޒެޓުކޮށްފަ އެވެ. މި ގަވާއިދު ހަދާފައި ވަނީ ޖަނަވަރީ 1، 2025 ގައި އަމަލުކުރަންފެށި ބޭރު ފައިސާއާބެހޭ ގާނޫނުގެ 18 ވަނަ މާއްދާގެ ދަށުންނެވެ.

އެމްއެމްއޭ އިން ބުނީ މި ގާނޫނުގެ ދަށުން ރަޖިސްޓަރީކުރަން ޖެހެނީ، ޓޫރިޒަމް ދާއިރާގެ މުއްދާ ވިއްކާ ފަރާތްތަކާއި ޚިދުމަތް ފޯރުކޮށްދޭ ފަރާތްތަކުންނާއި، ޓޫރިޒަމް ދާއިރާގެ އެ ފަރާތްތަކާއި މާލީ އިދާރާތައް ފިޔަވައި، އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ޚިދުމަތަށް، ފާއިތުވި މީލާދީ އަހަރެއްގެ ތެރޭގައި ބޭރު ފައިސާއިން މަދުވެގެން 15 މިލިއަން ޑޮލަރަށް ނިސްބަތްވާ އަދަދެއް ލިބޭ ފަރާތްތަކުން ކަމަށެވެ.

މިގޮތުން، ޓޫރިޒަމް ދާއިރާގެ މުއްދާ ވިއްކާ ފަރާތްތަކާއި ޚިދުމަތް ފޯރުކޮށްދޭ ފަރާތްތަކުގެ ތެރެއިން، މި ގާނޫނު ވުޖޫދަށް އައުމުގެ ކުރިން އޮތް ބޭރު ފައިސާއާބެހޭ ގަވާއިދުގެ ދަށުން އެމްއެމްއޭގައި ރަޖިސްޓަރީކޮށްފައި ނުވާ ފަރާތްތަކުން މިމަހުގެ 13 ގެ ކުރިން އެމްއެމްއޭގައި ރަޖިސްޓަރީކުރަން ޖެހޭ ކަމަށް އެމްއެމްއޭ އިން ބުނެ އެވެ. އަދި 1 ޖަނަވަރީގެ ފަހުން މި ދާއިރާގައި ވިޔަފާރި ފަށާ ފަރާތްތަކުން ރަޖިސްޓަރީކުރަން ޖެހެނީ އެފަރާތްތަކުން ވިޔަފާރި ފަށާ ތާރީޚުން ފެށިގެން 30 ދުވަހުގެ ތެރޭގައި ކަމަށް ވެސް އެމްއެމްއޭ އިން ބުނެ އެވެ.

މީގެ އިތުރުން، ޓޫރިޒަމް ދާއިރާގެ މުއްދާ ވިއްކާ ފަރާތްތަކާއި ޚިދުމަތް ފޯރުކޮށްދޭ ފަރާތްތަކާއި މާލީ އިދާރާތައް ފިޔަވައި، އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ޚިދުމަތަށް، 2024 ވަނަ އަހަރުގެ ތެރޭގައި ބޭރު ފައިސާއިން މަދުވެގެން 15 މިލިއަން ޑޮލަރަށް ނިސްބަތްވާ ޢަދަދެއް ލިބިފައިވާނަމަ، އެފަރާތަކުން އަންނަ މަހުގެ 3 ގެ ކުރިން އެމްއެމްއޭގައި ރަޖިސްޓަރީކުރަންޖެހެ އެވެ. އަދި 1 ޖަނަވަރީ 2025ގެ ފަހުން މީލާދީ އަހަރެއްގެ ތެރޭގައި ބޭރު ފައިސާއިން މަދުވެގެން 15 މިލިއަން ޑޮލަރަށް ނިސްބަތްވާ އަދަދެއް ލިބޭ ފަރާތްތަކުން އެމްއެމްއޭގައި ރަޖިސްޓަރީކުރަން ޖެހެނީ އެ މީލާދީ އަހަރަކާ ވިދިގެން އަންނަ އަހަރެއްގެ ޖަނަވަރީ މަސް ނިމުމުގެ ކުރިން ކަމަށް ވެސް އެމްއެމްއޭ އިން ބުނެ އެވެ.

މި ގަވާއިދުގެ ދަށުން ރަޖިސްޓަރީކުރަންޖެހޭ ފަރާތްތައް އެމްއެމްއޭގައި ރަޖިސްޓަރީކުރަންޖެހޭނީ އެ އޮތޯރިޓީގެ ވެބްސައިޓުގައި ހުންނަ މޯލްޑިވްސް މަނިޓަރީ އޮތޯރިޓީ ފޮރިން އެކްސްޗޭންޖު ރެޖިސްޓްރޭޝަން ޕޯޓަލް މެދުވެރިކޮށެވެ. މިގޮތުން ރަޖިސްޓަރީކުރާއިރު ހުށަހަޅަންޖެހޭ މައުލޫމާތާއި ލިޔެކިޔުންތައް އެ ގަވާއިދުގައި ބަޔާންކޮށްފައިވެ އެވެ.